'O libbro d' 'o ppecché

Ce sta nu libbro ca tene annutato

tutt’ ’e pecché ca stanno ncopp’ ’o munno

’O LIBBRO D’ ’O PPECCHÉ

di Claudio Pennino

Ce sta nu libbro ca tene annutato

tutt’ ’e pecché ca stanno ncopp’ ’o munno.

A ffila, nu pecché arreto a n’ato,

ne songo a centenare, nu zeffunno.

« Pecché sto’ sazzio quanno aggio magnato?

E comme maie ’a nave nun va a ffunno?

Pecché nun vede chi nasce cecato?

E, ’o munno, ’o ssaie  pecché è largo e ttunno? »

A tutte sta signata na risposta,

e ogne ccosa llà se po’ sapé:

« Pecché ll’ammore coce chi t’accosta,

e coce chi luntano resta ’a te? »

A ’sta dimanna, pare fatto apposta,

nun steve scritto niente, ma pecché?

(da ’A pianta d’ ’a felicità, 2004)

Core 'e cane...

core ’e femmena è core ngannatore

CORE ’E CANE...

di Ferdinando Russo

E songo st’uocchie mieie na funtanella

cu nu zampillo ’e lacreme d’ammore.

Io m’ero miso cu na brunuttella

ca ditto ’nfatto s’arrubbaie stu core.

Mo s’è spezzata chesta catenella,

dint’ ’o bicchiere s’è seccato ’o sciore,

mo s’è scurdata ’e me chella mpesella:

core ’e femmena è core ngannatore!

Quanto vurria sapé c’ha guadagnato

sta piccerella a farme stu dispietto...

Io steva ncielo, e nterra m’ha menato.

Io steva ’o llustro e m’ha rummaso ’o scuro

e vaco mo, senza truvà arricietto,

comm’ a nu cane spierzo, muro muro.

'A penicillina

’A PENICILLINA

di Alfonso Mangione

Luce ’int’ a ll’uocchie vuoste ’nu mistero

verde ’e speranza e niro ’e nfamità!

E i’ pe chist’uocchie sto’ malato overo

e haggio bisogno ’e vuie pe me sanà!

Pe vvuie nun mangio cchiù! Poco raggiono!

Vicino a vvuie me mbroglio a ccammenà.

’A ggente dice ca so’ muorto e bbuono...

Ma i’ penzo che putrìa risuscità!

Che mmedicina è chesta vocca vosta!

’Nu vaso vuosto che sullievo dà!

E i’ vularria cadé malato apposta

p’ ’o sfizio ’e chiammà a vvuie pe’ me curà.

                                              

’Sta vocca curallina

pò ffa’ l’effetto d’ ’a penicillina...

P’ogne unità: ’nu vaso...

E vvui nun me ne date! E i’ cchiù ce traso!

                                             

Facite ll’angarella...

Ma, cu ’sta vocca bella,

sultanto vuie — zucosa ’a dinto e ’a fore —

site ’a penicillina ’e chistu core!

'A sveglia

Tanno fa ’o nzisto... È sgargiante

’A SVEGLIA

di Edoardo Nicolardi

Ma che rilorgio preciso!

Maie nu minuto nun sposta!

Ma ch’esattezza, Ggiesù,

quann’ è ca dà chill’avviso

tunno e deciso: « Cucuricùùùù!... »

E ’a dinto a tutt’ ’e pullare

(ma so’ centenare? ma quante ne so’?)

vene, pricisa ’a risposta:

Na voce ’e basso cantante « cocoricòòòò... »

Na voce fresca ’e tenore: « chichirichìììì »

Na voce fàuza accussì,

meza no,

meza sì...

Ntrona ’sta voce pe’ ll’aria

dint’ ’o silenzio d’ ’e ccose:

p’ ’a via sulitaria,

p’ ’a via d’ ’a città,

’n campagna, attuorno ’e ppagliare,

mmiezo ’e scampìe, mmiezo ’e vvigne,

pe’ ttuorno ’a piscina,

pe’ ’n copp’ ’e llogge d’ ’e ccase,

dint’ ’e suppigne,

dint’ ’a vinella, ’int’ ’o vascio,

llà ncoppa, llà bbascio,

vicina e luntana,

luntana e vicina...

