Natale

Appicciate sule ’e bbengale

comme sona « la mezanotte »

NATALE

di Rocco Galdieri

Piccerille, che ghiate a’ scola,

piccerille, ca nun ce jate.

Si tenite chi ve cunzola

o site sule e abbandunate...

Si tenite tutte vicine,

o tenite tutte luntane...

si sperite ’nnannze ’e vvetrine

o, redenno, sbattite ’e mmane...

Piccerille, pe’ ’stu Natale

nu’ sparate tracche né botte...

Appicciate sule ’e bbengale

comme sona « la mezanotte ».

Nun sapite Gesù c’ ha ditto

primm’ ’e scennere ’a cielo ’ntrerra?

« Nu’ sparate! Stateve zitto...

ca già tanto se spara ’nguerra! »

Na dummeneca passa

Chist’ arbere ’e Furia c’ ogne anno, ogne anno,

cchiù s’abboccano ’ncopp’ ’o marciappiere

NA DUMMENECA PASSA

di Rocco Galdieri

’Na dummeneca passa e ’n’ ata vene,

e tutte ’o stesso e tutte tale e quale!

’I’ quant’ accunte c’ ’o barbiere tene!

’I’ quanta folla ’int’ a dd’ ’o spezziale!

’E tramme chine... ’E ccarruzzelle chiene...

Passano ’a princepala e ’o princepale,

che vanno a’ messa e apparo apparo vanno.

Passa ’o culleggio... Duie carabiniere...

’Na serva cu’ ’na guardia duganale,

ca s’alliscia ’o mustaccio e ca passanno,

se mmira ’int’ ’a vetrina d’ ’o barbiere.

Gente che vene e va senza penziere,

sott’ all’arbere ’ncopp’ ’o marciappiere...

(E ’st’ arbere ’e Furia c’ogne anno, ogne anno,

cchiù s’ acalano ’ncopp’ ’o marciappiere,

ma cchiù verde e cchiù morbede se fanno...)

’E tramme chine... ’E ccarruzzelle chiene...

Cchiù giovene esce ’accunto d’ ’o barbiere...

Cchiù cresce ’a folla ’int’ a dd’ ’o spezziale!

E comme addora ’sta pasticciaria!

’Na dummeneca passa e ’n’ ata vene,

e tutte ’o stesso e tutte tale e quale

pe’ me... che guardo ll’arbere ’e Furia!

Chist’ arbere ’e Furia c’ ogne anno, ogne anno,

cchiù s’abboccano ’ncopp’ ’o marciappiere,

cchiù verde e malinconeche se fanno!

Alleramente...

I’ mo’ già penzo che sarrà ’sta vita

ALLERAMENTE…

di Rocco Galdieri





Me ne vogl’ì’, cantine cantine,
pe’ copp’ ’o Campo, a Pucerïale.
Voglio campà cu’ ’e muorte pe’ vvicine…
ca nun sanno fa’ male.
Nu’ pàrlano… Nu’ càntano… So’ buone…
E so’ ’e meglie inquiline:
so’ chille ca nu’ pavano pesone!

Là m’affitto, cu’ poche denare,
’na cammarella pe’ me surtanto.
Che mme ne ’mporta ca nun veco ’o mare?
M’abbasta ’o campusanto!
Amice? No! M’aggia fa’ chiatto e ttunno:
ll’amice, ogge, so’ rare.
Sulo… quacche cucchiere ’e Bellumunno.

Si vene, ’a sera, pe’ ’na partita,
sia benvenuto. ’Nu litro ’e trenta.
I’ mo’ già penzo che sarrà ’sta vita,
ca mme chiamma e me tenta!
Vevo e dormo e nisciuno me ’ncuieta…
E all’ora stabilita,
canta ’na ciucciuvettola e mme sceta!

