'E dolce d' 'o "Splendore"

Ianca e rrossa. ’Nu nievo ’nfaccia. / Ll’ uocchie azzurre... ’Na maraviglia!

(Uocchie, faccia, mantiello, mane, / ll’ adduràvano ’e vainiglia...)

’E DOLCE D’ ’O « SPLENDORE »

di Alfonso Mangione

Zia Cuncetta Carotenuto

ch’ era monaca d’ ’o « Splendore »

e ogne passo ca deva ’o deva

pe’ cunziglio d’ ’o cunfessore,

quanno ancora stévamo ’e casa

’ncopp’ ’o Corso, sotto Natale,

ce mannava, pe’ ’na cunversa,

’nu cartoccio ’e pasteriale.

Era ll’epoca d’ ’e zzampogne.

Verso ll’ urdemo d’ ’a nuvena,

’na matina... ndlì ndlì... ’a porta...

...e arrivava suor Filomena.

Ianca e rrossa. ’Nu nievo ’nfaccia.

Ll’ uocchie azzurre... ’Na maraviglia!

(Uocchie, faccia, mantiello, mane,

ll’ adduràvano ’e vainiglia...)

Io, tanno, ero guaglione ancora.

Ma a ’sta monaca... ll’ aspettavo!

E i’ p’ ’o primmo — quanno ’a vedevo —

nun ve dico comme restavo!

— Sia lodato Gesù e Maria...

— ’Stu cartoccio... — Mettite ccà... —

— Ve lo manda Madre Concetta... —

— ...A proposito: comme sta? —

A uttant’ anne, ’sta zia d’ ’a nosta,

steva bbona. Sempe cchiù bbona!

Sette spìrete... Comm’ ’e ggatte...

E, ogne vota, — Dio m’ ’o perdona —

io penzavo: Pe’ ccient’ ate anne

dalle vita, Cuore ’e Gesù!...

...Si no ll’ uocchie ’e Suor Filomena

— ’st’ uocchie azzurre — chi ’e vvede cchiù?

Ma ’a vista vosta è tanto sapurita

AMMORE S’È MMUSTATO CU LUSTRORE

di Claudio Pennino

Visibilmente mi s’è mostro Amore

Visibilmente mi s’è mostro Amore

ne’ be’ vostri occhi, e volea morte darmi;

ma sbigottito si fuggì el mio core

gittando in terra tutte le sue armi,

perch’Amor lancia con tanto furore

che ’l ferro spezza, e’ diamanti e’ marmi.

Ma pur la vista vostra è tanto vaga,

che ’l cor ritorna aspettar questa piaga.

Angelo Poliziano

Ammore s’è mmustato cu lustrore

Ammore s’è mmustato cu lustrore

dint’a ’st’uocchie, e Morte steva pe darme;

appaurato fuiette chistu core

iettanno nterra tutte quante ll’arme,

pecché frezzéa accussì forte Ammore

ca spezza ’o ffierro, diamante e marme.

Ma ’a vista vosta è tanto sapurita,

ca ’o core sempe aspetta ’sta ferita.

Claudio Pennino

(da Na guardata amurosa, 2006)

Da 'o quarto piano

ca tu staie quase ncielo
ncopp’ a stu quarto piano

DA ’O QUARTO PIANO

di Salvatore Di Giacomo

Giacché te cucche ampressa
pe te scetà matina,
e st’aria fresca e fina
t’affacce a risciatà;

giacché chi sa che suonno
te suonne ancora e, spierte,
tu gire st’uocchie apierte
chi sa penzanno a che;

dimme, Adelà, mme vide,
a st’aria fresca e fina,
passà quacche matina
e ’a parta toia guardà?

C’’o càmmese celeste
ca te se sponte mpietto
e, quase pe dispietto,
nun se vo maie nzerrà:

c’’o pede piccerillo
ca, ’int’ ’a cazetta nera,
p’ ’e fierre d’ ’a ringhiera
mo dice sì mo no;

ca tu staie quase ncielo
ncopp’ a stu quarto piano,
che fa? Pure ‘a luntano
te veco, e dico: « A i’ llà! ».

Ma mo (scuse, io so’ chiaro),
nu’ cchiù comm’ a na vota
sbatte stu core e avota
sta capa mia pe te!

Passo, chi ’o nnega? E’ overo;
ma si te tengo mente
so’ friddo e indifferente,
comme si’ fredda tu.

Chest’ è! Nziemme a sti fronne
ca fa cadé l’autunno,
quant’ ate cose a ’o munno
pe forza hann’ ’a cadé!

