'E passarielle

 

So’ ppassarielle e ccórreno

’E PASSARIELLE

di Claudio Pennino

So’ ppassarielle e ccórreno
d’ ’e nive cchiù lluntane,
quanno pe tterra avvìstano
na mullechella ’e pane.

S’accostano ’e cchiù ggiùvene
facenno nu ciù-ciù,
tanto ca mm’arricòrdano
ll’anne d’ ’a ggiuventù.

Po’, appriesso, secutànnose,
ne veneno tant’ate,
ca quanno so’ nu cuófano
nun l’aggio cchiù ccuntate.

«Comme ve mmirio, pàssare,
ca libbere vulate,
’a do’ venite e, a ll’ùrdemo,
diciteme: addó iate?»

Si ’a mano provo a stènnere
pe n’afferrà quaccuno,
mparanza se ne vòlano
e nun resta nisciuno.

E ppassarielle pàreno
ll’anne d’ ’a meglia età,
nun se fa a ttiempo a còglierle
ca so’ vvulate già.


(da Primma ca scura notte, 2009)

Serenatella fatta a vvino

 

Aggio scigliuto na canzona ’e voce

SERENATELLA FATTA A VVINO

di Claudio Pennino


Aràpeme na senga ’e ’sta fenesta,
e aràpeme d’ ’o core tutt’ ’e pporte;
quanno me vide abbascio famme festa,
e ccacce ll’oro ’a dint’ ’a casciaforte.

Pe ’st’occasione ncìgnete na vesta,
e ffatte bbella ca, mannaggia ’a morte,
stasera aggio purtato ’a meglia urchesta
e t’aggi’ ’a fà sentì nu piezzo forte.

Aggio scigliuto na canzona ’e voce
pecché già saccio c’ ’o ccantà te piace.
Si nun t’affacce mo, te metto ncroce:

te scasso ’e llastre, ’o ssà? Fatte capace.
E tanno m’ammanzisco e ttorno doce,
quanno te vutte abbascio pe ffà pace.


(da Primma ca scura notte, 2009)

Ce sta nu posto

Ce sta nu posto ca prufuma ’e rosa

CE STA NU POSTO

di Claudio Pennino

Ce sta nu posto ca prufuma ’e rosa,

quanno ce vaco stongo mparaviso;

llà sulamente ’o core s’arreposa

e se cunzola cu nu pizzo a rriso.

Chi ’o cerca nun ’o trova ncopp’ ê ccarte,

e, dint’ ê libbre, ognuno va sbarianno;

chi ce vo ì, è inutele ca parte,

ca nun ce stanno strate ca ce vanno.

E nun ce vonno vele o bastimiente,

ca, a chistu posto, nun se va pe mmare.

Cu ttutto ca nisciuno sape niente,

se nformano pe gghì ggente a migliare.

A chistu posto ca prufuma ’e rosa,

comme s’arriva ognuno ’o vvo sapé;

llà sulamente ’o core s’arreposa,

e i’ ce vaco quanno sto cu tte.

(da Primma ca scura notte, 2009)

Cu na faccella tonna, ride Ggiesù Bammino

LL’ADDORE D’ ’O NATALE

di Claudio Pennino

Spàrano dint’ ô vico:

sinò nun è Natale.

’A copp’a na fenesta,

s’appiccia nu biancale.

Dint’a na festa ’e luce,

se spanne attuorno e saglie

n’addore amarulillo

’e zurfo e fummecaglie.

Trase d’ ’a senga aperta

ca sta dint’ â cucina,

mmescànnose c’ ’addore

d’ ’o broro d’ ’a gallina.

Ncopp’a na vrasa, ’ntanto,

bruscia na pigna verde,

e nu prufumo ’e musco,

attuorno va e se sperde.

Natale! Na campana,

voce gentile e doce,

già sona ’a mezanotte:

e ce facimmo ’a croce.

Chesta manella toia,

’e marmo cepullino,

Ggiesù, comme prufuma

’e scorze ’e mandarino.

Cantano ’e pasturielle

ncopp’ ô presebbio: « È nnato! »

Allummano, ’e Rre Magge,

’o ncienzo prufumato.

Maria aspetta ’o figlio:

« ’A vi’ ca stenn’ ’e bbraccia? »

Tu ’o piglie e c’ ’a manella

te ll’accarizze ’a faccia.

E tutte quante ’e ccose,

nnant’a ’sta fantasia,

prufumano d’ammore,

pecché nasce ’o Messia.

