Guapparia

 

« T’affonno!… Quant’ è ccerta mamma mia! »

GUAPPARIA
 
di Claudio Pennino
 
 
                                               Al valentuom caduto ogni villano
                                               fassi addosso e l’insulta e lo calpesta.
 
                                                                           Sentenza indiana
 
 
 
 
Nu ruospo appaurato ’a n’elefante,
pe se salvà zompa ’int’ a nu pantano,
e, annascunnuto bbuono mmiez’ ê ppiante,
torna a ppiglià culore chianu chiano.
 
Pe farse na bbevuta, l’elefante,
corre mmiez’ ô pantano alleramente,
se scorda, ’stu chiattone, ca è ppesante,
e se ne scenne nfunno lentamente.
 
Ascenno, allora, fora ’o bbuffunciello,
sicuro ’e fà na scicca guapparia,
dice, zumpanno ncuoll’ ô puveriello:
« T’affonno!… Quant’ è ccerta mamma mia! »
 
 
 
(da Vela ’e penziere, 1999)

Presentimento

 

’A morte vene e mme so’ ppriparato

PRESENTIMENTO

di Claudio Pennino
 

’A morte vene e mme so’ ppriparato.
Tengo ’o presentimento e nun me nganno,
ca p’ ’e turmiente e ’e ppene ca mm’hê dato,
sicuro murarraggio ’e nu malanno.
 
E mmurarraggio certo disperato:
m’hê ntussecato e ssaccio comme e qquanno;
teneveno ’o sapore d’ ’e ccerase:
era veleno… e ttu ’e cchiammave vase!

 
(da Villanelle, 2016)

Parlanno cu n'auciello

 

Ce sta n’aucelluzzo mmiez’ ê ffronne

PARLANNO CU N’AUCIELLO

di Claudio Pennino



Ce sta n’aucelluzzo mmiez’ ê ffronne
ca ’o iuorno sano s’ ’o passa cantanno;
si ê vvote ’o chiammo pare ca risponne:
« Zzuì! Zzuì! » chi sa che va ammaccanno.

I’ spisso, quann’ ’o sole nfoca ’e ccase,
sott’ a ’sta pianta vengo a cercà ’o ffrisco;
e ccà me resto, anfì ca ’un se ne trase,
parlanno a cchist’auciello cu nu sisco.

Sbareo c’ ’a capa, e ppenzo â vita nosta:
« Ched è ca cerco e ca me dà ’st’affanne? »
S’affollano ’e penziere e na risposta
nun trovo ancora mo, doppo tant’anne.

Cchiù ll’ombra scenne e cchiù m’ammanca ’o sciato.
Comme si fosse ’o meglio cumpagniello,
dint’ ô silenzio, comm’ a nu stunato,
i’ sulo chiacchiareo cu cchist’auciello.

E ’a miez’ ê ffronne cchiù ntricate e nnere,
isso risponne... placeto e ffelice,
e ttene na risposta a ’sti penziere...
ma i’ nun capisco chello ca me dice.
 

(da Primma ca scura notte, 2009)

N'angiulillo

 

N’ANGIULILLO
 
di Claudio Pennino
 
                       
 
 
Tenimmo tuttequante n’angiulillo
ca veglia e ce cunziglia ore e mmumente,
cu ’e scelletelle, tunno e rricciulillo,
ce vola ’int’ ê penziere alleramente.
 
Si ce purtammo bbuono, cu ’a resella,
isso accunsente e ce porta p’ ’a mana.
Quanno nascimmo scenne da na stella,
e, nzieme a nuie, se sta na vita sana.
 
E ce accumpagna pe scanzà ’e malanne,
facenno luce addó truvammo ’o scuro,
e, pure si campammo cchiù ’e cient’anne,
isso rummane sempe nu criaturo.

da Vela 'e penziere, 1999

'O fummo

 

Mm’appiccio ’a pippa e ffumo alleramente…

’O FUMMO

di Claudio Pennino




Spaparanzato dint’a na pultrona,
io guardo fora comme votta ’o viento...
Nu viecchio ca secuta nu cappiello...
nu mbrello ca se smerza... nu lamiento...

Po’ guardo ’o ffuoco ca se va stutanno...
vaco a mmenà na vranca ’e ggravunelle:
’o smovo ’a sotto e ’o ffaccio piglià père,
mentre me magno quatto pastarelle.

Po’ torno a mme menà dint’ ’a pultrona...
Mm’appiccio ’a pippa e ffumo alleramente…
e ’o fummo saglie e ppare ca me dice:
«Ah, comm’ è bbello a stà senza fà niente!»

