'E mmane stese

 

teneno ’e mmane stese

’E MMANE STESE

di Claudio Pennino

’E ttruove fore ê cchiese,

sott’ ’e fferze ’e velluto;

teneno ’e mmane stese,

e ccercano n’aiuto.

Si n’ommo cade nterra,

o smania pe na freva,

stenne na mano e afferra

na mano c’ ’o sulleva.

Pure nu criaturiello,

ca chiagne e ccerca ’a mamma,

vavuso e mmuccusiello,

cu ’e mmane stese ’a chiamma.

E ognuno, a chistu munno,

fosse gigante o nano,

quanno stà pe gghì a ffunno,

stenne sempe na mano.

Pecché ’sti mmane stese,

parlano senza voce,

ma, tennere e ’ndifese,

schiovano a Cristo ncroce.

Arrivano ’nzì ô ncielo,

patute, ma splennente,

e stracciano ogni vvelo

nnant’ a chi è ’ndifferente.

E ’o cielo è ’a perdunanza

a ttutto ’stu struppìo;

cercano na speranza:

trovano ’a mano ’e Ddio.

(da ’A pianta d’ ’a felicità, 2004)

Preggiudizzio

 

Ma ’a streca cerca sulo a ’sta criatura

PREGGIUDIZZIO

di Claudio Pannino



Na streca ca purtava a spasso ’o figlio,
nu iuorno, ca p’ ’a via facette scuro,
cu tutto ca spenzava ogni ccunziglio,
perdette, mmiez’â folla, ’stu criaturo.

E ’a tanno, o esce ’o sole o fa ’e ttempeste,
’a streca smiccia ogne purtone nchiuso.
Appizz’ ’e rrecchie ê ssenghe d’ ’e ffeneste,
p’appurà ’o figlio suio chi s’ha annascuso.

E si sente ca chiagneno ’a luntano,
pare mpazzuta… corre, ruciulianno.
Cerca ’e capì d’ ’a voce, chianu chiano,
si è ’o piccerillo suio ca ’a sta chiammanno.

« Nzerrate ’e pporte a chiave – dice ’a ggente –
vene pe s’arrubbà nu piccerillo! »
Na mamma, arreto ê llastre, ’a tene mente,
s’astregne ’o figlio mpietto e ddà nu strillo.

Ma ’a streca cerca sulo a ’sta criatura.
E chiagne, e ffa na pena mmiez’ ’a via.
E ognuno abbarra ’e pporte p’ ’a paura,
se fa nu segno ’e croce, e accussì sia.

Se sape, ’o preggiudizzio stuta ’o core,
e ognuno vede ’a streca e resta muto.
Nisciuno, nzieme a n’anema ca more,
vede na mamma c’addimanna aiuto.


(’A pianta d’ ’a felicità 2004)

Nu bigliettino

Dint’a nu libbro ’e scola aggio truvato

NU BIGLIETTINO

                                         Il tempo divora ogni cosa.

                                                   Ovidio, Metamorfosi

Dint’a nu libbro ’e scola aggio truvato,

nu bigliettino, tiénnero e nnucente,

’e na nnammuratella d’ ’o ppassato,

ca me giurava ammore eternamente.

Diceva: « Ammore mio, core ’e ’stu core,

quanno sto’ mbraccio a te, ’o tiempo vola;

pare c’attuorno tutto cosa more,

e na carezza toia basta e cunzola. »

Quanta prumesse, e quanta giuramente

mm’aveva fatto ’sta nnammuratella…

E senza ce penzà, distrattamente,

aggio stracciato chella cartuscella.

Ma poco doppo me ne so’ pentuto.

Pareva ’e sentì ’a voce soia gentile

ca me diceva: « …ma pecché è fernuto? »

E, allora, ll’aggio vista… dint’abbrile,

cu na faccella fina e delicata…

Teneva sidece anne, o poco ’e cchiù.

Na mana piccerella ’e na pupata…

e dint’a ll’uocchie fute ’a giuventù.