Tanno se scetano ’e ccose.

Se sceta ’a primma campana.

Se sceta ’o massaro.

Se sceta ’o faticatore.

Se sceta ’o Sole, e se sóse.

E passa, siscanno, ’o craparo

c’ ’o siscariello ’e chiuppo, a sei pertose.

Tanno, ’o rilorgio priciso

nun tene a cchi scetà cchiù.

Ll’ha dato e abbasta, l’avviso:

« Cucuricùùùù ».

Tanno fa ’o nzisto... È sgargiante.

’E ppenne ncuollo so’ d’oro,

so’ ’e ciento culure.

Se dà da fà: mmiezo ’e ppiante...

Pe copp’ ’e llogge... ’Int’ ’o vico...

Chiamma ’e mmugliere e va nnante:

« Venite vuie pure cu mmico... »

E mmiezo a lloro sciascéa.

quanno have a ttaglio una ’e lloro,

che vvuò ca te dico?

Struscia na scella nterra, e se quartéa.

Ma, a vvintun’ore, ammasóna.

E a ll’ora giusta, dimane,

è chesta ’a sveglia ca sona!

È chesta ’a voce ca ntrona,

e sceta ’e cristiane...

E a chi già trova scetato

pecché, turmentato,

nun po’ durmì cchiù,

è nu cunforto ’sta voce;

nu bàlzamo doce

’stu « cucuricù ».

Vaco cercanno a Ddio

Trovo ll’affetto antico

dint’ ’e ricorde vive

VACO CERCANNO A DDIO

di Claudio Pennino

Vaco cercanno a Ddio

e maie pare c’ ’o trovo;

me guardo attuorno... e spio,

ma Ddio ccà nun ce sta.

’Sta vita ca facimmo

rassumiglianno ê bbestie,

senza sapé chi simmo,

certo nun è campà.

Vurria truvà nu senzo

a chesta vita nosta,

e cierti vvote penzo:

« Va trova Ddio addó sta! »

Ma comm’a chi è cecato

e po’ lle torna ’a vista,

i’ veco ’int’ ô criato

Ddio c’ha saputo fà.

Me perdo cu ’e penziere

pe mmiez’a ll’univerzo,

sciulianno cu piacere

mbracci’a ll’Eternità.

E veco na scintilla

dint’a na lacremella,

addó nzerrata brilla

tutta ll’Umanità.

Trovo ll’affetto antico

dint’ ’e ricorde vive,

e raggiunanno dico:

« Allora Ddio ce sta! »

’O veco ogne matina

quanno s’affaccia ’o sole,

’o veco ’int’a na spina

ca pógnere me fa.

E quanno m’appauro,

basta ca guardo ll’uocchie

nnucente ’e nu criaturo,

e dico: « Ddio sta llà. »

(da Primma ca scura notte 2009)

Lettera malinconica

ca fa tant’acqua e nun te sto vicino...

LETTERA MALINCONICA 

di Salvatore Di Giacomo






Luntana staie, Natale sta venenno:
che bello friddo, che belle ghiurnate!...
Friddo ’o paese tuio nne sta facenno?
Pe Natale ve site priparate?

Luntana staie... No... siente... nun è overo,
t’aggio ditto ’a buscia... Chiove a zzeffunno...
me se stregneno ’o core e lu penziero...
nun ce vurria sta’ cchiù ncopp’ a stu munno!

Nun ce vurria sta’ cchiù sulo penzanno
ca fa tant’acqua e nun te sto vicino...
Pe nascere e murì na vota ll’anno
che brutto tiempo sceglie stu Bammino!...

Basta, che faie?... Di’... che te dice ’o core?
Aggiu pacienza... io scrivo e scasso doppe...
nun tengo ’a capa... Te manno stu sciore,
astipatillo ’int’ ’a stessa anviloppe...

Vurria

e gghiesse prufumanno tut’ ’e ccose

VURRIA

di Salvatore Cerino






Vurria ca ’o cielo fosse ’e giglie e rose
e l’aria fosse limpida e curtese,
e gghiesse prufumanno tut’ ’e ccose,
pecché rignassse ’a pace a stu paese!

