'O mbrello

Ce canuscetteme

sott’ a nu mbrello

’O MBRELLO

di Roberto Bracco 

Venette a chiovere

e na figliola

ieva nfunnennese

p’ ’a strata, sola.

- « Pe nun ve nfonnere, » -

le dicett’ io -

« nenné, vulisseve

stu mbrello mio? »

- « Sì, ma purtatele

sempe vuie ’mmano;

si no, crediteme,

nun resta sano. »

Chillu delluvio

comm’era bello!...

Ce canuscetteme

sott’ a nu mbrello.

- « Nenné, diciteme

addò abitate. »

- « Sto ffora Napule

ve spaventate? »

- « Arrepusammece

a casa mia... »

- « Gniernò, truvammece...

na tratturia. »

E cammenavemo,

strinte, a bbraccetto...

Che cosa tennera!

Che cuscinetto!...

Chillu delluvio

comm’era bello!...

Ce canuscetteme

sott’ a nu mbrello.

Mentre parlaveme

cu nu trattore,

facette ’a spruceta,

cagnaie culore.

Ma chillu scrupolo

po’ le passaie

appena ’ntavola

nce se chiammaie.

E quanno, all’urdemo,

’o sole ascette,

dicenno: grazzie!

se ne fujette.

Pe stu pazzuoteco

sole schiattuso,

restaie guardanneme...

’o mbrello nfuso.

Nott' 'e Natale

« Gesù è nato » - suspira essa

NOTT’ ’E NATALE

di Roberto Bracco

Na purticella nchiusa. Na suffitta

vascia che par’ ’e chiummo. Quatto mura

ammuffute. Nu poco ’e sciamma affritta

nnanz’ ’a Madonna. Attuorno, ll’aria scura.

Dorme Carmela, sola, dritta dritta,

ncopp’ a nu lietto ’e paglia... Che paura

’nzuonno!... Se sceta. ’O viento e ’a pioggia fitta

fanno tremmare ’a porta e ’a mascatura.

Po’ na zampogna luntana luntana;

cchiù ttarde cierti spare rintrunante

e, a lluongo a lluongo, nu suono ’e campana.

« Gesù è nato » - suspira essa, guardanno

vicin’ ’o lietto ’a cònnola vacante

addó ll’è muorto n’angiulillo ’e n’anno.