Subbeto aggio pigliato ’e ccartuscelle,

e ll’aggio mise nzieme n’ata vota,

cercanno ’e ll’apparà cu ’e ssenghetelle,

facennole girà comm’a na rota.

Ma nun c’è stato vierzo ’e ll’accucchià.

’Sti ppalummelle ’e carta mmiez’ ’a mana,

parevano già pronte pe vulà…

comm’è vulata chesta vita sana.

E mentre m’ ’e gguardavo sparpagliate,

aggio liggiuto, cu na pena ô core,

ncopp’a dduie piezze ’e carte cchiù accustate:

« ’O tiempo vola, e tutto cosa more. »

(da ’A pianta d’ ’a felicità, 2004)



 

Ce sta na stella chiara a matutino

STELLA DIANA

di Claudio Pennino

 

 

                     Così spegne costei tutte le belle,

                  come ’l lume del sol tutte le stelle.

                                                    A. Poliziano

 

 

Ce sta na stella chiara a matutino,

ca ’e tutt’ ’e stelle è chella cchiù lucente.

’E ragge so’ d’argiento e d’oro fino,

ca pareno, chell’ate, trasparente.

Tu accussì stute tuttequante ’e bbelle,

comm’ ’a luce d’ ’o sole tutt’ ’e stelle.

Ianche so’ ’e ccarne comm’ ’a purcellana,

e cchiù splennente si’ d’ ’a stella Diana.

(da ’A pianta d’ ’a felicità, 2004)

'O libbro d' 'e ffate



te nzerraie dint’ ’o libbro d’ ’e ffate

’O LIBBRO D’ ’E FFATE

di Claudio Pennino

                                                 Ad Arianna

Te n’asciste d’ ’o libbro d’ ’e ffate,

chella vota ca nun ’o nzerraie;

era ’o cunto d’ ’e iuorne ncantate,

ca pe te nun passavano maie.
 

Ce mettiste a ’sta paggina ’o punto,

e arapiste doie scelle d’auciello.

Accussì te n’asciste d’ ’o cunto,

e vulanno lasciaste ’o castiello.
 

Arrivata a na bella funtana,

t’accustaste c’ ’a sete era assaie;

quanno ’o musso nfunniste c’ ’a mana,

’a surgiva ’int’a niente seccaie.
 

N’uorco steva annascuso ’int’ ’e ppiante,

e pareva ’o patrone d’ ’o munno.

Po’ ncuntraste na streca cchiù nnante,

ca ’e crestiane mannava a zeffunno.
 

Che dulore a 'stu core cuntento.

Tu ca ’o munno ’o sunnave affatato

t’accurgiste, dint’a nu mumento,

ch’era favuzo e ncuorpo malato.
 

E vedenno ’sta malaparata,

disperata, ’a ’sti nfame fuiste,

e, perduta ’int’ ’o bbosco, e appaurata,

’int’a connola, nzuonno, cadiste.
 

Te purtaie dint’ ’e bbracce astrignuta,

n’ata vota ’int’ ’e cunte ncantate,

e, vedennote ancora addurmuta,

te nzerraie dint’ ’o libbro d’ ’e ffate.

 

 

(da ’A pianta d’ ’a felicità, 2004)


 

strignenno dint’ ’e mmane

na rosa prufumata.

’A FINE D’ ’O MUNNO

di Claudio Pennino

              Appuntamento a Capemonte

Leggo ncopp’ ’o ggiurnale,

stampato chiaro e ttunno:

« Stasera a ll’otto mpunto,

vene ’a fine d’ ’o munno! »

Me faccio ’a resatella

e penzo a ’stu mumento:

«Propio stasera a ll’otto

ca tengo ’appuntamento?!… »

Vi’ quanta fessarie

se ’mmentano ’e ggiurnale.

E ntanto songo ’e sseie,

e tu si’ puntuale.

Me vesto lindo e pinto:

cammisa e fazzulette,

’o vestetiello ’e lino,

e ggià so’ fatte ’e ssette.

Felice mmiez’ ’a ggente

me faccio ’a cammenata,

strignenno dint’ ’e mmane

na rosa prufumata.

Priciso, a ll’otto mpunto,

me trovo ncopp’ ’o Tunno.