Pace, fatica e ncore nu bagliore
ca distruggesse ’e ’nfamità d’ ’e gente,
e ce facesse amà cu nu calore
ca è tennerezza, ’ammore e sentimente.

Allere ce chiamassero ’e ssirene
tutt’ ’e mmatine pe’ gghi’ a faticà
e faticanno criarriamo ’o bbene,
ch’ è ’a salvezza ’e tanta umanità.

Pusilleco felice suspirasse
e l’albero cantassero in sordina....
’a musica d’ ’o mare ’accumpagnasse
e ntenneresse tutta Margellina!

E se spannesse l’eco ncantatore
p’ ’e tterre cchiù stramane e cchiù luntane,
e triunfasse ’a Pace, ’o Bbene, ’Ammore,
pecché p’ ’a vita songo cchiù d’ ’o ppane.

E allora se cantassero ’e ccanzone
cu vero sentimento e fantasia
e ’a gente ’e tutt’ ’o munno cu passione,
campasse ntenneruta e in armunia!

Chesto vurria p’ ’o munno sano sano!
chesto vurria p’ ’a gente ’e copp’ ’a terra!
ca mpace e libertà, c’ ’o core mmano,
avria pe sempe alluntanata ’a guerra.

Ingenuamente

p’ ’o nniro ’e st’ uocchie ’ammennola lucente

INGENUAMENTE

di Epifanio Rossetti

... Sarrà pe’ st’ andatura ammartenata,

p’ ’o nniro ’e st’ uocchie ’ammennola lucente,

cert’ è, ca si ve guardo, una vutata

ve vularria pe’ me tutt’ ’e mumente !

Zitto ! Nanni, haggio fatto na penzata:

facimmo cunto comme, overamente,

vui, comm’ a me, nun fusseve accasata,

e i’ cercarria ’sta mana, ingenuamente.

Redite? E si ’sta risa è pe’ risposta,

vo’ di’ ch’ è ’a mia ’sta mana. E, allegramente,

senza me di’ ca tengo ’a faccia tosta,

faciteme stutà ncopp’ a ’stu musso,

st’ arzura ca m’ abbrucia ’e vvene ardente !

’stu core dato a ffuoco cu ’stu rrusso !

Mentre tu duorme

Tu duorme, sì, ma nzuonno ’un truove pace

MENTRE TU DUORME

di Claudio Pennino







Mentre tu duorme, dint’a nu chiarore,
i’ mm’avvicino a tte quase a tuccarte…
Mm’accosto chiano e, senza fà rummore,
risciato ’o sciato tuio pe nun scetarte.

Tu duorme, sì, ma nzuonno ’un truove pace.
’E ccarne te prufumano ’e viuletta…
E, mentre smanie e nun te faie capace,
mpietto te se sbuttona ’a camicetta.

Mentre tu duorme, marmo cristallino,
i’ veco comm’è fatto ’o Paraviso…
Te sfioro appena ’o musso curallino,
e, ’a dint’ ’o suonno, faie nu pizzo a riso.

Mentre tu duorme, ’a luna, lentamente,
trase p’ ’e llastre e t’accarezza ’a fronte…
Sciùlia p’ ’e spalle… e te fa trasparente
comm’a na purcellana ’e Capemonte…

Tu duorme, e i’ conto ’e stelle a una a una…
Chi sa’, a stu mumento, tu addó staie…
Ncopp’ ’a sta vocca, ancora nfosa ’e luna,
te do’ nu vaso e tu nemmanco ’o ssaie.




(da Vela ’e penziere, 1999)

Donn' Amalia 'a speranzella

quanno frie paste crisciute,

mena ll’ oro ’int’ ’a tiella

DONN’AMALIA ’A SPERANZELLA

di Salvatore Di Giacomo





Donn’ Amalia ’a Speranzella,
quanno frie paste crisciute,
mena ll’ oro ’int’ ’a tiella,
donn’ Amalia ’a Speranzella.

Che bellezza chillu naso
ncriccatiello e appuntutiello,
chella vocca ’e bammeniello,
e chill’ uocchie, e chella faccia
mmiez’ ’e tìttole e ’a vurraccia!