I’ nun me voglio piglià veleno…
Addio, canzone, ca so’ turmiente!
Voglio sentere ’a pala ’int’ ’o tturreno;
’o chianto d’ ’e pariente…
E quanno vene ’a morte ’a parta mia,
faccio ’e ll’esequie ammeno:
m’ ’o ffaccio appere… ch’è ’nu passo ’e via!

Chella che lle piacevano 'e cunfiette

ricca e smargiassa ’ncopp’ ’o bagarino,

ch’ ’e pperne ’a recchia e carreca ’e lazziette

CHELLA CHE LLE PIACEVANO ’E CUNFIETTE

di Rocco Galdieri

Chella che lle piacevano ’e cunfiette

e rusecava sempe cannelline,

e teneva ’e capille accussì fine

ca s’ ’aveva appuntà tutt’ ’e mmatine

cu’ ’nu mazzo ’e ferriette…

                                   nun l’aggiu vista cchiù…

Aggio ’ncuntrato ’a rossa, mmaretata,

ricca e smargiassa ’ncopp’ ’o bagarino,

ch’ ’e pperne ’a recchia e carreca ’e lazziette,

cuntenta e amata,

sudisfatta ’e tenè ll’ommo vicino,

ch’essa aveva aspettato pe’ destino

                                   tutta ’na giuventù…

Chella che lle piacevano ’e cunfiette

                                   nun l’aggiu vista cchiù.

Aggiu ’ncuntrato, cu’ ’na piccerella

p’ ’a mano, comme a essa, malatella,

’a bionda. Ch’ i’ tremmavo ca mureva!

Ca se n’avetta j’ ’ncopp’Arenella

pe’ via c’ ’a sera lle veneva ’a freva…

Ca me diceva: Lassame… c’aspiette?

E teneva ’na tosse, ’a puverella,

ma nun vuleva manco ’nu sciusciù.

Chella che lle piacevano ’e cunfiette

                                   nun l’aggiu vista cchiù.

Aggiu ’ncuntrato tutte ’e nnammurate!

’E cchiù luntane, ’e cchiù luntane e antiche…

’E ccanuscenze vecchie, ’e bbone amiche,

a una a una tutte ’aggiu ’ncuntrate…

Chella che me faceva cchiù dispiette,

chella ca me purtaie sempe p’ ’e viche,

chella ca me trattaie c’ ’o scemanfù…

Chella che lle piacevano ’e cunfiette

                                   nun l’aggiu vista cchiù…

Dummeneca

So’ brasciole, so’ sfilatore ’annecchia.

DUMMENECA

di Rocco Galdieri

I’ mò, trasenno ’a porta, aggiu sentuto

ll’addore d’ ’o rraù.

Perciò... Stateve bona ! ... Ve saluto...

Me ne vaco, gnorsì... Ca si m’assetto

nun me ne vaco cchiù...

E succede c’ aspetto

ca ve mettite a ttavula... E ’nu sta...

Cchiù ccerto ’e che, so’ mmaccarune ’e zita.

L’aggiu ’ntiso ’e spezzà,

trasenno ’a porta. E overo? E s’è capita

tutt’ ’a cucina d’ogge: So’ brasciole,

so’ sfilatore ’annecchia.

Niente cunzerva: tutte pummarole

passate pe’ ssetaccio...

E v’è rimasta pure ’na pellecchia

’ncopp’ ’o vraccio...

Pare ’na macchia ’e sango...

                                   Permettete?

 V’ ’a levo! Comm’è fina

’sta pella vosta... e comme è avvellutata:

mme sciulia sotto ’e ddete...

E parite cchiù bella, stammatina.

’O ffuoco, comme fosse... v’ ha appezzata.

State cchiù culurita...

Cchiù ccerto ’e che, so’ mmaccarune ’e zita...

Ma i’ mme ne vaco... Addio! Ca si m’ assetto

nun me ne vaco cchiù...

E succede c’aspetto...

ca ve mettite a ttavula... p’ avé

’nu vaso c’ ’o sapore ’e ’stu rraù!