Chella che lle piacevano 'e cunfiette

ricca e smargiassa ’ncopp’ ’o bagarino,

ch’ ’e pperne ’a recchia e carreca ’e lazziette

CHELLA CHE LLE PIACEVANO ’E CUNFIETTE

di Rocco Galdieri

Chella che lle piacevano ’e cunfiette

e rusecava sempe cannelline,

e teneva ’e capille accussì fine

ca s’ ’aveva appuntà tutt’ ’e mmatine

cu’ ’nu mazzo ’e ferriette…

                                   nun l’aggiu vista cchiù…

Aggio ’ncuntrato ’a rossa, mmaretata,

ricca e smargiassa ’ncopp’ ’o bagarino,

ch’ ’e pperne ’a recchia e carreca ’e lazziette,

cuntenta e amata,

sudisfatta ’e tenè ll’ommo vicino,

ch’essa aveva aspettato pe’ destino

                                   tutta ’na giuventù…

Chella che lle piacevano ’e cunfiette

                                   nun l’aggiu vista cchiù.

Aggiu ’ncuntrato, cu’ ’na piccerella

p’ ’a mano, comme a essa, malatella,

’a bionda. Ch’ i’ tremmavo ca mureva!

Ca se n’avetta j’ ’ncopp’Arenella

pe’ via c’ ’a sera lle veneva ’a freva…

Ca me diceva: Lassame… c’aspiette?

E teneva ’na tosse, ’a puverella,

ma nun vuleva manco ’nu sciusciù.

Chella che lle piacevano ’e cunfiette

                                   nun l’aggiu vista cchiù.

Aggiu ’ncuntrato tutte ’e nnammurate!

’E cchiù luntane, ’e cchiù luntane e antiche…

’E ccanuscenze vecchie, ’e bbone amiche,

a una a una tutte ’aggiu ’ncuntrate…

Chella che me faceva cchiù dispiette,

chella ca me purtaie sempe p’ ’e viche,

chella ca me trattaie c’ ’o scemanfù…

Chella che lle piacevano ’e cunfiette

                                   nun l’aggiu vista cchiù…

I’ aggio avuto ’e tutta ’sta bellezza

nun me resta, a ’stu munno, at’ ’a gudé

I’ AGGIO AVUTO ’E TUTTA ’STA BELLEZZA

di Claudio Pennino





I’ non ebbi già mai di tuo’ bellezza



I’ non ebbi già mai di tuo’ bellezza
se non talvolta poterti vedere;
e se questo mel to’ la tua durezza,
al mondo non mi resta altro piacere;
e Morte il filo di mia vita ispezza,
poich’io non posso questo bene avere.
Tu fuggi, donna, e col fuggir m’uccidi,
e per mio maggior mal tu te ne ridi.


Angelo Poliziano






I’ aggio avuto ’e tutta ’sta bellezza



I’ aggio avuto ’e tutta ’sta bellezza
si e no ’o piacere ’e te puté vedé;
e si chisto m’ ’o lieve c’ ’a freddezza,
nun me resta, a ’stu munno, at’ ’a gudé;
e ’a Morte ’o filo ’e chesta vita spezza,
giacché ’stu bbene nun ’o pozzo avé.
Tu te ne fuie, e ’stu ffuì m’accide,
e pe me fà cchiù mmale ancora ride.


Claudio Pennino




(da Na guardata amurosa, 2006)

Arillo

               Canta e chiagne ’int’ ’a nuttata

              p’ ’o silenzio d’ ’a campagna

ARILLO

di Giovanni Capurro

Ma che vo, che vo st’arillo

ca fa un’arte e mai se stanca ?

Ma che dice ? Che lle manca ?

Canta o chiagne ? Che vo dì ?

Canta e chiagne ’int’ ’a nuttata

p’ ’o silenzio d’ ’a campagna.

Chiammarrà, forse, ’a cumpagna,

lle dà ’o segno isso addo’ sta...

Vi’ che forza e che custanza

ca zerrèa tutt’ ’a nuttata...

Sta pacienza pe’ na ’ngrata

sulo ammore nce ’a po’ dà..

Chillu core piccerillo

guarda llà, pure patisce...

Chiamma ammore, e chi ’o capisce ?

Chi a n’arillo po’ penzà ?

Io, ca sento, ’o cumpatisco,

pecché i’ pure ’a cchiù de n’anno

sto suffrenno e sto chiammanno

chi ha giurato ’e nun sentì.