Pe sta femmena cianciosa
io farrìa qualunque cosa!…
Piscetiello addeventasse,
dint’ ’o sciore m’ avutasse,
m’afferrasse sta manella,
mme menasse ’int’ ’a tiella
donn’ Amalia ’a speranzella!

Acqua, cumpagne, 'o core è na vrasera

ca c’è venuto Ammore c’ ’a bannera

ACQUA, CUMPAGNE, ’O CORE È NA VRASERA

di Claudio Pennino




Acqua, vicin! ché nel mio core io ardo



Acqua, vicin! ché nel mio core io ardo:
venite, soccorretelo, per Dio!
ché c’è venuto Amor col suo stendardo,
che ha messo a foco e fiamma lo cor mio.
Dubito che l’aiuto non sia tardo;
sentomi consumare: ohimé, oh Dio!
Acqua, vicini! e più non indugiate,
ché il mio cor brucia, se non l’aiutate.


Angelo Poliziano







Acqua, cumpagne, ’o core è na vrasera



Acqua, cumpagne, ’o core è na vrasera:
currite, succurritelo, pe Dio!
ca c’è venuto Ammore c’ ’a bannera,
e ha miso a fuoco e fiamme ’o core mio.
Ma veco ca tardate ’e ogne manera;
i’ me ne struio, facitelo pe Dio!
Acqua, cumpagne, meh nun aspettate,
ca ’o core abbrucia, si nun l’aiutate. 


Claudio Pennino



(da Na guardata amurosa, 2006)

Campanilismo

Le fanno ’e ffeste, aizano ’o pavese

CAMPANILISMO

di Raffaele Viviani

Nu Milanese fa na cosa? embè,

tutta Milano: - Evviva ’o Milanese!

È rrobba lloro e l’hann’ ’a sustenè,

e ’o stesso ’o Turinese e ’o Genovese.

Roma? : - Chisto è Rumano, e si è Rumano,

naturalmente vene primma ’e te.

Roma è la Capitale! E si è Tuscano,

Firenze ne fa subbito nu rre.

Si fa na cosa bona nu Pugliese?

Bari, cu tutte ’e Ppuglie, ’o ffa sapé.

Si è d’ ’a Basilicata o Calavrese,

na gara a chi cchiù meglio ’o pò tené.

È nu Palermitano o Catanese?

tutt’ ’a Sicilia: - Chisto è figlio a mme!

Si è n’Umbro, Sardo, Veneto, Abruzzese,

’a terra soia s’ ’o vanta comme a cche.

Le fanno ’e ffeste, aizano ’o pavese:

senza suttilizzà si è o nun è.

Nun c’è nu Parmigiano o Bolognese

ca ’e suoie nun s’ ’o difendono; e pecchè

si è nu Napulitano, ’a città soia,

’o ricunosce e nun ce ’o ddà a paré?

S’ ’o vasa ’nsuonno e nun le dà sta gioia.

E ’e trombe ’e llate squillano: « Tetèee! »

Qualunque cosa fa, siente: - « E ched'è? »

« ’O ssaccio fà pur’io. » « Senza pretese. »

E chesto simme nuie. Dopo di che,

nun se fa niente ’e buono a stu paese?

E tu, Napule mia, permiette chesto?

Strignece ’mpietto a te, figlie e figliaste.

Arapencelle ’e braccia e fallo priesto:

avimm’ ’a stà a « guaglione » e simmo maste.

T’avante ’e vermicielle, ’e ppummarole:

mmescace pure a nuie si ’o mmeretammo.

Che vvuò ca, cu stu cielo e chistu sole,

te dammo nu saluto e ce ne jammo?

Campanilismo bello, addó si ghiuto?

Facimmolo nuie pure comme a ll’ate,

si no p’ ’a gente ’e Napule è fernuto,

e nun sarrammo maie cunsiderate.

Talento ne tenimmo, avimmo ingegno:

nu poco sulo ca ce sustenimmo,

cunquistarrammo chillu posto degno

ca, pe mullezza nosta, nun tenimmo.

Quanno na cosa è bbona e è nata ccà,

nu milione ’e gente l’ha da dì.

E vedarraie po’ Napule addó va,

cu tutto ca è ’o paese d’ ’o ddurmì.