Cu na faccella tonna,

ride Ggiesù Bammino,

e tutt’attuorno spanne,

n’addore ’e mandarino.

(da Primma ca scura notte 2009)

Pecché te voglio bene

ncimm’a na torre te vurria tené

PECCHÉ TE VOGLIO BENE

di Claudio Pennino

Pecché te voglio bene,

i’ te vuless’avé sulo pe me;

e comm’a na riggina,

ncimm’a na torre te vurria tené.

Pecché te voglio bene,

nun suppurtasse ’e te vedé nzerrata,

e t’arapesse ’a porta

e te dicesse: « Va, si’ libberata! »

Pecché te voglio bene,

i’ me t’annascunnesse ’int’a ’sta mano,

e te strignesse forte,

pe nun te fà vedé d’ ’o munno sano.

Pecché te voglio bene,

i’ me pentesse ’e chesta debbulezza,

e t’arapesse ’a mano,

e te facesse, doce, na carezza.

Pecché te voglio bene,

i’ t’attaccasse ’o core cu ’e penziere,

e cu catene d’oro,

e te tenesse comm’ ’e priggiuniere...

Ma doppo te sciugliesse,

e te dicesse: « Niente te trattene! »

Pecché facesse chesto?

’O vvuó sapé? Pecché te voglio bene.

(da Primma ca scura notte, 2009)

'E surdatielle

ca indiane e surdatielle,

erano frate e frate.

’E SURDATIELLE

di Claudio Pennino

Ncopp’ ê mmuntagn’ ’e carte,

pe terra, annascunnute,

ll’indiane ’a chesta parte,

cu ’e ffacce già tignute.

’A ll’atu pizzo “ ’e nuoste ”,

cu sciabbule e pistole,

ncopp’ ê cavalle, tuoste,

a ffila p’ ’e rriggiole.

E, indiano e surdatiello,

primm’ ’e pigliarse ’e mano,

parlavano, a penniello,

cu mme ’o nnapulitano.

E accumminciava ’a guerra:

n’esercito ’e surdate

accise, muorte nterra,

cu ’e piette spertusate.

E ’a fantasia vulava

pe mmiez’a ’sta battaglia;

ll’anema s’appicciava

comm’a nu fuoco ’e paglia.

.  .  .  .  .   .  .  .  .  .  .  .

Fernuta ’a iacuvella,

ferneva ’o serra-serra;

sunava ’a trummettella:

«Basta. È fernuta ’a guerra!»

E tutte ’sti surdate,

dint’a nu scatulillo,

venevano astipate,

chisto vicino a chillo.

E ’e surdatielle, tanno,

facennose capace,

redenno mo, e pazzianno,

turnavano a fà pace.

E dint’ ê scatulelle,

durmevano abbracciate:

ca indiane e surdatielle,

erano frate e frate.

(da Primma ca scura notte, 2009)

Si vuie m'addimannate

I’ songo chillu tale

ca guarda ancora ’o cielo

SI VUIE M’ADDIMANNATE

di Claudio Pennino

Si vuie m’addimannate:

« Ogge quant’anne hê fatte? »

I’ me ll’aggio cuntate:

so’ cinquant’anne esatte.

Ma si ’a copp’ ’a mano,

n’amico se ne vene

e, dint’ â recchia, chiano,

me fa: « Quant’anne tiene? »

Allora dint’a niente

nun songo cchiù sicuro,

e dico mmiez’ ê diente:

« Me sento nu criaturo! »

I’ songo ancora chillo

ca, ’ndifferentemente,

si vede nu sciurillo,

ncantato ’o tene mente.

Chillo ca ogne matina

se fa ’e castielle ’e ’naria,

e cerca ’int’ammuina

na vita sulitaria.

Ca tene sentimento

p’ ’e ffronne ’e copp’ â pianta,

e tanno è cchiù cuntento,

quanno n’auciello canta.

Ca prova tennerezza

p’ ’e mmane d’ ’e ccriature,

e vede ’int’ â munnezza,

’o munno cu ’e culure.

I’ songo chillu tale

ca guarda ancora ’o cielo,

e dice, o bene o male,

quaccuno ce ha dda stà.

E tremm’ ’int’ ê ddenocchie,

pecché comm’a scentelle

me restano ’int’a ll’uocchie,

’e lluce ’e tutt’ ’e stelle.

(da Primma ca scura notte, 2009)

Nun se leva cchiù...