Tutto è ammore! Io sulamente

nun ne trovo nu tantillo...

Sto facenno comm’ ’arillo:

canto all’aria... e ch’aggia fà?

S’i’ fosse nu pueta overamente

S’I’ FOSSE NU PUETA

di Claudio Pennino

S’i’ fosse nu pueta overamente,

sapesse spiecà buono ch’è na rosa:

sapesse dì pecché ’o ffuoco ardente

sta dint’ ’a rosa rossa cchiù addurosa.

V’ ’a facesse vedé dint’ â nuttata,

bella quanno ’int’ â testa s’arreposa.

Albanno iuorno, nfosa d’ ’a rusata,

palleda appena e cchiù sentimentale,

i’ v’ ’a pittasse comm’a na pupata.

E ve l’appresentasse ’int’ ô bucale,

mettènnoce, ccà e llà, pure na spina;

avvellutate, ’e ffronne, tale e quale

fosseno ’a vesta ’e cuollo a na riggina.

Tanto fosse priciso e puntigliuso,

’a fà pe vvuie ritratto e cartulina,

pe ve mustrà ’o bucciuolo ancora nchiuso

ntramente ve pugnite cu na mano.

Ma ’o vierzo sott’ ’a penna è ntruppecuso

e cu ’e pparole nun se va luntano.

C’avite visto fino a mo? Nu sciore!

E nun riesco cchiù a cèrnere ’o ggrano

pecché d’ ’a rosa i’ saccio dì ’o culore...

ma si fosse pueta overamente

i’ ve faccesse sentere ll’addore.

(da Primma ca scura notte, 2009)

'A Madonna d' 'e mandarine

Ma ’a Madonna, quanno ognuno

sta durmenno a suonne chine

’A MADONNA D’ ’E MANDARINE

di Ferdinando Russo

Quanno ncielo n’angiulillo

nun fa chello c’ ha da fà,

’o Signore int’ a na cella

scura scura ’o fa nzerrà.

Po’ se vota a n’ato e dice:

- Fa venì San Pietro ccà!

E San Pietro cumparisce:

- Neh, Signò, che nuvità?

-Dint’ ’a cella scura scura

n’angiulillo sta nzerrato:

miettammillo a pane e acqua

pecché ha fatto nu peccato!

E San Pietro acala ’a capa

e risponne: - Sissignore!

Dice Dio: - Ma statt’ attiento

ch’ ha da stà vintiquatt’ ore!

L’angiulillo, da llà dinto,

fa sentì tanta lamiente....

- Meh, Signò, dice San Pietro,

pe’ sta vota... nun fa niente...

- Nonzignore! Accussì voglio!

Statte zitto! Dice Dio;

si no ognuno se ne piglia!

’N Paraviso cumann’ io!

E San Pietro avota ’e spalle.

Da la cella scura scura

l’angiulillo chiagne e sbatte,

dice ’e metterse paura!

Ma ’a Madonna, quanno ognuno

sta durmenno a suonne chine,

annascuso ’e tuttequante

va e lle porta ’e mandarine!

Nu ciuccio, nu scaluórcio d’animale,

girava ntunno ’a rota ’e nu mulino

CIUCCIARIA

di Claudio Pennino

’Nzerranno ll’uocchie, pure ’o cchiù pezzente,

pò mmagginà qualunqua meraviglia;

pò vedé ’o mare e ll’onne trasparente,

sulo appuianno ’a recchia a na cunchiglia.

Se ponno fravecà, cu ll’uocchie nchiuse,

castielle ’e ’naria… e bastimiente a mmare.

E pure ’e suonne, chille cchiù annascuse,

ponno vulà p’ ’o cielo a centenare.

Chi soffre sott’ ’a sferza d’ ’a bbacchetta,

se cagna ’o munno comme cchiù lle piace,

e pure ’a bestia aizannose ’a carretta,

si nzerra ll’uocchie trova ’o ppoco ’e pace.

Nu ciuccio, nu scaluórcio d’animale,

girava ntunno ’a rota ’e nu mulino,

cu nu cappuccio ncapo e ’o petturale,

tenuto ’a na curréia p’ ’o cruattino.

Nun s’addunava, tanto ch’era ciuccio,

c’ ’a strata nun purtava assaie luntano,

pecché, tenenno ncapo stu cappuccio,

credeva ’e girà ’o munno sano sano.