Dunque? Giacché cchiù ampressa
te suse ogne matina,
e st’aria fresca e fina
te miette a risciatà;

giacché tutto è fenuto,
giacché, si ce vedimmo,
nun ce sbollimmo e ardimmo
comm’ a na vota cchiù,

statte affacciata! E resta
cu st’aria indifferente:

passano tanta gente,
passo pur’ io. Che fa?

'E nnuvole

ma, ’e corza, cu nu zuoccolo,

’o sfonna nu cavallo

’E NNUVOLE

 di Claudio Pennino

Me piace ’e guardà ’e nnuvole,

quanno, liggere e stanche,

p’ ’o cielo arrassumigliano

a pecurelle ianche.

Se pàsceno cuntente,

’a copp’a nu migliaro,

e arreto, c’ ’o bbastone,

’e vvotta ’o pecuraro.

Se ’mbrogliano, se stracciano,

ritornano vicine,

e tutto ’nzieme pareno

galline e pullicine.

Si ’o viento ll’arravoglia

comm’a nu cartucciello,

se sbrogliano ’int’a niente,

e ghiesce nu castiello.

E, pe ddereto, ’o sole,

ce fa na lumminaria

ca chi ’o vede dice:

« Vi’ che castiello ’e n’aria! »

E tante so’ ’e riflesse

ca mme pare ’e cristallo…

ma, ’e corza, cu nu zuoccolo,

’o sfonna nu cavallo.

E a uocchie apierte sonno,

io ca nun sonno assaie,

tante so’ ’e mmeraviglie

ca nn’aggio visto maie.

E ce resto ncantato,

comm’a nu piccerillo,

ca vo acchiappà cu ’e mmane

’e scelle ’e n’angiulillo,

ca se nne va p’ ’o cielo,

ca pare nu tesoro,

a buordo ’e nu vasciello

cu ’e vvele tutte d’oro.

(da ’A strata d’ ’e stelle 2001)

Primmavera ( 'E rrose )

ma che sarriano ’e rrose senza spine ?

PRIMMAVERA  ('E rrose)

di Libero Bovio

“ Ah, che sciorte, che sciorte

ca teneno ’sti rrose...

ogge accussì addurose

e dimane... so’ morte!... ”

Mio caro amore,

ah, finalmente è riturnato Abbrile !...

E j’ pure torno a vuie cu tutt’ ’o core,

pecché ve saccio semplice e gentile...

Grazie d’ ’e rrose.

Comme so’ belle, nammurata mia:

so’ ancora accussì fresche e accussì ’nfose

ca fanno, quase, ’na malincunia...

Mio caro amore,

ma che sarriano ’e rrose senza spine ?

ma che sarria ’na gioia senza dulore ?

ma che sarria n’ammore senza fine ?

E pure nuie,

a poco a poco pure nuie murimmo...

E ’a vita fuie. Vedite comme fuie

ca già so’ morte ’e rrose... Ma che ssimmo !...

'Int' a nu specchio d'acqua

Te si’ mmirata ’int’a nu specchio d’acqua

’INT’A NU SPECCHIO D’ACQUA

di Claudio Pennino

La verità non è un cristallo che

si può mettere in tasca, bensì un

liquido sconfinato in cui si casca dentro.

                   R. Musil

Te si’ mmirata ’int’a nu specchio d’acqua,

e t’hê accunciata ’a sciocca d’ ’e capille;

po’ c’ ’a manella, appena appena stracqua,

ll’hê smòppeta facennola ncrispà.

Tutto na vota, te si’ fatta brutta,

na serpa se turceva ncopp’a ll’acqua.

Sulo a vedé comm’ire tu arredutta,

m’aggio sentuto ’o core ’appaurà.

E si tu fusse chella overamente?

Si me ngannasse cu ’sta faccia bella?

Allora, i’ pure aggio tenuto mente,

cercanno ’int’a ’stu specchio ’a verità.

E aggio visto ncopp’a ll’acque chiare,

na nuvola ’e passà liggera e stanca,

’o sole ca tramonta e po’ scumpare,

e ’a luna ianca ca p’ ’o cielo va.

Pe guardà meglio, cchiù me so’ accustato

e, stratto ’e mente, so’ caduto a ffunno.

Na voce, allora, mpietto m’ha parlato:

« Sta scritta ncopp’a ll’acqua ’a verità! »

(da Primma ca scura notte 2009)

Chella che lle piacevano 'e cunfiette

ricca e smargiassa ’ncopp’ ’o bagarino,

ch’ ’e pperne ’a recchia e carreca ’e lazziette

CHELLA CHE LLE PIACEVANO ’E CUNFIETTE

di Rocco Galdieri

Chella che lle piacevano ’e cunfiette

e rusecava sempe cannelline,

e teneva ’e capille accussì fine

ca s’ ’aveva appuntà tutt’ ’e mmatine

cu’ ’nu mazzo ’e ferriette…

                                   nun l’aggiu vista cchiù…

Aggio ’ncuntrato ’a rossa, mmaretata,

ricca e smargiassa ’ncopp’ ’o bagarino,

ch’ ’e pperne ’a recchia e carreca ’e lazziette,

cuntenta e amata,

sudisfatta ’e tenè ll’ommo vicino,

ch’essa aveva aspettato pe’ destino

                                   tutta ’na giuventù…

Chella che lle piacevano ’e cunfiette

                                   nun l’aggiu vista cchiù.

