Quanno 'e vvote 'o suonno trica

’E notte, quanno ’e vvote ’o suonno trica

e tuttecose attuorno se fa scuro

QUANNO ’E VVOTE ’O SUONNO TRICA

di Claudio Pennino

’E notte, quanno ’e vvote ’o suonno trica

e tuttecose attuorno se fa scuro,

nun saccio si è p’ ’a smania o p’ ’a fatica,

ma ’nnant’a ll’uocchie mme veco criaturo.

Me veco piccerillo ’e seie sette anne,

e veco ’a casa addó me so’ ccrisciuto.

Nu barcunciello sempe chino ’e panne,

ca ’o sole nun lassava nu minuto.

Doppo asciuttato maglie e cazuncielle,

sciuliava dinto, ’ncopp’a ogne riggiola,

addó ce veco ancora ’e surdatielle

’ncopp’ ’e muntagne fatte ’e libbre ’e scola.

Veco allummate ’e lluce d’ ’o lampiere

quann’è Natale e dint’ ’e mmeglie feste.

Càvere ancora, struffole e pastiere,

facevano appannà spiecchie e ffeneste.

Erano ’e tiempe ’e quanno na iurnata

vulava comm’ ’o viento, all’aria aperta.

Quanno magnave pane e cutugnata,

e te spassave arreto a na lacerta.

Penzanno a chell’età semplice e allera,

se stregne ’o core e vola ’a fantasia…

e sento ’nfaccia, scennere liggera,

na lacrema ch’è na malincunia.

E ’o suonno nn’ave pena, e vene doce.

E veco a mamma mia, giovane e bella,

ca mm’accarezza e canta sottavoce:

« ’O lupo s’ha magnato ’a pecurella…»

(da ’A strata d’ ’e stelle, 2001)

Na dummeneca passa

Chist’ arbere ’e Furia c’ ogne anno, ogne anno,

cchiù s’abboccano ’ncopp’ ’o marciappiere

NA DUMMENECA PASSA

di Rocco Galdieri

’Na dummeneca passa e ’n’ ata vene,

e tutte ’o stesso e tutte tale e quale!

’I’ quant’ accunte c’ ’o barbiere tene!

’I’ quanta folla ’int’ a dd’ ’o spezziale!

’E tramme chine... ’E ccarruzzelle chiene...

Passano ’a princepala e ’o princepale,

che vanno a’ messa e apparo apparo vanno.

Passa ’o culleggio... Duie carabiniere...

’Na serva cu’ ’na guardia duganale,

ca s’alliscia ’o mustaccio e ca passanno,

se mmira ’int’ ’a vetrina d’ ’o barbiere.

Gente che vene e va senza penziere,

sott’ all’arbere ’ncopp’ ’o marciappiere...

(E ’st’ arbere ’e Furia c’ogne anno, ogne anno,

cchiù s’ acalano ’ncopp’ ’o marciappiere,

ma cchiù verde e cchiù morbede se fanno...)

’E tramme chine... ’E ccarruzzelle chiene...

Cchiù giovene esce ’accunto d’ ’o barbiere...

Cchiù cresce ’a folla ’int’ a dd’ ’o spezziale!

E comme addora ’sta pasticciaria!

’Na dummeneca passa e ’n’ ata vene,

e tutte ’o stesso e tutte tale e quale

pe’ me... che guardo ll’arbere ’e Furia!

Chist’ arbere ’e Furia c’ ogne anno, ogne anno,

cchiù s’abboccano ’ncopp’ ’o marciappiere,

cchiù verde e malinconeche se fanno!

Ggelusia

e te turmiente e muore ’e ggelusia

GGELUSIA

di Vittorio Parisi

Tu ca saie buono quanno io parlo appena

e meglio ancora quanno me sto’ zitto,

tu ca t’adduone quanno stongo ’e vena

o puramente quanno stongo afflitto,

e me vuò bene e suoffre ’e chistu stato,

e te turmiente e muore ’e ggelusia,

nun ll’hê capito ca, si sto’ malato,

so’ malato ’e te sola, anema mia?

Gelosa? ’E chi? Pecché? Tu ’o ssaje, tesoro,

ca si’ tutto pe me... Qua’ gelusia?

Qua’ gelusia, si quanno me ne moro

i’ chiammo primmo a tte, po’ a mamma mia?

Matenata

Na scolla ncopp’ ’e spalle ’e seta fina

MATENATA

di Mario Sieyes

Pe me scetà matino, na matina,

cu Rosa me ncuntraie ncopp’ ’a Nfrascata:

Era ’e settembre, e ll’aria settembrina

faceva doce e fresca ’a matenata.

Na scolla ncopp’ ’e spalle ’e seta fina,

na vesta ’e percallina trafurata,

uocchie ’e velluto e vocca curallina,

bella e gentile comm’a na pupata.

« Bongiorno! » lle dicette. Rispunnette

quase acalanno ll’uocchie a stu saluto,

e rossa comm’ ’o ffuoco se facette...

