'Stu tiempo

 

ca mo assapurammo ’int’ ’e vase

’STU TIEMPO

di Claudio Pennino


’Stu tiempo chi ’o ssape si dura;
’stu tiempo felice
ca nuie ce magnammo
comm’ acene d’uva;
’stu tiempo ch’è ’o nuosto
e nun ce appartene,
ca nuie astrignimmo
’int’ ê braccia cuntente,

’stu tiempo senzuso
ca mo assapurammo ’int’ ê vase.

Chi ’o ssape ’stu tiempo si dura,
o si dint’ a ll’uocchie
ce resta surtanto ’o ricordo
’e ’sti iuorne felice;
ce resta ’o calore ’e ’sti bbraccia astrignute,
e mmocca ’o sapore
d’ ’e vase perdute.


(da Acqua salata, 2019)

'A bbestia

 

Arresentuta, chella mmosta ’e diente

’A BBESTIA
 
di Claudio Pennino
 
 
 
Io tengo ncuorpo comm’ a n’animale
ca notte e gghiuorno me guarda ’int’ a ll’uocchie;
na bestia ca cuncerta sempe a mmale:
sulo si’ ’a guardo, tremmo ’int’ ê ddenocchie.
 
P’ ’a fà stà bbona, quann’ ’a tengo a ffianco,
lle mmocco fessarie ogni mmumento,
lle faccio vedé niro pure ’o gghianco,
e ’a dico ca a ’sta recchia nun ce sento.
 
Arresentuta, chella mmosta ’e diente,
ma i’ m’ ’a piglio comm’ a na resata.
E intanto ’a ggente nun ne sape niente
ca io campo cu na bbestia addubbechiata.
 
Pe cchistu fatto, campo mmiez’ ê bbotte,
penzanno a cchisà quale iuorno ’e chisto
se sceta ll’animale e... bbonanotte,
me magna sano sano e ttorna nzisto.

 
da Acqua salata, 2019

'Sti vierze so' 'e tuoie

 

e te sarranno ’e cumpagnia
quanno te siente sola

’STI VIERZE SO’ ’E TUOIE

di Claudio Pennino


’Sti vierze so’ ’e tuoie,
t’apparteneno.
Si’ ttu ca ’e ffaie nascere,
pirciò, tienele care,
e astipatille
dint’ ô core.

Songo parole cavere,
comm’ ’o ppane frisco;
e chiare comm’ ’e mmane
’e chi è nnucente.
So’ mmerecina franca
pe te curà e ssanà:
’sti pparole
t’arricurdarranno ’e me.

Te scarfarranno
’int’ ’e sserate fredde;
e te sarranno ’e cumpagnia
quanno te siente sola.

Sarranno ’e piede pe cammenà
e gghì luntano;
primma sarranno amare,
comm’ ’e nnespule acevere,
e po’ sarranno doce…

’Sti vierze so’ ’e tuoie,
t’apparteneno.
Si’ ttu ca ’e ffaie nascere,
pirciò, tienele care.


(da Acqua salata, 2019)

Na rosa ianca

Dint’ a ’sta mano, i’ lasso ’o core mio

 

NA ROSA IANCA

A Clarita

Tu duorme cunnuliata ’a ll’angiulille,

e, piccerella, ’sta manella aperta,

pare, dint’ a ’sta pace senza strille,

na rosa ianca ncopp’ a ’sta cuperta.

N’acquasantera addó, nzieme ê suspire,

trovano pace ’sti penziere nire.

Dint’ a ’sta mano, i’ lasso ’o core mio,

tu ca si’ ’a cosa cchiù vicina a Ddio.

(da Acqua salata, 2019)

'O cappiello

 

i’ mm’addenocchio... e mme levo ’o cappiello

’O CAPPIELLO

di Claudio Pennino



I’, quanno ’e ccose nun vanno adderitto,
vulesse fà nun saccio qua’ maciello;
ma po’ me tengo, ngotto, me sto’ zzitto...
e p’appaciarme... me metto ’o cappiello.

Si ncontro ’o fesso ca vo fà ’o saputo,
’o dongo spavo e ffaccio ’o macchiaviello:
« Vabbuó, comme vuò tu, chi ha avuto ha avuto...»
’o guardo nfaccia... e mme metto ’o cappiello.