Aggiu ’ncuntrato, cu’ ’na piccerella

p’ ’a mano, comme a essa, malatella,

’a bionda. Ch’ i’ tremmavo ca mureva!

Ca se n’avetta j’ ’ncopp’Arenella

pe’ via c’ ’a sera lle veneva ’a freva…

Ca me diceva: Lassame… c’aspiette?

E teneva ’na tosse, ’a puverella,

ma nun vuleva manco ’nu sciusciù.

Chella che lle piacevano ’e cunfiette

                                   nun l’aggiu vista cchiù.

Aggiu ’ncuntrato tutte ’e nnammurate!

’E cchiù luntane, ’e cchiù luntane e antiche…

’E ccanuscenze vecchie, ’e bbone amiche,

a una a una tutte ’aggiu ’ncuntrate…

Chella che me faceva cchiù dispiette,

chella ca me purtaie sempe p’ ’e viche,

chella ca me trattaie c’ ’o scemanfù…

Chella che lle piacevano ’e cunfiette

                                   nun l’aggiu vista cchiù…

I’ aggio avuto ’e tutta ’sta bellezza

nun me resta, a ’stu munno, at’ ’a gudé

I’ AGGIO AVUTO ’E TUTTA ’STA BELLEZZA

di Claudio Pennino





I’ non ebbi già mai di tuo’ bellezza



I’ non ebbi già mai di tuo’ bellezza
se non talvolta poterti vedere;
e se questo mel to’ la tua durezza,
al mondo non mi resta altro piacere;
e Morte il filo di mia vita ispezza,
poich’io non posso questo bene avere.
Tu fuggi, donna, e col fuggir m’uccidi,
e per mio maggior mal tu te ne ridi.


Angelo Poliziano






I’ aggio avuto ’e tutta ’sta bellezza



I’ aggio avuto ’e tutta ’sta bellezza
si e no ’o piacere ’e te puté vedé;
e si chisto m’ ’o lieve c’ ’a freddezza,
nun me resta, a ’stu munno, at’ ’a gudé;
e ’a Morte ’o filo ’e chesta vita spezza,
giacché ’stu bbene nun ’o pozzo avé.
Tu te ne fuie, e ’stu ffuì m’accide,
e pe me fà cchiù mmale ancora ride.


Claudio Pennino




(da Na guardata amurosa, 2006)

Arillo

               Canta e chiagne ’int’ ’a nuttata

              p’ ’o silenzio d’ ’a campagna

ARILLO

di Giovanni Capurro

Ma che vo, che vo st’arillo

ca fa un’arte e mai se stanca ?

Ma che dice ? Che lle manca ?

Canta o chiagne ? Che vo dì ?

Canta e chiagne ’int’ ’a nuttata

p’ ’o silenzio d’ ’a campagna.

Chiammarrà, forse, ’a cumpagna,

lle dà ’o segno isso addo’ sta...

Vi’ che forza e che custanza

ca zerrèa tutt’ ’a nuttata...

Sta pacienza pe’ na ’ngrata

sulo ammore nce ’a po’ dà..

Chillu core piccerillo

guarda llà, pure patisce...

Chiamma ammore, e chi ’o capisce ?

Chi a n’arillo po’ penzà ?

Io, ca sento, ’o cumpatisco,

pecché i’ pure ’a cchiù de n’anno

sto suffrenno e sto chiammanno

chi ha giurato ’e nun sentì.

Tutto è ammore! Io sulamente

nun ne trovo nu tantillo...

Sto facenno comm’ ’arillo:

canto all’aria... e ch’aggia fà?

S’i’ fosse nu pueta overamente

S’I’ FOSSE NU PUETA

di Claudio Pennino

S’i’ fosse nu pueta overamente,

sapesse spiecà buono ch’è na rosa:

sapesse dì pecché ’o ffuoco ardente

sta dint’ ’a rosa rossa cchiù addurosa.

V’ ’a facesse vedé dint’ â nuttata,

bella quanno ’int’ â testa s’arreposa.

Albanno iuorno, nfosa d’ ’a rusata,

palleda appena e cchiù sentimentale,

i’ v’ ’a pittasse comm’a na pupata.