Tu spunte ’a ll’ata parte

e si’ ’a fine d’ ’o munno.

(’A pianta d’ ’a felicità 2004)

Ce sta chi ricco assaie

Che sciorta nera ’o cielo m’ha mannato

CE STA CHI RICCO ASSAIE

di Claudio Pennino

Ce sta chi, ricco assaie,

d’ ’a vita soia surtanto bene ha avuto,

e nun fatica maie,

e sempe sta servuto e reveruto.

E nun le manca niente,

e, senza nu penziero malamente,

nun sape che so’ ’e stiente,

e, tutt’ ’o iuorno, campa alleramente.

Ma basta ca ’stu tale,

tene, però, nu poco ’e male ’e mole,

na cosa naturale,

iusto pe lle fa fà ddoie capriole,

ca, pronto, s’allamenta:

« Che sciorta nera ’o cielo m’ha mannato,

oi vita malamenta,

pecché so’ nato tanto sfurtunato? »

(da ’A pianta d’ ’a felicità, 2004)

Tutto me parla 'e te

Ncielo sponta na luna malandrina,

pallida, delicata, trasparente…

TUTTO ME PARLA ’E TE

di Claudio Pennino

’A sera scenne e i’ sulo cu ’e penziere,

vaco sbarianno senza nu pecché.

Cerco d’ ’a cuitudine ’o piacere,

ma tutto cosa attuorno parla ’e te.

Ncielo sponta na luna malandrina,

pallida, delicata, trasparente…

comm’ ’a faccella toia gentile e fina,

e, ’a cielo, pare ca me tene mente.

Me parla ’e te ’o prufumo d’ ’a campagna,

’o canto ’e n’auciello cchiù luntano.

E sento ’a voce toia ca m’accumpagna,

comm’a nu piccerillo, mano a mano.

Pe dint’a na felinia, mmiez’ ’e ppiante,

n’anemaluccio, rassignato, aspetta.

S’è arravugliato e nun sape i’ cchiù nnante,

e, appiso ê file, fa na mariunetta.

Nu triemmolo me passa ’int’ ’e ddenocchie:

pecché succede chesto, ma pecché?

Pe nun vederte cchiù nzerro chist’uocchie,

ma pure ô scuro, i’ veco sempe a tte.

(da ’A pianta d’ ’a felicità, 2004)

'A mesura d' 'e ccose

nun se po’ mmesurà ll’ammore ’e mamma

’A MESURA D’ ’E CCOSE

di Claudio Pennino

                                             Il vero amore non ha

                                         mai conosciuto misura.
                                                                   Properzio

Tutto, a ’stu munno, se po’ mmesurà:

na cosa piccerella piccerella,

ca nun ce abbasta ’a lente p’ ’a guardà,

o puro grossa assaie, quant’a na stella.

Se po’ piglià ’a mmesura a ogne cosa,

e tutt’ ’e ccose, doppo, so’ cchiù chiare.

Se ponno cuntà ’e spine a ogne rosa,

o quanta gocce d’acqua tene ’o mare.

’O pizzo ’e na muntagna o nu sprefunno,

na pena nchiusa ’int’a na lacremella.

Pe fino ’o sole, accussì largo e ttunno,

s’è fatto ammesurà c’ ’a valanzella.

E, ogne cosa, doppo mmesurata,

pare cchiù grossa si era piccerella;

e chella grossa pare cchiù aggrazziata,

cu tutto ch’era storta e bruttulella.

Na cosa sola nun tene mmesura,

e nun ce stà ’o strumento, né ’o prugramma,

ma ’e tuttequante è chella cchiù sicura:

nun se po’ mmesurà ll’ammore ’e mamma.

(da ’A pianta d’ ’a felicità 2004)

'O libbro d' 'o ppecché

Ce sta nu libbro ca tene annutato

tutt’ ’e pecché ca stanno ncopp’ ’o munno

’O LIBBRO D’ ’O PPECCHÉ

di Claudio Pennino

Ce sta nu libbro ca tene annutato

tutt’ ’e pecché ca stanno ncopp’ ’o munno.

