Pure ’int’ ô suonno

 

e ttu me viene nzuonno n’ata vota.

PURE ’INT’ Ô SUONNO

di Claudio Pennino

 
 
 
Me vuò venì ’int’ ê suonne? E vviene pure!
Cchiù certo ’e che me truvarraie durmenno.
Nemmanco ’e suonne cchiù songo sicure,
e nun capisco che sta succedenno.
 
Me vulesse addurmì sazio e sicuro,
senza penziere, comm’a nu criaturo;
ma nzerro ll’uocchie, ’o munno s’arrevota,

e ttu me viene nzuonno n’ata vota.

Felicità

 

Dimme addó staie, primma ca esco pazzo.

FELICITÀ
 
 di Claudio Pennino

A cce penzà me sto’ ffacenno sicco.
Te corro appriesso comm’ a nu ferlocco.
Sto’ ddisperato e mme credevo ricco...
Stenno na mana e ppare ca te tocco.
 
Areto a tte, comm’ a nu cane ’e pezza,
me so’ arredutto peggio ’e nu pupazzo.
Addó te cerco, ncielo o ’int’ â munnezza?
Dimme addó staie, primma ca esco pazzo.
 
 

(da Villanelle, 2016)

Cacciano ll'ore 'e iuorne

 

nun c’è cche ffà, accussì ggira ’o munno

CACCIANO LL’ORE ’E IUORNE

di Claudio Pennino
 
 
Cacciano ll’ore ’e iuorne, e ’e iuorne ’e mise,
e cchiste, male a nnuie, cacciano ll’anne.
Tutte quante a nu filo stammo appise,
chine ’e paure e càrreche d’affanne.
 
’A primmavera more e trase autunno,
nun c’è cche ffà, accussì ggira ’o munno:
tu pienze ’e restà bbella eternamente,
ma manco ’o specchio cchiù te tene mente.
 
© Claudio Pennino

'A corza d' 'o destino

 

e sempe corre pe se vuttà a mmare

’A CORZA D’ ’O DESTINO
 
di Claudio Pennino
 
 
 
I’ nun capisco, ê vvote, chilli tale,
ca vonno cagnà ’a corza d’ ’o destino;
e vvonno, manco fosse n’animale,
metterce ’e rretenelle e ’o cullarino.
 
S’affannano na vita sana sana,
senza truvà nu pucurillo ’e pace;
’o vonno afferrà strinto ’int’ a na mana,
quanno nisciuno è stato maie capace.
 
E ssongo pazze. Pazze sulamente.
Ca nun s’è mmaie vinciuta chesta mpresa.
Chillo, ’o destino, scorre ndifferente,
comm’ a nu sciummo ca sta ncopp’ â scesa.
 
S’allarga e ccresce pe mmiez’ ê ccampagne,
e s’arravoglia, e sbroglia ll’onne chiare,
e nun ’o ferman’argene e mmuntagne,
e sempe corre pe se vuttà a mmare.

Voglio murì

 

’o iuorno ca nun dice na bbuscia.

VOGLIO MURÌ

di Claudio Pennino

Voglio murì quanno se secca ’o mare,

quanno p’ ’o cielo spontano ddoie lune;

quanno ’e ccerase mmocca sann’ ’amare,

e a Nnapule nun nasceno mbrugliune.

Voglio murì quanno se stuta ’o sole,

quanno p’ ’e viche nun ce so’ llenzole...

voglio murì, tu vi’ che fantasia,

’o iuorno ca nun dice na bbuscia.

Claudio Pennino © 2025

Tutte le r

Quando lo viso tuo

 

Quando lo viso tuo io tengo mente

QUANDO LO VISO TUO

di Claudio Pennino

(A imitazione dantesca)

Quando lo viso tuo io tengo mente,

me sento come da demonio preso,

e drento al foco ardere eternamente,

come se all’inferno io fussi sceso.

Lingue di foco bruciano lo petto

che consumando stanno lo mio core;

e chieggio, per sanarme, un po’ d’affetto,

se tu non vuoi, per certo, che io more.

Doname come acqua lo tuo bene,

che solo amor lo foco pò stutare;

e se deggio morire e me convene,

drento lo bene tuo voglio affocare.

Claudio Pennino © 2025

Si nun fusse tu...

 

Tremma, pe tte, stu core mio malato

SI NUN FUSSE TU

di Claudio Pennino


Si sento ’e tuzzulià trattengo ’o sciato:
accosto ’a recchia e ssento nu sciu sciù.
Tremma, pe tte, stu core mio malato:
tengo paura... e si nun fusse tu?