Mo ca sapite ’o fatto comm’è gghiuto,

ve voglio sulo dì: benedicette

chella matina ch’ero ’e pressa asciuto!

Bongiorno, Ro'!...

dico: - Bongiorno, Ro’!...

BONGIORNO, RO’!...

di Salvatore Di Giacomo

Rosa, si chiove ancora

nun t’ammalincunì,

ca d’ ’o bontiempo ll’ora

sta prossema a venì.

Nun vide? ’E luce ’e sole

luceno ’e st’acqua ’e file;

è ’a morte d’ ’e vviole,

so’ ’e lacreme d’abbrile.

Ma mo cchiù ffresca e ffina

ll’aria se torna a fa’...

Meh!... A st’aria d’ ’a matina,

Rosa, te può affaccià.

Arape ’e llastre: arape

sta vocca piccirella

addó sulo ce cape

nu vaso o na resella,

canta: chist’ è ’o mumento;

tu cante e io, chiano chiano,

mme faccio ’a barba e sento,

cu nu rasulo mmano.

E penzo: « ’A i’ ccà; s’affaccia...

Mm’ ha visto... Mme saluta... ».

E c’ ’o sapone nfaccia

dico: - Bongiorno, Ro’!...

'A mesura d' 'e ccose

nun se po’ mmesurà ll’ammore ’e mamma

’A MESURA D’ ’E CCOSE

di Claudio Pennino

                                             Il vero amore non ha

                                         mai conosciuto misura.
                                                                   Properzio

Tutto, a ’stu munno, se po’ mmesurà:

na cosa piccerella piccerella,

ca nun ce abbasta ’a lente p’ ’a guardà,

o puro grossa assaie, quant’a na stella.

Se po’ piglià ’a mmesura a ogne cosa,

e tutt’ ’e ccose, doppo, so’ cchiù chiare.

Se ponno cuntà ’e spine a ogne rosa,

o quanta gocce d’acqua tene ’o mare.

’O pizzo ’e na muntagna o nu sprefunno,

na pena nchiusa ’int’a na lacremella.

Pe fino ’o sole, accussì largo e ttunno,

s’è fatto ammesurà c’ ’a valanzella.

E, ogne cosa, doppo mmesurata,

pare cchiù grossa si era piccerella;

e chella grossa pare cchiù aggrazziata,

cu tutto ch’era storta e bruttulella.

Na cosa sola nun tene mmesura,

e nun ce stà ’o strumento, né ’o prugramma,

ma ’e tuttequante è chella cchiù sicura:

nun se po’ mmesurà ll’ammore ’e mamma.

(da ’A pianta d’ ’a felicità 2004)

Beneditto 'o mese 'Austo

BENEDITTO ’O MESE ’AUSTO

di Francesco Fiore

Quanno vene ’o mese ’Austo,

tutt’ ’o mese faccio festa...

Veco a Rosa senza busto,

Carulina senza vesta...

E Maria, bella e curtese,

sott’ ’a voce m’amminaccia:

“Quanno sponta chistu mese,

te sceppasse ll’uocchie ’a faccia!...”

Quanno vene ’o mese ’Austo,

’sti ffigliole senza busto,

me piace d’ ’e guardà,

d’ ’e tuccà,

d’ ’e vvasà!...

Ma che spasso!... ma che gusto!

Beneditto,

beneditto,

beneditto ’o mese ’Austo!

’Nterra ’a spiaggia...vih! che sole!

manco ’o mare me rinfresca...

Ch’aggi’ ’a dì? chesti ffigliole,

songo ’o ffuoco ’nfaccia a ll’esca!...

Veco ’a rossa... ’a bionda... ’a bruna...

cierti piezze speciale:

“Signurì, bona furtuna!

site asciuta d’ ’o spitale?!”

Quanno vene ’o mese ’Austo

ecc.

Quanno vene ’o mese ’Austo,

ogne femmena ’o ffà apposta,

no p’ ’o caldo, no, è pe’ gusto

ch’addeventa faccia tosta!...

’Nnant’ a mme, ’a signora a pporta,

pe’ se fà ’na sciorta ’e risa

passa e spassa for’ ’a porta

sulamente c’ ’a cammisa!...

Quanno vene ’o mese ’Austo

ecc.

musicata da Gaetano Lama, 1924

Austo!

AUSTO!

di Peppino De Filippo

È troppo ’o calore

’e ’stu mese d’austo...

Io mò squaglio ’e sudore,

me sento ’e murì.

M’avoto e me giro

pe dint’ ’e llenzole...

Me manca ’o respiro,

nun saccio che ffa’!

Si mò se truvasse

cu mme Carmenella,

che sfizzio, che spasso

si stesse cu me.

Sultanto a vasà

chella vocca addirosa

’nu buono refrisco

putesse pruvà.

Nun trovo arricietto...

me soso, me cocco...

’Stu cavero ’e lietto

nun pozzo suffrì.

Me stenno, m’arrogno,

me metto ’ntravierzo,

me è tanto ’o bisogno

che sento ’e sciatà.