A ffila, nu pecché arreto a n’ato,

ne songo a centenare, nu zeffunno.

« Pecché sto’ sazzio quanno aggio magnato?

E comme maie ’a nave nun va a ffunno?

Pecché nun vede chi nasce cecato?

E, ’o munno, ’o ssaie  pecché è largo e ttunno? »

A tutte sta signata na risposta,

e ogne ccosa llà se po’ sapé:

« Pecché ll’ammore coce chi t’accosta,

e coce chi luntano resta ’a te? »

A ’sta dimanna, pare fatto apposta,

nun steve scritto niente, ma pecché?

(da ’A pianta d’ ’a felicità, 2004)

N'aceno d'uva

Accosto ’a vocca e zuco ’a malvasia,

e mmocca sent’ ’o mmèle e me cunzolo

N’ACENO D’UVA

di Claudio Pennino






Cu n’aceniello d’uva mpont’ ô musso,
me tiente cu ’sta vocca fresca e bella.
Vuò ca me zuco ’stu cunfietto russo?
E appriesso voglio ’a vocca sciuliarella.

Affonno ’a vocca mia ncopp’a ’sta vocca,
pe t’ ’a vasà speruto e assaie guliuso…
e sento ll’uva ca se schiatta mmocca,
e sento ’o musso tuoio ncerato e nfuso.

E ’o zuco scorre senz’avé arricietto:
primma te tegne nfaccia na viuletta,
po’, chianu chiano, sciulia nfino e mpietto,
nfezzannose pe dint’ ’a cammicetta.

Accosto ’a vocca e zuco ’a malvasia,
e mmocca sent’ ’o mmèle e me cunzolo.
Se sponta ’a cammicetta e, vita mia,
ll’anema saglie ncielo cu nu volo.

Me piglio chello ca tu mm’hê prummiso:
n’aceno d’uva e nu zeffunno ’e bbene.
Mo saccio comm’è ffatto ’o Paraviso,
e saccio pure che sapore tene.





(da ’A pianta d’ ’a felicità, 2004)

Viene pe mare

VIENE, CA T’ASPETTO

 di Claudio Pennino

Viene, ca t’aspetto.

Viene dint’ ’a staggione,

p’ ’e strate sulitarie d’ ’e ccampagne,

addó ’e passe smoveno nuvole ’e calore.

Viene cu ’e ttempeste,

quanno è vierno,

e, ’o iuorno, puveriello,

dint’a niente, more mbraccio â sera.

Viene dint’ ’o profumo

’e na matina ’e primmavera;

viene dint’ ’o sapore

’e na mullica ’e pane.

Dint’ ’o culore ’e na cerasa rossa,

dint’ ’o silenzio d’ ’e pparole

ca nun so’ state dette.

Viene, ca t’aspetto.

Viene pe mare,

e, pe signale, mpont’ ’a varca,

appienne, comme fosse na lampara,

’a luna ianca.

Quanno fa notte, nascostamente,

viene ’int’a nu suonno.

Viene, ca t’aspetto.

(da ’A pianta d’ ’a felicità 2004)

partetteno ’e Rre Magge ’a ll’Urïente

’O QUARTO RRE

di Claudio Pennino

                        

                                 No’ si volta chi a stella è fiso
                                               Leonardo Da Vinci

Quanno p’ ’o cielo accumparette ’a stella,

partetteno ’e Rre Magge ’a ll’Urïente.

Ma ’o quarto Rre dicette: « Nun è chella

ca ce accumpagnarrà nzieme cu ’e viente. »

E s’abbiaie pe na via stramana,

cu ’a spata argiento allato e ’a vesta ’e séta…

mentre ’e cumpagne, pe na notte sana,

currettero addereto a ’sta cumeta.

Passaie pe nu scarrupo e na vallata,

tagliaie nu monte quanto a na petrella…

mentre p’ ’o cielo, ’a stella nnargentata,

luntana, addeventava piccerella.

Tanto s’alluntanaie p’ ’o bosco futo,

c’ ’a stella ’a miez’ ’o cielo scumparette;

e nun truvaie cchiù ’a strata, ’o Rre saputo,

e dint’ ’a notte scura se perdette.