E ve l’appresentasse ’int’ ô bucale,

mettènnoce, ccà e llà, pure na spina;

avvellutate, ’e ffronne, tale e quale

fosseno ’a vesta ’e cuollo a na riggina.

Tanto fosse priciso e puntigliuso,

’a fà pe vvuie ritratto e cartulina,

pe ve mustrà ’o bucciuolo ancora nchiuso

ntramente ve pugnite cu na mano.

Ma ’o vierzo sott’ ’a penna è ntruppecuso

e cu ’e pparole nun se va luntano.

C’avite visto fino a mo? Nu sciore!

E nun riesco cchiù a cèrnere ’o ggrano

pecché d’ ’a rosa i’ saccio dì ’o culore...

ma si fosse pueta overamente

i’ ve faccesse sentere ll’addore.

(da Primma ca scura notte, 2009)

'A Madonna d' 'e mandarine

Ma ’a Madonna, quanno ognuno

sta durmenno a suonne chine

’A MADONNA D’ ’E MANDARINE

di Ferdinando Russo

Quanno ncielo n’angiulillo

nun fa chello c’ ha da fà,

’o Signore int’ a na cella

scura scura ’o fa nzerrà.

Po’ se vota a n’ato e dice:

- Fa venì San Pietro ccà!

E San Pietro cumparisce:

- Neh, Signò, che nuvità?

-Dint’ ’a cella scura scura

n’angiulillo sta nzerrato:

miettammillo a pane e acqua

pecché ha fatto nu peccato!

E San Pietro acala ’a capa

e risponne: - Sissignore!

Dice Dio: - Ma statt’ attiento

ch’ ha da stà vintiquatt’ ore!

L’angiulillo, da llà dinto,

fa sentì tanta lamiente....

- Meh, Signò, dice San Pietro,

pe’ sta vota... nun fa niente...

- Nonzignore! Accussì voglio!

Statte zitto! Dice Dio;

si no ognuno se ne piglia!

’N Paraviso cumann’ io!

E San Pietro avota ’e spalle.

Da la cella scura scura

l’angiulillo chiagne e sbatte,

dice ’e metterse paura!

Ma ’a Madonna, quanno ognuno

sta durmenno a suonne chine,

annascuso ’e tuttequante

va e lle porta ’e mandarine!

Nu ciuccio, nu scaluórcio d’animale,

girava ntunno ’a rota ’e nu mulino

CIUCCIARIA

di Claudio Pennino

’Nzerranno ll’uocchie, pure ’o cchiù pezzente,

pò mmagginà qualunqua meraviglia;

pò vedé ’o mare e ll’onne trasparente,

sulo appuianno ’a recchia a na cunchiglia.

Se ponno fravecà, cu ll’uocchie nchiuse,

castielle ’e ’naria… e bastimiente a mmare.

E pure ’e suonne, chille cchiù annascuse,

ponno vulà p’ ’o cielo a centenare.

Chi soffre sott’ ’a sferza d’ ’a bbacchetta,

se cagna ’o munno comme cchiù lle piace,

e pure ’a bestia aizannose ’a carretta,

si nzerra ll’uocchie trova ’o ppoco ’e pace.

Nu ciuccio, nu scaluórcio d’animale,

girava ntunno ’a rota ’e nu mulino,

cu nu cappuccio ncapo e ’o petturale,

tenuto ’a na curréia p’ ’o cruattino.

Nun s’addunava, tanto ch’era ciuccio,

c’ ’a strata nun purtava assaie luntano,

pecché, tenenno ncapo stu cappuccio,

credeva ’e girà ’o munno sano sano.

Tanto ca, ncapo a isso, ’o ciucciariello,

se mmagginava ’e scravaccà muntagne…

e, si sciusciava doce ’o ventariello,

diceva: « Ccà me trovo ’int’ ’e ccampagne! »

E mmagginava bosche, e po’ vallate…

na casa… n’ata casa… nu paese…

E ancora sciumme, pònte, scalinate,

ca nun bastava a cammenà nu mese.

Ma quanno stracquo, a ll’ora vespertina,

levatose ’o cappuccio se vedette

’o stesso posto addó steve ’a matina,

tutto meravigliato riflettette:

« Chi s’ ’o ccredeva ca dint’a nu iuorno

putevo vedé ’o munno luongo e futo.

Abbasta ch’uno gira sempe attuorno

e arriva ’o stesso posto ’a do’ è partuto! »

E doppo fatto stu raggiunamento,

c’ ’a coda se cacciaie cchiù ’e nu muschillo,

e, spuorco ’e lóta, po’ arragliaie cuntento:

« Ggiesù, stu munno quant’è piccerillo! »

(da ’A strata d’ ’e stelle 2001)