Nu bbuono amico fa na mal’aziona?
io faccio cunto ch’è nu pazziariello
ch’ ’ha fatto na sparata o na canzona.
Lle dongo ’a mano e mme metto ’o cappiello.

Vene ’o parente e ttuzzulea a ddenare?
Nu preputente vo fà ’o capuzziello?
E si ’e mbrugliune sguigliano a mmigliare...
io pe rremmedio... me metto ’o cappiello.

Ma quanno veco a cchi se stenta ’a vita,
a cchi se magna pane e ccerasiello,
e ttene ’o core e ll’anema pulita,
i’ mm’addenocchio... e mme levo ’o cappiello.

(da Acqua salata, 2019)

Che fosse...

 

’A rena se scurdasse che so’ ll’onne

CHE FOSSE...

di Claudio Pennino


Che fosse chesta vita senz’ ’e te,
e, senz’ ’e te, dimme, che fosse ’o sole?
Che senz’avess’ ’a notte nera e ffuta,
e ’o iuorno appriesso, che schiarasse a ffà?

Ll’aucielle, ca mo volano p’ ’o cielo,
appucundrute stesseno p’ ’e ffronne.
’E sciure nun schiuppasseno â matina,
pecché ’a matina nun ce stisse tu.

’A rena se scurdasse che so’ ll’onne,
e ’o mare se quagliasse una vutata;
’e vvarche nun ascesseno d’ ’o puorto,
ca pure ’o viento nun sciusciasse cchiù.

Tutt’ ’e ffuntane d’acqua trasparente,
’a sete nun putesseno levà;
’o munno, perzo, trattenesse ’o sciato:
’o tiempo... se fermasse a t’aspettà.



(da Acqua salata, 2019)

Isso nun resta sulo

 

Ringrazio a Dio pe ’st’angelo guardiano

ISSO NUN RESTA SULO

di Claudio Pennino

    A Caludio jr.

Àveta è ’a notte. E ’int’a ll’oscurità,
i’ veglio pecché ’o suonno trica ancora.
’O piccerillo sta durmenno già,
e pare ’e cera cu ’e bbraccelle ’a fora.

E ce facimmo cumpagnia, ô scuro,
i’ e ll’angiulillo affianco â cunnulella
ca veglia ncopp’ ’o suonno ’e ’stu criaturo:
lle veco appena ’a faccia strattulella.

Ringrazio a Dio pe ’st’angelo guardiano,
ca, si mm’addormo, isso nun resta sulo.
’O veco quann’ ê vvote stenne ’a mano
e lle cummoglia ’e spalle c’ ’o lenzulo,

o quanno s’avvicina, ’int’ ’o chiarore,
pe lle vasà ’e ddoie manelle tonne;
’o sento quanno zitto ’o chiamma: « Ammore »,
mentre lle ntreccia na curona ’e suonne.

'O quatrillo

 

’O QUATRILLO
 
di Claudio Pennino
 
 
 
Ce sta dint’a nu vico abbandunata,
na cappelluccia cu na madunnella;
va trova qua’ pittore l’ha pittata
chella faccella accussì ffina e bbella.
 
Tene sempe na rosa ncopp’ ’altare,
ma nun se sape chi è ca va e ce ’a posa;
nisciuno maie se vede o ce accumpare,
ma tutt’ ’e iuorne llà ce sta na rosa.
 
È nu quatrillo antico nfacci’ ô muro
ca ’o tiempo ha sculurito e cancellato;
l’azzurro d’ ’o mantiello è accussì scuro
ca pare nu spetaccio cunzumato.
 
Pare na puverella ’sta Madonna
ca a mmalapena s’affigura ’a faccia;
chello ca è certo canta ’a nonnanonna
a nu criaturo ca s’astregna mbraccia.
 
Dint’a ’stu vico sempe chino ’e ggente,
passano tanta facce e tanta voce;
nu iuorno na sciurara, alleramente,
me s’accustaie cu na faccella doce.
 
Teneva nu panaro chino ’e sciure
e dint’a ll’uocchie ’a luce d’ ’a matina;
Spannenno attuorno ’a festa ’e ’sti culure,
sparette, comm’ ’o viento, ’int’ ’ammuina.
 