’stu segno è sulamente

ammore e niente cchiù

NUN SE LEVA CCHIÙ

di Claudio Pennino

 Ad Arianna

Nfaccia tiene nu segno;

guardate dint’ ô specchio:

è ccomm’ a nu disegno

ca nun se leva cchiù.

Quase vicino ô musso

addó pare ca tiene

chillu melillo russo

ca bbella assaie te fa.

Si tu ce passe ’a mana

se sente sott’ ê ddete

comm’ a na filigrana

ch’è cchiù ’e na rarità.

Pare n’abbruciatura

’stu segno ca t’hê fatto

quann’ire na criatura,

e mmo sta ancora llà.

Renunzia, nun se leva,

haie voglia ’e lavà ’a faccia;

comme fosse na freva,

s’appiccia e vvo sfucà.

’O ssiente ’o ffuoco ardente?

’o vvire comm’abbruscia?

’stu segno è ssulamente

ammore e nniente cchiù.

È cchisto ’o primmo vaso

ch’aviste appena nata;

e ’a tanno llà è rrummaso

e nun se leva cchiù!

(da Primma ca scura notte. 2009)

I' so' cchillo...

I’ stevo ’e faccia e Isso appiso ô muro

I’ SO’ CCHILLO...

di Claudio Pennino

I’ stevo ’e faccia e Isso appiso ô muro:

« I’ so’ cchillo ca s’è scurdato ’e Te!

- dicette annascunnennome ’int’ ’o scuro -

e Tu, Tu t’arricuorde ancora ’e me?

I’ songo cchillo ca t’ha iastemmato

quanno ’e ccose nun ghieveno a dderitto.

E cchillo so’ ca, doppo, t’ha priato

quanno me so’ truvato dint’ ’o stritto.

Nzomma – cuntinuaie – i’ so’ cchillo

ca piglià se vuleva ’o posto tuio,

quanno nun saccio stà, nu pucurillo,

nemmanco ô pizzo mio, ca lasso e fuio.

E po’, comm’ommo, ’o posto tuio qual è?

Ncopp’a na Croce! Chisto è ’o trattamento?

Tu vide quanta presunzione. Embè,

faie buono si mm’abbrusce a ’stu mumento.

I’ so’ cchillo ca s’è scurdato ’e Te!

E Tu? Tu no. Tu me tenive mente.

Me purtave, senza te fà vedé,

quann’ero nu cecato mmiez’ â ggente.

E t’aggio ntiso quanno me parlave

e me sanave ’o core d’ ’e ppaure...

e t’aggio visto quanno mm’abbracciave

strignennome cu ’e mmane d’ ’e ccriature. »

(da Primma ca scura notte, 2009)

Vengo sempe addù te

vengo sempe addù te, ca te so’ figlio

VENGO SEMPE ADDÙ TE

di Claudio Pennino

                                                      a mia madre

Quanno nun saccio a chi cercà cunziglio,

o sulo si me sento cchiù scuntento,

vengo sempe addù te, ca te so’ figlio,

pe nu cunforto o pe nu giuvamento.

M’assetto a ll’ombra ’e chistu pizzo a riso

e me cunfesso cu na chiacchiariata,

e sempe tu me dice: « T’aggio ntiso! »

c’ ’a cèra assicurante ’e na guardata.

Zitta me siente e, chiano, ’a copp’ ô core,

i’ levo ’o piso amaro ’e ll’esistenza.

Ll’anema mia s’affaccia e trova fore

nu munno nuovo, senza cchiù patenza.

E aspetto ca tu dice na parola...

ma i’ ntenno ’o stesso chello ca nun dice:

me guarde, e cu ’sta faccia ca cunzola,

te rieste muta dint’a na curnice.

(da Primma ca scura notte, 2009)

Areto 'a porta nchiusa

M’accosto e guard’ ’a dint’ ’a mascatura

ARETO ’A PORTA NCHIUSA

di Claudio Pennino

Areto ’a porta nchiusa d’ ’a cucina,

’e vvote sento ’a voce ’e nu criaturo;

e sento ’e passe, ’e strille e n’ammuina,

ca nun ce stanno eguale, v’assicuro.

Corre p’ ’a casa, e port’ ’o buonumore,

’a resatella ’e chistu piccerillo;

e saglie e zompa e t’ ’a mette a rummore,

comme t’ ’o ssape fà nu diavulillo.

M’accosto e guard’ ’a dint’ ’a mascatura,

ma, chillo, nun sta fermo nu mumento;

se vede a malappena na figura:

ma ’o core già se sente cchiù cuntento.

