Pasca rusata

Te porto tanta rose

PASCA RUSATA

di Ernesto Murolo

                        Sta venenno l’està !

Può arapì nu barcone, na fenesta,

ca ’o viento nun t’ ’e nzerra...

            Nu cchiù mare ntempesta,

            nuvole chiene d’acqua, viento ’e terra...

                        Sta venenno l’està !

Mo t’affacce e risciate, finalmente,

            n’aria cchiù doce

            ca fa cchiù allera ’a gente,

            ca fa cchiù allere ’e vvoce

            d’ ’e venneture e mette int’ ’e pparole

            d’ammore cchiù curaggio;

            ca fa pare Pusilleco

cchiù verde già, cu ’e ttavulelle pronte...

                        E che sole... che sole...

(Passa nu « quatto ’e maggio »

pe’ nu casino a Sant’Antonio ’o Monte...)

                        Sta venenno l’està !

’E vestite già pesano... ’E llenzole

già nfòcano... Nun è cchiù fredda, ’nfaccia,

l’acqua, ’a marina: mo a calore ’e sole,

scorre... e se fa cchiù fresca... e sguazzarià

—   cu ’a scumma d’ ’o ssapone —

te può, bellezza mia!... Già veco ’e braccia

—   nun appanna ’o balcone... —

veco sta mana chiattulella e nfosa

            fermà cu duie fernette

            sta trezza ancora nfosa,

nera e lucente comm’a nu gravone...

                        Benedetta l’està !

Ca si tu me perduone

e si m’aspiette,

facimmo tale e quale

comm’a Pasca passata...

                        (Pasca rusata !...)

Te porto tanta rose, e tutte ’e ffronne

tu dint’a st’acqua n’ata vota sfrunne,

            e te ce nfunne...

E sbracciata, addurosa, spettenata,

            sta vocca ca me sfuie, ca s’annasconne,

            tu te farrai vasà

            comm’a Pasca passata !...

                        (Pasca rusata !...)

                        Benedetta l’està !...

'O miercurì d' 'a Madonna 'o Carmene

’O MIERCURÌ D’ ’A MADONNA ’O CARMENE

di Ernesto Murolo

Chiove…

Cupa è ’a campana ’a chiesa ’o Carmene

stu miercurì d’ ’e muorte.

Fanghiglia e secatura tutt’ ’a chiesia,

gente ’nzeppata fino a sott’ ’e pporte.

E so’ femmene ’e dint’ ’o Lavenare,

neguziante ’e vascio ’a Cunciaria,

signore aristocratiche, pezziente,

ferrare ’e Sant’ Eligio, marenare,

femmene malamente

d’ ’o llario d’ ’e baracche e ’a Ferrovia...

E pe’ mmiez’ a sta folla ’e facce gialle,

scemunite pe’ guaie, miserie, schiante,

na tanfa ’e pezzecaglie e de sudore.

Guardano tutte quante

ncopp’ aldare maggiore,

addó, unu mass’ ’argiento,

mentre s’aspetta ’a Benediziona,

cu ll’organo ca sona,

luce, fra cere e ncienzo, ’o Sacramento.

E trase e ghiesce, ’a dint’ ’a sacrestia,

cumm’ a ffile ’e furmicole, ata ggente:

e chi se ferma nnanze ’a screvania

pe’ ffa di’ quacche messa a nu parente

e chi caccia ’o di’ sorde c’ ’o libretto

p’ ’a firma d’ ’a « semmana ’e ll’Abbetino »...

Veco a nu richiamato d’ ’o Distretto,

cu ’a lenta a ll’uocchie, ’e pile janche ’nfaccia,

cu ’a mugliera vicino,

cu nu figlio p’ ’a mano e n’ ato mbraccia.

Chi guarda, appesa ’o muro, na giacchetta,

na giacchetta ’e surdato,

c’ ’o pietto spurtusato

’a na palla ’e scuppetta.

E appiso ce sta scritto:

« Carotenuto Alfonzo,

invocando la Vergine, fu sarvo ».

Quacche femmena chiagne... N’ata... E n’ata:

s’è già furmata na prucessïona

nnanz’ ’a Cappella addó sta cunzacrata

’a Madonna ’mperzona...

Arde ’a Cappella p’ ’o calore e ’e ccere.

Veco sti mmure, attorno, cummigliate

’e ritratte ’e surdate:

guardie ’e finanza, muzze, bersagliere...

E ognuno ’e lloro tene ’a sora o ’a mamma

ch’ ’a vascio ’o guarda fisso

e chiagne... e ’o chiamma...

e dà n’uocchio ’a Madonna e n’ato a isso.

Quanta preghiere! Che scungiure! E quanta

vute, prumesse, lacreme! « Che buò?

(sta dicenno na femmena gravanta

nfaccia ‘a Madonna) ’a vita mia? t’ ’a do’...

Ma nun me fa murì pure a chist’ato

comm’ a chill’ ati dduie.

Tu t’ ’o tiene astrignuto ’o Figlio tuie!

’E miei me ll’hê luvate ’a sott’’o sciato! ».

« Ogne casa ’nu guaio! » dice na vecchia.

E chell’ ata cchiù forte: « Che buò cchiù?

Pe’ vvute e ccere, ’o bbì: vicino ‘a recchia

manco ’e ricchine, ’o bbì: me sto luvanno

’e scanne ’a sott’ ’o lietto... Che buò cchiù? »

(Chiagneno tutte quante... ’A puverella,

cu ’a voce cchiù abbrucata,

scaveza, arrampecata

p’ ’e ggrade addó sta ’o quadro, arditamente,

mo amminaccia ’a Madonna a tu per ttu.)

« Guardame a me, cu ttico sto parlanno... »

(’E spalle d’ ’a Cappella

’a folla ’e dint’ ’a chiesia vede... sente...

se move... sta spianno...)

« Cu ttico ll’aggio. Quanno fuie p’ ’a morte

’e Giesù Cristo ncroce, tu hê chiagnuto

na vita sana sana

e d’ ’e llacreme meie, nun te ne mporta?

Nun te mporta? ’Un te mporta?... »

(E cu ’e capille

sciuóvete, cumm’ ’a pazza, ha stesa ’a mano

e ha tuzzuliato nfaccia ’a lastra santa...)

Ma tutto nzieme ha dato tali strille

c’ ha revutata ’a chiesia tutta quanta:

« Chiagne – alluccava – chiagne: ll’uocchie nfuse,

’a lastra nfosa... ».

« È overo... »

                        « È overo... »

                                               « È overo... »

Nnanz’ a sta mana aperta e cunzacrata,

ca nisciuno ha tuccata,

doie, tre vvoce confuse

e po’ ciento... e po’ tutte:

« È overo! » « È overo!... »

Chiagne ’a Madonna... chiagne!... »