Alba e tramonto

Tu spanne attuorno n’aria ’e cuntentezza

ALBA E TRAMONTO

di Mario Sieyes

Tu... pare ll’alba ’e na jurnata ’e sole,

i’ nu tramonto che, poco ato e mmore;

tu... parle e songo ’e zucchero ’e pparole,

i’... me sto zitto e ttengo ’o ffele ’ncore.

Tu... vint’anne surtanto! I’, n’atu ppoco

e sso’ trasuto dint’ â cinquantina…

Tu... tutt’argiento vivo, tutta ffuoco...

i’ cu ’acchiara a ll’uocchie e ’a papalina.

Ma quanno vaje p’ ’a casa e traffechìe,

arricettanno o stanno ’int’ â cucina,

sempe cu ’o pizzo a rrisa e cu ppazzìe,

appena può llassà, mme staje vicina...

E trascenammo ’nzieme chesta vita!

Ma che rumanzo è cchesta vita nosta;

tu... nun vuò fà vvedè che si’ pentita...

ma sta finzione cara assaje te costa!

E rride e ccante... Povera figliola!

Tu spanne attuorno n’aria ’e cuntentezza

e invece... si’ n’auciello ’int’ â cajola...

che nu juorno ’ncappaje dint’ a na rezza!

Matenata

Na scolla ncopp’ ’e spalle ’e seta fina

MATENATA

di Mario Sieyes

Pe me scetà matino, na matina,

cu Rosa me ncuntraie ncopp’ ’a Nfrascata:

Era ’e settembre, e ll’aria settembrina

faceva doce e fresca ’a matenata.

Na scolla ncopp’ ’e spalle ’e seta fina,

na vesta ’e percallina trafurata,

uocchie ’e velluto e vocca curallina,

bella e gentile comm’a na pupata.

« Bongiorno! » lle dicette. Rispunnette

quase acalanno ll’uocchie a stu saluto,

e rossa comm’ ’o ffuoco se facette...

Mo ca sapite ’o fatto comm’è gghiuto,

ve voglio sulo dì: benedicette

chella matina ch’ero ’e pressa asciuto!

'O vino

Sapeva ’a lecca e ’a mecca ’e tutt’ ’e vine

’O VINO

di Mario Sieyes

Sapeva ’a lecca e ’a mecca ’e tutt’ ’e vine,

steva arracchiato tutt’ ’o santo juorno.

« Ll’acqua — diceva — nfracete ’e stentine

e i’ nun ne vevo pecche me fa scuorno ».

’A mugliera faceva uno taluorno,

sfucannese cu isso e cu ’e vicine,

ma chillo — tuosto — cu na faccia ’e cuorno,

jeva facenno cantine cantine.

Ma na matina male se sentette;

muorto ’e paura ’o miedeco chiammaie,

e ’o miedeco venette e ’o visitaie.

« Il male che vi affligge — lle dicette,

tastiannolo cu n’aria ’e circustanza —

è ca tenite ll’acqua dint’ ’a panza ».

Filosofia

ca cchiù nun torna chello ch’è passato!

FILOSOFIA

di Mario Sieyès

Si ’a vita è cchesta, amice, cunvenimmene

c’ ’o tiempo passa e ognuno se fa viecchio.

Niente malincunie, ch’è bene inutile,

levammo ’a miezo ’o calannario e ’o specchio.

C’ ’o cchiù ll’avimmo fatto, nun so’ chiacchiere,

chello ca vene se po’ di’ è truvato...

Ringraziammo a Ddio, capacitammece

ca cchiù nun torna chello ch’è passato!

Cercammo scusa a chi male facettemo,

aizammo ’a mano a chi ce fece tuorto.

’A ggente, si campammo rispettannela,

pur’essa ce rispetta doppo muorto...

E si ’e peccate è overo ca se scontano,

o songo poche o songo nu zuffunno,

quann’è ’o mumento, amice, cunfessammele,

e ghiammo cchiù liggiere a ll’atu munno!