Si mò se truvasse

cu mme Carmenella,

ecc.

Cammino p’ ’a stanza,

m’assetto a’ pultrona,

cu ’a sola speranza

e puté arrepusà...

Arapo ’o balcone,

ca ’st’afa ’e calore

’e ’stu sole lione

cchiù peggio mme fa.

Si mò se truvasse

cu mme Carmenella,

ecc.

Si overo more 'o cuorpo...

E doppo che sarraggio, na semmenta?

n’albero? quacche frutto prelibbato?

SI OVERO MORE ’O CUORPO...

di Raffaele Viviani

Si overo more ’o cuorpo sulamente

e ll’anema rinasce ’ncuorpo a n’ato,

i’ mo so’ n’ommo, e primma che so’ stato?

na pecora, nu ciuccio, nu serpente?

E doppo che sarraggio, na semmenta?

n’albero? quacche frutto prelibbato?

Va trova addò starraggio situato:

si a ssulo a ssulo o pure ’mmiez’ ’a ggente.

Ma i’ nun ’e faccio sti raggiunamente:

i’ saccio che songh’io, ca so’ campato,

cu tutt’ ’o buono e tutt’ ’o mmalamente.

E pe’ chello che songo sto appaciato:

ca, doppo, pure si nun songo niente,

saraggio sempe n’ommo ca so’ nato.

Pe dint’ ’o pertusillo

veco ’e ciardine nsciore

’O PERTUSILLO

di Claudio Pennino

Se non diventi un bimbo,

non entrerai là dove sono i figli di Dio:

la porta è troppo piccola.

 A. Silesio

S’ha dda turnà criaturo,

hê ’a turnà piccerillo,

sinò nun ce passammo

pe dint’ ô pertusillo.

’E vvote faccio ’a prova

si casumaie ce passo:

ma chillo pare fatto

c’ ’a ponta d’ ’o cumpasso.

Pe dint’ ’o pertusillo

veco ’e ciardine nsciore

e ogne bene ’e Ddio:

na luce… nu splennore.

Na museca pe ll’aria

ca te sulleva mpiso…

Ggiesù che maraviglie

dint’a ’stu paraviso.

Ma pe passà ’o pertuso,

nun s’hann’avé paure:

ce vo’ ll’anema leggia

ca teneno ’e ccriature.

Chell’anema nnucente

cchiù ghianca d’ ’a culata,

pulita, cristallina,

ch’è sempe mmaculata.

E passe mare e munte,

e ’e pizze cchiù annascuse:

cu quatte zumpetielle,

tenenno ll’uocchie nchiuse.

Chesto ce vo’ e nient’ato

pe passà ’o pertusillo:

basta ca mpietto tiene

nu core ’e piccerillo.

(da Primma ca scura notte, 2009)

Gentilhommerie

ché se tu scendo abbasso all’Acquaquiglia,

conoscerai un furmino io chi è

GENTILHOMMERIE

di Libero Bovio

Noi siamo canoscenti di famiglia,

io voglio bene ad ello ed ello a me;

ho detto al patro: Se mi dai tua figlia

è un crandissimo onoro anco per te,

ché se tu scendo abbasso all’Acquaquiglia,

conoscerai un furmino io chi è,

ed inti poi comanto la quatriglia,

perché proceto con il « calatè ».

Nel caso in cuio nel qualo vi necato

a questo matrimmonio, io m’addinocchio

ai vostri pieto e dico: Preddonato...

E, senza la più piccola amminaccia,

a voi vi sputerebbe dentro a un occhio,

e alla bardascia le tagliasse ’a faccia.

Vasann' a tte

Nu vaso tira sempe n’atu vaso

VASANN’ A TTE

di Enzo D’Orsi 

Nuje ce vulimmo bene ’a quatto mise,

e s’ i’ putess’ avé miezo turnése,

miezo turnése sulo p’ogni vvaso

ca ncopp’ ’a vocca toja ’sta vocca cóse,

i’, mo’ ’nce vo’, nun abbarass’ a spese:

me fravecasse nu palazz’ ’e casa,

cu sservitù, carrozze... e p’ ’e mmeriuse

cientocinquanta para ’e corne appese!

’E vase ca mme daje, tutta cianciosa,

so’ traseticce, tiénnere e azzeccuse,

e tantu ffuoco ’ncore m’hanno miso

ca me pare mill’anne ca te sposo.

Tu te nne viene po’ ca so’ veziuso!

Nu vaso tira sempe n’atu vaso,

comme fosseno fravole e cerase

ca cchiù ne magne e cchiù ne si’ guliuso.

Ma dimme, stammatina che ’nc’ hê miso

’ncopp’ a ’sta vocca toja carnale e ’nfosa?

Quanto zuccaro e mèle e fronn’ ’e rosa,

si tanto doce ’mmocca m’è rummaso

e ll’aria è attuorn’ a mme tant’addurosa,

ca si risciato e tengo ll’uocchie ’nchiuse...

nun saccio si me trovo ’mparaviso

o me stesse sunnanno ca mme vase.