Tanto ca, ncapo a isso, ’o ciucciariello,

se mmagginava ’e scravaccà muntagne…

e, si sciusciava doce ’o ventariello,

diceva: « Ccà me trovo ’int’ ’e ccampagne! »

E mmagginava bosche, e po’ vallate…

na casa… n’ata casa… nu paese…

E ancora sciumme, pònte, scalinate,

ca nun bastava a cammenà nu mese.

Ma quanno stracquo, a ll’ora vespertina,

levatose ’o cappuccio se vedette

’o stesso posto addó steve ’a matina,

tutto meravigliato riflettette:

« Chi s’ ’o ccredeva ca dint’a nu iuorno

putevo vedé ’o munno luongo e futo.

Abbasta ch’uno gira sempe attuorno

e arriva ’o stesso posto ’a do’ è partuto! »

E doppo fatto stu raggiunamento,

c’ ’a coda se cacciaie cchiù ’e nu muschillo,

e, spuorco ’e lóta, po’ arragliaie cuntento:

« Ggiesù, stu munno quant’è piccerillo! »

(da ’A strata d’ ’e stelle 2001)

Pasca rusata

Te porto tanta rose

PASCA RUSATA

di Ernesto Murolo

                        Sta venenno l’està !

Può arapì nu barcone, na fenesta,

ca ’o viento nun t’ ’e nzerra...

            Nu cchiù mare ntempesta,

            nuvole chiene d’acqua, viento ’e terra...

                        Sta venenno l’està !

Mo t’affacce e risciate, finalmente,

            n’aria cchiù doce

            ca fa cchiù allera ’a gente,

            ca fa cchiù allere ’e vvoce

            d’ ’e venneture e mette int’ ’e pparole

            d’ammore cchiù curaggio;

            ca fa pare Pusilleco

cchiù verde già, cu ’e ttavulelle pronte...

                        E che sole... che sole...

(Passa nu « quatto ’e maggio »

pe’ nu casino a Sant’Antonio ’o Monte...)

                        Sta venenno l’està !

’E vestite già pesano... ’E llenzole

già nfòcano... Nun è cchiù fredda, ’nfaccia,

l’acqua, ’a marina: mo a calore ’e sole,

scorre... e se fa cchiù fresca... e sguazzarià

—   cu ’a scumma d’ ’o ssapone —

te può, bellezza mia!... Già veco ’e braccia

—   nun appanna ’o balcone... —

veco sta mana chiattulella e nfosa

            fermà cu duie fernette

            sta trezza ancora nfosa,

nera e lucente comm’a nu gravone...

                        Benedetta l’està !

Ca si tu me perduone

e si m’aspiette,

facimmo tale e quale

comm’a Pasca passata...

                        (Pasca rusata !...)

Te porto tanta rose, e tutte ’e ffronne

tu dint’a st’acqua n’ata vota sfrunne,

            e te ce nfunne...

E sbracciata, addurosa, spettenata,

            sta vocca ca me sfuie, ca s’annasconne,

            tu te farrai vasà

            comm’a Pasca passata !...

                        (Pasca rusata !...)

                        Benedetta l’està !...

'E mmane d' 'e ccriature

’E mmane d’ ’e ccriature so’ comme ’e ppagnuttelle

’E MMANE D’ ’E CCRIATURE

di Claudio Pennino

’E mmane d’ ’e ccriature

so’ comme ’e ppagnuttelle:

tutte ’e stessi mmesure,

e chiene ’e fussetelle.

Quanno t’ ’e ssiente nfaccia,

’sti ppenne ’e passariello,

pare ca dint’ ’e bbraccia

t’astrigne ’o Bammeniello.

E vuò turnà criaturo,

cu ’e mmane d’ ’a nnucenza,

ca vedeno ’int’ ’o scuro

e nun sanno ’a viulenza.

Ma smòveno muntagne,

arapeno furtezze...

Tutto se sana e cagne

cu’ ’a forza d’ ’e ccarezze.

’E mmane d’ ’e ccriature

so’ ppalummelle rosa...

sanno caccià ’e ppaure

’e chi nun arreposa.

Parlano cu ’e ddetelle...

Na mana stesa chiamma:

chi cerca ’e ccaramelle,

chi va truvanno ’a mamma.

E comme so’ bbellelle,

quanno, cu ’e pugne nchiuse,

s’asciuttano ’e ffaccelle

scerianno ll’uocchie nfuse.