(da Vela ’e penziere, 1999)

Si nu iuorno tiene ggenio 'e chiagnere

 

Si nu iuorno riesce a tte ne fuì

SI NU IUORNO TIENE GGENIO ’E CHIAGNERE

                                            da Gabriel Garcia Marquez

Si nu iuorno tiene ggenio ’e chiagnere, chiammame:
nun te prumetto ca te faccio ridere,
ma pozzo chiagnere nzieme a tte...
Si nu iuorno riesce a tte ne fuì,
nun te trattené a mme chiammà:
nun prumetto ca te cerco ’e rummané,
ma putarraggio fuì nzieme cu tte...
Si nu iuorno nun tiene ggenio ’e parlà cu nnisciuno,
chiammame: ce ne stammo zitte...
Ma si nu iuorno me chiammarraie e io nun te risponno,
viene addu me currenno:
pecché sicuramente avarraggio bbisogno ’e te!

© Claudio Pennino, 2023

Cunfessione

 

Ma ô cunfessore tu ll’hê fatto abbate

CUNFESSIONE

di Claudio Pennino




Ma che ce vaie a ffà a ddo cunfessore?
’o pover’ommo ch’ ha dda fà, te sente…
ca sempe ha dda sentì ’o peccatore
quanno sinceramente va e se pente.

Ma ô cunfessore tu ll’hê fatto abbate,
e ll’annascunne ’o mmeglio d’ ’e peccate.
E può ffà fesso ’o prevete in eterno,
ma nun ’o può ngannà ’o Pateterno!




© Claudio Pennino, 2023

Staggiona

 

mo va cercanno ’o ppucurillo ’e viento

STAGGIONA

di Claudio Pennino

Meza spugliata, zappa ’a pacchianella,

ca cavero mo fa dint’ â staggiona;

mmiez’ â campagna, sott’ â calantrella,

se sciacqua ’a faccia dinto a nu mellone.

Nfucata, comm’ a strega ’e Beneviento,

mo va cercanno ’o ppucurillo ’e viento;

cu ’e ccosce ’a fora e ’a cammesella aperta,

se ncanta a la guardà pure ’a lacerta.

© Claudio Pennino, 2023

Pazzianno

 

hê ditto: «Chist’ ammore, è na pazzìa!»

PAZZIANNO

di Claudio Pennino

È stato pe pazzìa, e ’int’ â pazzìa

m’he ditto ’e bbello: «Tu si’ ’a vita mia!»

E ssempe pazzïanno io t’aggiu ditto:

«Chello ca si’ pe mme, te ll’aggiu scritto».

E âmmo pazziato comm’ a dduie criature,

nzerranno ’e core ’int’ a ddoie mascature:

tenive ’a chiave tu d’ ’o core mio,

chella d’ ’o core tuio ’a tenevo io.

Senza capì ’a pazzìa, t’aggio creduta:

si’ stata ’a mia, però nun t’aggio avuta.

E ssempe pazzianno, vita mia,

hê ditto: «Chist’ ammore, è na pazzìa!»

Ma io facevo overo e ttu pazziave,

e dint’ a ’sta pazzìa tu me mparave

ca chi resta criatura e... pazziarella,

penza ca ’o core ’e ll’ate è na pazziella.

© Claudio Pennino, 2023

Dint' 'a vita mia

 

russo ’e russetto, sanguina nu vaso

DINT’ ’A VITA MIA


di Claudio Pennino




E ssi’ ttrasuta dint’ ’a vita mia
zitta e ssicura comm’ a nu curtiello.
Accorta e ddoce comm’ a na buscia…
arresuluta comm’ a nu martiello.

E ssi’ ttrasuta dint’ a cchesta vita
e mm’hê lassato nfaccia na ferita:
lucente e vvivo, comme fosse ’e raso,
russo ’e russetto, sanguina nu vaso.




(da Vela ’e penziere, 1999)

Bella Mbriana

 

BELLA MBRIANA

di Claudio Pennino



Bella Mbriana mia, bella Mbriana,
ca d’ ’a felicità si’ ’a primma fata,
dimme pecché, na vita sana sana,
p’ ’a strata mia nun t’aggio maie ncuntrata?

Bella Mbriana mia, famme capace,
’a gente dice ca tu si’ cecata;
dimme na cosa, si nun te dispiace,
comm’ è ca tutt’ ’a vita m’hê scanzata?

Da Villanelle, 2016

Mobbele antiquato

 

mo, comm’ a ccierti mobbele antiquate

MOBBELE ANTIQUATO

di Claudio Pennino
 
 
 
E finalmente, ’o vvi’, c’îmmo lassate:
’st’ammore, ca faceva mmiria ê sante,
mo, comm’ a ccierti mobbele antiquate,
nun va cchiù ’e moda, s’è ffatto ingombrante.

P’ ’o sestimà facive ’o pare e sparo,
e ogni vvota m’ ’o cagnave ’e posto:
sempe cchiù areto, sempe cchiù nascosto…
finché nun ce l’hê dato ô sapunaro.
 
 
 
© Claudio Pennino 2023