Tengo paura ’e m’addurmì ddoie ore:
mo st’ uocchie mieie nun se nzerrano cchiù;
ca si m’addormo e nzuonno vene ’ammore,
tengo paura... ca nun fusse tu.


Claudio Pennino © 2025

'A cucciulella

 

Aggio truvato a mmare, nterr’ â rena

’A CUCCIULELLA

di Claudio Pennino

Aggio truvato a mmare, nterr’ â rena,

na cucciulella ’e matrepperla e oro;

dinto ce sento ’a voce ’e na sirena

ca sempe dice: «Viene, io pe tte moro!»

E i’ so’ vvenuto pe truvà sullievo,

mmiez’ ê ttempeste... fino a ll’Urïente...

so’ gghiuto a ffunno e ancora te sentevo:

«Viene, ca i’ pe tte moro...» e po’ cchiù nniente.

(da Villanelle, 2016)

'Stu tiempo

 

ca mo assapurammo ’int’ ’e vase

’STU TIEMPO

di Claudio Pennino


’Stu tiempo chi ’o ssape si dura;
’stu tiempo felice
ca nuie ce magnammo
comm’ acene d’uva;
’stu tiempo ch’è ’o nuosto
e nun ce appartene,
ca nuie astrignimmo
’int’ ê braccia cuntente,

’stu tiempo senzuso
ca mo assapurammo ’int’ ê vase.

Chi ’o ssape ’stu tiempo si dura,
o si dint’ a ll’uocchie
ce resta surtanto ’o ricordo
’e ’sti iuorne felice;
ce resta ’o calore ’e ’sti bbraccia astrignute,
e mmocca ’o sapore
d’ ’e vase perdute.


(da Acqua salata, 2019)

Guapparia

 

« T’affonno!… Quant’ è ccerta mamma mia! »

GUAPPARIA
 
di Claudio Pennino
 
 
                                               Al valentuom caduto ogni villano
                                               fassi addosso e l’insulta e lo calpesta.
 
                                                                           Sentenza indiana
 
 
 
 
Nu ruospo appaurato ’a n’elefante,
pe se salvà zompa ’int’ a nu pantano,
e, annascunnuto bbuono mmiez’ ê ppiante,
torna a ppiglià culore chianu chiano.
 
Pe farse na bbevuta, l’elefante,
corre mmiez’ ô pantano alleramente,
se scorda, ’stu chiattone, ca è ppesante,
e se ne scenne nfunno lentamente.
 
Ascenno, allora, fora ’o bbuffunciello,
sicuro ’e fà na scicca guapparia,
dice, zumpanno ncuoll’ ô puveriello:
« T’affonno!… Quant’ è ccerta mamma mia! »
 
 
 
(da Vela ’e penziere, 1999)

Presentimento

 

’A morte vene e mme so’ ppriparato

PRESENTIMENTO

di Claudio Pennino
 

’A morte vene e mme so’ ppriparato.
Tengo ’o presentimento e nun me nganno,
ca p’ ’e turmiente e ’e ppene ca mm’hê dato,
sicuro murarraggio ’e nu malanno.
 
E mmurarraggio certo disperato:
m’hê ntussecato e ssaccio comme e qquanno;
teneveno ’o sapore d’ ’e ccerase:
era veleno… e ttu ’e cchiammave vase!

 
(da Villanelle, 2016)

Parlanno cu n'auciello

 

Ce sta n’aucelluzzo mmiez’ ê ffronne

PARLANNO CU N’AUCIELLO

di Claudio Pennino



Ce sta n’aucelluzzo mmiez’ ê ffronne
ca ’o iuorno sano s’ ’o passa cantanno;
si ê vvote ’o chiammo pare ca risponne:
« Zzuì! Zzuì! » chi sa che va ammaccanno.

I’ spisso, quann’ ’o sole nfoca ’e ccase,
sott’ a ’sta pianta vengo a cercà ’o ffrisco;
e ccà me resto, anfì ca ’un se ne trase,
parlanno a cchist’auciello cu nu sisco.

Sbareo c’ ’a capa, e ppenzo â vita nosta:
« Ched è ca cerco e ca me dà ’st’affanne? »
S’affollano ’e penziere e na risposta
nun trovo ancora mo, doppo tant’anne.

Cchiù ll’ombra scenne e cchiù m’ammanca ’o sciato.
Comme si fosse ’o meglio cumpagniello,
dint’ ô silenzio, comm’ a nu stunato,
i’ sulo chiacchiareo cu cchist’auciello.

E ’a miez’ ê ffronne cchiù ntricate e nnere,
isso risponne... placeto e ffelice,
e ttene na risposta a ’sti penziere...
ma i’ nun capisco chello ca me dice.
 

(da Primma ca scura notte, 2009)