(da ’A pianta d’ ’a felicità 2004)

ca ’a quanno se n’è gghiuto overamente,

’sta vita pare nzìpeta e vacante.

’O SPIRETIELLO

di Claudio Pennino

Ce sta nu dispettuso ’e spiretiello

ca mm’accumpare ogne mumento ’nnante.

Nun è maligno, anze, è pazziariello,

ma comme a nu tafano è assaie scucciante.

Si do’ nu muorzo a na percoca doce,

comm’a nu vermezzullo esce â via ’e fora.

Si arapo na crisommola o na noce,

pure llà dinto llà m’ ’o trovo ancora.

Si mm’arreposo e dormo a suonno chino,

me sento ’e muzzecà ’e mmane e ’a faccia.

Me sceto e ’o veco llà, ncopp’ ’o cuscino:

nu póllece ca ride e me ne caccia.

’A notte, trasfurmato ’a suricillo,

’o sento ’e rusecà pe dint’ ’o scuro.

’O metto ’o ccaso, ’o ’ngapp’ ’int’ ’o mastrillo,

ma chillo chiagne peggio ’e nu criaturo.

Me vene nzuonno, zompo ’a dint’ ’o lietto,

e ncielo veco ’a luna lustra e bella…

E ’o spiretiello, pe me fa dispietto,

m’ ’a stuta comme fosse na pazziella.

Se mena dint’ ’a vasca nziem’ ’e pisce;

se nchiude ’int’ ’a caiola cu ll’auciello:

« Vattenne, - ll’aggio ditto – m’ammalisce.

Lassame sulo, nfame ’e farfariello! »

.  .  .  .  .  .  .  .  .  .  .  .  .

Mo so’ tre gghiuorne ca nun se fa vivo,

e pure, doppo fatto ’stu scatascio,

ncuorpo me sento comm’a nu currivo,

na cosa ncanna ca nun scenne abbascio.

Aspetto c’antrasatta st’affliggente,

me s’appresenta allero e zumpettiante,

ca ’a quanno se n’è gghiuto overamente,

’sta vita pare nzìpeta e vacante.

(da ’A pianta d’ ’a felicità 2004)

i’ vaco annante e chella vene arrèto

LL’OMBRA MIA

 di Claudio Pennino

                            Io non ero per gli altri quel che finora,

                                      dentro di me, m’ero figurato d’essere.

                                                                                        L. Pirandello

Cammino e guardo ll’ombra mia pe tterra.

I’ ca me sento ancora nu guaglione,

guardanno ’a “siluetta” meza â sgherra,

me pare ’e vedé ll’ombra ’e nu scignone.

Faccio na corza e po’ me fermo ’e bbotto:

voglio essere sicuro ca song’io.

Na macchia nera, a forma ’e panzarotto,

me corre appriesso, quant’è certo Ddio.

P’arraggia scasso ’a luce ’e nu lampione

ca me fa ll’ombra scufanata e chiatta.

Ma ô scuro è peggio: pare nu scurpione,

tanto ca s’appaura pure ’a iatta.

Comm’a dduie nnammurate dispettuse,

i’ vaco annante e chella vene arrèto.

Scanzo mparanza ’e vicule annascuse:

no pe quaccòsa, ma… stongo scuieto.

Nun ce accapezzo cchiù. So’ frasturnato.

Ll’ombra ca m’accumpagna nfaccia ô muro,

è ll’ombra mia opuro è ll’ombra ’e n’ato?

E songo viecchio, ggiovane o criaturo?

So’ sicco e luongo comm’a nu scupillo,

o chiatto e gruosso quant’a nu gigante?

Chi songo overamente: chisto o chillo?

Songo uno sulo o songo a tuttequante?

’A quanno soffro ’e chesta malatia,

me songo nzallanuto e scuntraffatto;

sarrà ca ’a verità è na buscia,

ma i’ nun ’o ssaccio cchiù comme so’ fatto.

(da ’A pianta d’ ’a felicità 2004)