Tanno vonno nu vaso

pe sanà nu detillo.

Chi vo afferrarte ’o naso...

chi ’a faccia a pezzechillo.

E quanno ’e ssiente nfaccia,

’sti ppenne ’e passariello,

pare ca dint’ ’e bbraccia

t’astrigne ’o Bammeniello.

(da Vela ’e penziere, 1999)

Mare

Me parevano ’e vvele scelle aperte

MARE

di Raffaele Chiurazzi

Addurava ’e friscura matutina,

’e friscura salata, penetrante.

E l’acqua me pareva na vetrina

chiena ’e curalle, ’e perle, e de brillante.

Me parevano ’e vvele scelle aperte

cusùte cu l’argiento int’ ’a nu velo.

Comm’ ’e svulazze ’e seta d’ ’e ccuperte,

’e nnuvole sfilaveno p’ ’o cielo.

Partenno d’ ’o Vesuvio che fumava,

l’arcobaleno, disignato e chiaro,

’ncopp’ ’o cceleste chiaro accarezzava

Pusilleco a braccetto ’e Marechiaro.

Mare, scenario ’e lusso, triste e bello.

Malincunia che stona e che cunzola.

Mare, te cunuscette guagliunciello

pe’ nu filone che facette a’ scola.

Tutto se sconta

TUTTO SE SCONTA

di Claudio Pennino

Tutto se sconta ccà, ncopp’ a ’stu munno,
tutto tene principio e ttene fine;
chi nasce quatro nn’addeventa tunno,
e rrosa nun ce sta ca è ssenza spine.

Tutto se pava ccà, ogni ppeccato,
po’, cala ’a tela, e sse nzerra ’o triato...
pirciò chi nganna a ccore ca vo bbene,
tiempo ne passa... ma pesante vene.

(da Villanelle, 2016)

'O vino

Sapeva ’a lecca e ’a mecca ’e tutt’ ’e vine

’O VINO

di Mario Sieyes

Sapeva ’a lecca e ’a mecca ’e tutt’ ’e vine,

steva arracchiato tutt’ ’o santo juorno.

« Ll’acqua — diceva — nfracete ’e stentine

e i’ nun ne vevo pecche me fa scuorno ».

’A mugliera faceva uno taluorno,

sfucannese cu isso e cu ’e vicine,

ma chillo — tuosto — cu na faccia ’e cuorno,

jeva facenno cantine cantine.

Ma na matina male se sentette;

muorto ’e paura ’o miedeco chiammaie,

e ’o miedeco venette e ’o visitaie.

« Il male che vi affligge — lle dicette,

tastiannolo cu n’aria ’e circustanza —

è ca tenite ll’acqua dint’ ’a panza ».

'O naso

Nu bellu naso, e quanno dico bello

è comme si dicesse ’o naso mio

’O NASO

di Claudio Pennino

Ve pare a vvuie na cosa ’e niente ’o naso?

Na cosa ca sta llà pecché ha dda stà?

Giacché ’a natura niente fa per caso,

rivela ’e ll’ommo ’a vera identità.

È comme fosse ll’aco d’ ’a valanza:

sta mmiez’ â faccia comme lle cumpete;

e addora ’e ccose storte nluntananza:

subbeto sente quanno ’o miccio fete.

Nu naso ammartenato e cunzistente,

te dice già ’o carattere ’e chi ’o porta:

si ’stu crestiano è buono o malamente,

si è n’alletterato o è guardaporta.

Pe ve fà mo l’esempio cchiù priciso,

spiecateme comm’è ca ’o stesso Dante,

ha scritto chilli vierze ’e Paraviso,

si nun teneva chillu naso tanto.

’O core, è overo, alloggia ’e sentimente,

ma ’o naso, ’mmece, è ’o segno d’ ’o destino.

Si sfuoglie ’e libbre ’e storia è assaie evidente,

ca ’o naso ’e Napulione era aquilino.

Nu bellu naso, e quanno dico bello

è comme si dicesse ’o naso mio,

te valorizza ’a faccia: è nu gioiello

ca ’a na guagliona ’a fa venì ’o gulio.

Pe cchesto po’ se sceglieno ’o marito

ca tene ’o naso quatto parme e cchiù;

vanno dicenno ca nu naso ardito

prumette certamente ati virtù.

(da Primma ca scura notte 2009)