Sento na voce ca, gentile, ’o chiamma,

e ’o piccerillo corre ’a chella via:

ah, comm’è bello a sentì ’a voce ’e mamma,

e chesta, nun me sbaglio, è mamma mia.

E allora voglio i’ pure trasì dinto:

« Arape, oi mà, sto’ ccà, sto’ aret’ â porta…»,

ma tu t’abbracce ’stu criaturo strinto

e ’e me ca stongo fore nun te mporta.

« Arape, oi mà, songo io ’stu galiota…»,

ma tu t’astrigne mpietto a chillu llà.

E i’ nun ’a trovo ’a chiave ca, ’sta vota,

arape ’a porta d’ ’a felicità.

(Primma ca scura notte 2009)

Nun ce sta legge

E nun c’è legge pe chi è nnammurato

NUN CE STA LEGGE

di Claudio Pennino

Nun ce sta legge pe chi sta mbriaco,

ca mentre è pasta ’e mèle, è malandrino;

e mmesca ’int’ ê pparole ’a ponta ’e ll’aco,

e quanno parla nun è isso: è ’o vino.

Nun ce sta legge manco pe chi è pazzo,

ca sempe sfrennesea e nun raggiona;

e mentre rire o te fa nu strapazzo,

chiagne sentenno ’e nnote ’e na canzona.

Nun ce sta legge pe chi tene famma,

ca sempe sta speruto e sfastiriuso;

e comm’ ’o piccerillo a ppiett’ â mamma,

strilla ca nun se sazzia e stà picciuso.

E nun c’è legge pe chi è nnammurato,

ca chi vo bbene è pazzo e malandrino,

e ’ammore nun ’o sazzia e stà stunato,

e pare nu mbriaco e ’un beve vino.

(Primma ca scura notte 2009)

Pe dint’ ’o pertusillo

veco ’e ciardine nsciore

’O PERTUSILLO

di Claudio Pennino

Se non diventi un bimbo,

non entrerai là dove sono i figli di Dio:

la porta è troppo piccola.

 A. Silesio

S’ha dda turnà criaturo,

hê ’a turnà piccerillo,

sinò nun ce passammo

pe dint’ ô pertusillo.

’E vvote faccio ’a prova

si casumaie ce passo:

ma chillo pare fatto

c’ ’a ponta d’ ’o cumpasso.

Pe dint’ ’o pertusillo

veco ’e ciardine nsciore

e ogne bene ’e Ddio:

na luce… nu splennore.

Na museca pe ll’aria

ca te sulleva mpiso…

Ggiesù che maraviglie

dint’a ’stu paraviso.

Ma pe passà ’o pertuso,

nun s’hann’avé paure:

ce vo’ ll’anema leggia

ca teneno ’e ccriature.

Chell’anema nnucente

cchiù ghianca d’ ’a culata,

pulita, cristallina,

ch’è sempe mmaculata.

E passe mare e munte,

e ’e pizze cchiù annascuse:

cu quatte zumpetielle,

tenenno ll’uocchie nchiuse.

Chesto ce vo’ e nient’ato

pe passà ’o pertusillo:

basta ca mpietto tiene

nu core ’e piccerillo.

(da Primma ca scura notte, 2009)

S' i' fosse campanaro

S’i’ fosse campanaro,

sunasse sempe a festa

S’I’ FOSSE CAMPANARO

di Claudio Pennino

S’i’ fosse campanaro,

sunasse a matutino,

scetanno, doce doce,

chi dorme a suonno chino.

Accumpagnasse â scola

guagliune e guagliuncelle,

ca iesseno cchiù allere

sentenno ’e ccampanelle.

S’i’ fosse campanaro,

sunasse a miezeiuorno,

e ’o suono s’allariasse

currenno tuorno tuorno.

Ognuno se fermasse

sentenno chella voce,

e, ringrazianno a Ddio,

po’ se facesse ’a croce.

S’i’ fosse campanaro,

sunasse tutt’ ’e ssere

dduie tocche liegge liegge

p’accumpagnà ’e penziere.

L’eco appaciasse ’e core,

mentre, ’int’ ê viche scure,

’e mmamme, d’ ’e barcune,

chiammasseno ’e ccriature.

S’i’ fosse campanaro,

sunasse sempe a festa

quanno tu t’affacciasse

rerenno a ’sta fenesta.

Tu me facisse segno

e i’ cchiù ncasasse ’a mana,

tanto ca ’o core mpietto

paresse na campana.

(da Primma ca scura notte, 2009)