Ntalliarse

 

e, invece, io voglio ’auciello guvernà

NTALLIARSE
di Claudio Pennino
 
 
Doppo curruto pe na vita sana,
chisto è ’o mumento, mo, ’e rallentà;
’a vita scorre comm’acqua ’e funtana,
e nun ce stanno mezze p’ ’a fermà.
 
Me piace mo ’e fà ’e ccose senza pressa:
starme mez’ora ’a barba a nzapunà...                       
ca sinò ’a vita passa ampressa ampressa,
e, invece, io voglio ’auciello guvernà.
 
Nun corro cchiù, me faccio ’e ccammenate,
arracquo ’e ppiante e mme metto a siscà...
e ffermo ’o tiempo p’allungà ’e gghiurnate,
passanno ll’ore sane a mme ntallià.

© Claudio Pennino, 2026