Primmavera

Ogge - vintuno ’e marzo - è Primmavera

PRIMMAVERA

di Giovanni Panza

Viénece, bella mia,

pe’ sta muntagna tutta verde e nfosa...

Fore ’a malincunia!

Ogge - vintuno ’e marzo - è Primmavera.

Te voglio, comm’a pprimma, allera, allera!

Saglimmo chianu chiano.

Te farrà bene st’aria matutina.

Viénece... damme ’a mano...

’A llà guardammo, abbascio, ’o campanaro

cu ’a cchiesa janca, all’urdemo felaro.

E po’ scennimmo ancora

p’ ’o vallunciello, addó, pe’ l’ombra fresca

’a viuletta addora,

addó scénneno ’e miérole a pprimm’ora

addó cchiù doce ’ammore s’assapora...

Guarda: ogne ramo già ha cacciato ’o sciore.

Viénece, bella mia...

Addio, stagione!

E ’a sera, ’o ssaccio, tu te miette a ccosere

ADDIO, STAGIONE

di Giovanni Panza





Mo c’accummencia a fà frischetto, è inutile,
nun putimmo sta cchiù fore ’o balcone.
E ’a sera, ’o ssaccio, tu te miette a ccosere.
Addio, serate belle d’ ’a stagione!...
Addio, serate ’e luna!

Già mmiez’ ’o vico nun se vede n’anema,
quanno ce salutammo ca te lasso.
Comme fa notte, ’a gente se ne traseno,
addò ch’io nun putevo dà nu passo
senza di’: « Permettete...» ?

E ’a copp’ ’e mmura d’ ’e ciardine volano
’e ffronne secche. Addio, addio stagione!
Tu ’a sera cuse e i’ me ne vaco, ’o ssoleto,
cu ’e panne chine ’e nippole ’e cuttone,
cchiù triste e cchiù nguttuso.

Arietta 'e stagione

E me piace chill’addore

nfuso, ’e terra, risciatà

ARIETTA ’E STAGIONE

di Giovanni Panza

E me piace quacche vota,

dint’ ’o fforte d’ ’a stagione,

vede ’o tiempo ca s’avota

tutto nzieme, sentì ’e tuone...

vedè l’aria farse scura,

mentre ’e ppiante ’e strate, ’e ccase

’e cculate ’e panne spase

fanno ’a faccia d’ ’a paura...

E me piace ’e vedè ’o viento

ch’arravoglia ’e ffronne, ’e ccarte

sotto ’o muro, nu mumento,

e s’ ’e pporta a n’ata parte.

’E vedè nfonnere ’e tteste

quanno, ’e botto, ll’acqua cade:

’e vedè ch’ ’a ggente abbada

a nzerrà porte e feneste.

E me piace chill’addore

nfuso, ’e terra, risciatà,

ca me fa sentì ’o sapore

’e ll’Autunno int’a ll’Està.