Mo quanno passo ’a veco chiara chiara
’a Madunnella cu ’stu piccerillo;
e veco ’a faccia doce d’ ’a sciurara
ca mo me guarda ’a dint’a ’stu quatrillo.
 
 
(da Acqua salata, 2019)

'A màscara

 

M’aggio levato ’a màscara e so’ sciso

’A MÀSCARA

di Claudio Pennino




I’ scengo cu na màscara ogni ghiuorno,
e mmiez’ ’a ggente fingo, nun song’io.
A ognuno i’ conto, cu na faccia ’e cuorno
mille buscie... Ddio ca nun è Ddio.

Si uno vo ca i’ rido, i’ rido e canto,
e chiagno pure si sto’ ’e buonumore;
ll’abbraccio e, mentre rido, asciutto ’o chianto:
e chiammo « frate » pure ’o traditore.

Ma ogge, stanco ’e tanta pucrisia,
aggio vuluto fà ’o galantommo.
« ’Sta vita mia ched’ è? è na buscia.
Basta! – aggio ditto – mo vogli’essere ommo! ».

M’aggio levato ’a màscara e so’ sciso:
« Cumpagne belle, amice, io ve saluto! »
Ggiesù, ve pare strano, a ll’impruvviso
manco n’amico m’ha ricanusciuto.



(da Acqua salata, 2019)

Dduie core

 

DDUIE CORE

di Claudio Pennino



M’hê lassato ’o core tuio
addó porto ’o fazzuletto,
quanno metto ’a mana mpietto
sento ’e fà: « Tu-tù, Tu-tù… ».

Dint’ ’o scuro sento ’e core
ca so’ dduie ma ne pare uno…
nun ’o ppò capì nisciuno
comm’è bello ’stu « Tu-tù... ».

Quanno ’e vvote ’o mio se ferma,
io nun smaledico ’a sciorte,
nun me fa paura ’a morte,
pecché ’o core fa: « Tu-tù... ».

Songo muorto? songo vivo?,            
faccio n’atu tentativo:
mpietto ’o core fa: « Tu-tù... »?
E so’ ccerto ca si’ tu!


(da Acqua salata, 2019)

Si t'avesse ncuntrato

quann’ancora cantavano ’e ssirene

SI T’AVESSE NCUNTRATO

di Claudio Pennino

Si t’avesse ncuntrato

quann’ancora cantavano ’e ssirene,

i’ mo fosse ncantato,

e ncatenato a tte senza catene.

Nun me fosse perduto

currenno appriesso ’e vierze d’ ’e ccecale,

ma t’êss’annascunnuto

comm’ ’a furmica astipa ’a preta ’e sale.

Si t’avesse cercato

comm’ ’e Re Magge scise a ll’Urïente,

réfula d’ ’o Criato,

tu mo fusse pe mme “ rosa d’ ’e viente ”.

(da Acqua salata, 2019)

Storia antica

se votteno ’int’ ’e bbracce una cu ll’ato

STORIA ANTICA

di Claudio Pennino

Tant’anne fa, ma chesta è storia antica,

dduie ggiuvene muretteno p’ammore.

Strazziate d’ ’a gnuranza e d’ ’a fatica,

seccaieno comme pò seccà nu sciore.

Maletrattate a nomme ’e na murale,

doppo ca fuieno nvita cuntrastate,

vicine, pe remmedio a tantu mmale,

venetteno atterrate e pò scurdate.

Ccà ce nascette n’arbero ’e cerase,

cchiù llà n’arbero ’e mele rosse e ttonne;

e quanno maggio vott’ ’a porta e ttrase,

ll’ammore, ancora mo, fa tremmà ’e ffronne.

E si p’ ’o cielo ’a luna è cchiù splennente,

comm’a nu suonno tiennero e ncantato,

’e nnammurate, appassiunatamente,

se votteno ’int’ ’e bbracce una cu ll’ato.

Nu triemmolo serpéa p’ogne frunnella,

ll’ammore ’e cchiamme, va truvanno ’e vase…

allora, isso ’a riala na melella,

e, essa, lle riala ddoie cerase.

(da Acqua salata, 2019)