Brinneso a 'e rrose

sentono ll’aria

ch’addora ’e rose!

BRINNESO A ’E RROSE

di Salvatore Cerino

Stu cielo limpido,

turchino ardesio,

ce percia ll’anema,

ce fa senzìbbele,

ce dà na smania

vera e sincera

pe ddì’: « Sentitela

sta Primmavera! »

Pe ddì’: « Scetateve,

gente nguttose...

sentite ll’aria

ch’addora ’e rose! ».

È nu ncantésemo!...

’E sta jurnata,

’e ppiante lucene

nfos’ ’e rusata!

’E ffronne crescene...

criscenno ridono...

ca n’aria tennera,

accarezzannole,

fa suspirà,

e se cunzolano,

se tuculéano

tutte cianciose:

sentono ll’aria

ch’addora ’e rose!

L’aucielle sfrenano,

pare mpazzìscene

p’ ’a gioia ’e ll’anema...

po ntennerìscene,

ma nun se calmano:

sentono ’a smania

e a cchiorme volano

pe dint’ a st’aria

e a ccoro cantano

pe ncopp’ a ll’asteche,

pe mmiez’ a ll’albere

e fanno musiche

belle e armuniose:

sentono ll’aria

ch’addora ’e rose!

Pe st’aria ’e zucchero

ch’è cchiù d’ ’o balzamo,

’e sciure schioppano

ca se profumano

e ’addore spannene

ca fanno mettere

suspire amabile,

mentre ’e caruofene

ca songo mascule,

tutte s’attesano

ca se pretènnene

belle e addiruse

p’ ’e rrose morbide

ch’ hanna fa ’e spuse.

P’ ’o mare placido

(mare ’e Pusilleco

ch’è sempe musica)

già ’e vvele sfilano

e ll’onne tremmano,

cu ’o sole ridono

e brillantéano...

Mentre se smòvene

cu n’armunia,

ncantano ll’anema,

ch’ ’a fanno sentere

tanta poesia!...

Po st’onne fràgnene

quase schiattose

p’ ’a troppa mmidia

ch’ hanno d’ ’e rrose.

Quanta malizia!...

Che desiderio

chest’aria provoca:

e ognuno ntenne

n’ammore tiénnero,

n’ammore languido

mentre risbrenne

nu sole d’oro!

Amice, aizàmmece!...

brindammo a ccoro

ncopp’a st’aglianeca

ca ce fa sentere

nzieme cu ’e ccose

belle e addiruse:

« Evviva ’e rrose! Evviva ’e rrose! ».

'A bbona vita

e vulesse fà n’arte o nu mestiere

che cummannasse ’a pezza ogne minuto

’A BBONA VITA

di Raffaele Chiurazzi

Mme ne vuless’i’ dint’a nu quartiere

addó ’a nisciuno fosse canusciuto;

e vulesse fà n’arte o nu mestiere

che cummannasse ’a pezza ogne minuto.

M’affittasse nu vascio e mme mettesse

cu na guappa catena d’oro a llato.

Po’, ’mmerzo ll’una,’o “Roma” mme liggesse,

bello, cu nu denucchio ncopp’a n’ato.

Proprio rimpetto ’o vascio ce tenesse

nu gravunaro cu na faccia nera,

ca mme fosse cumpare e i’ mm’ ’a ’ntennesse,

cumpare e bbuono, pure cu ’a mugliera!

Sunetto LXXV

quanno, annascosta, ’o core mio te tene,

tanno vulesse dicere: « È d’ ’a mia!»

SUNETTO LXXV

di Claudio Pennino

                                                   da W. Shakespeare

Tu si’ pe mme, comm’ ’o mmangià p’ ’a vita,

o comme, p’ ’o tturreno, n’acqua ’e maggio,

e soffro, pe ’sta faccia toia pulita,

comme ll’avaro tremma p’ ’o rammaggio.

Mo mm’appauro ’e perdere ’stu bbene,

mo, pe ’st’ammore, vaco nfantasia;

quanno, annascosta, ’o core mio te tene,

tanno vulesse dicere: « È d’ ’a mia!»

Me sazio, ê vvote, sulo ’e ’sta bellezza,

ma doppo già sperisco na guardata;

e nun voglio né cerco ata ducezza

’a fore ’e chello ca tu già m’hê data.

E accussì sto’ mo sazio e mo affammato,

’e tutto cannaruto e maie saziato.

© Claudio Pennino

LXXV

di W. Shakespeare

Tu sei per la mia mente come il cibo per la vita,

Come le piogge di primavera sono per la terra;

E per goderti in pace combatto la stessa guerra

Che conduce un avaro per accumular ricchezza.

Prima orgoglioso di possedere e, subito dopo,

Roso dal dubbio che il tempo gli scippi il tesoro;

Prima voglioso di restare solo con te,

Poi orgoglioso che il mondo veda il mio piacere.

Talvolta sazio di banchettare del tuo sguardo,

Subito dopo affamato di una tua occhiata:

Non possiedo nè perseguo alcun piacere

Se non ciò che ho da te o da te io posso avere.

Così ogni giorno soffro di fame e sazietà,

Di tutto ghiotto e d’ogni cosa privo.

Nun se leva cchiù...

’stu segno è sulamente

ammore e niente cchiù

NUN SE LEVA CCHIÙ

di Claudio Pennino

 Ad Arianna

Nfaccia tiene nu segno;

guardate dint’ ô specchio:

è ccomm’ a nu disegno

ca nun se leva cchiù.

Quase vicino ô musso

addó pare ca tiene

chillu melillo russo

ca bbella assaie te fa.

Si tu ce passe ’a mana

se sente sott’ ê ddete

comm’ a na filigrana

ch’è cchiù ’e na rarità.

Pare n’abbruciatura

’stu segno ca t’hê fatto

quann’ire na criatura,

e mmo sta ancora llà.

Renunzia, nun se leva,

haie voglia ’e lavà ’a faccia;

comme fosse na freva,

s’appiccia e vvo sfucà.

’O ssiente ’o ffuoco ardente?

’o vvire comm’abbruscia?

’stu segno è ssulamente

ammore e nniente cchiù.

È cchisto ’o primmo vaso

ch’aviste appena nata;

e ’a tanno llà è rrummaso

e nun se leva cchiù!

(da Primma ca scura notte. 2009)

Ammore e sentimento

guardateme int’ a ll’uocchie, anema mia

AMMORE E SENTIMENTO

di Vincenzo Belfiore

Si chistu core mio parlà putesse,

(ma ’o puveriello ’a voce nun ’a tene)

chi sa’ che belli ccose ve dicesse

pecché, vedenno a vuje, spezza ’e ccatene.

Si vuje, sulo pe n’attimo, mettite

’sta capuzzella ’ncopp’ ’o pietto mio,

senza essere duttore v’accurgite

’e comme sbatte chest’anema ’e Dio!

E si nun v’abbastasse e, ’a poesia

nun fosse bona a di’ chello ca j’ sento,

guardateme int’ a ll’uocchie, anema mia,

e ce liggite ammore e sentimento!

'A mamma d' 'e ccriature

IN LIBRERIA

'A MAMMA D' 'E CCRIATURE

di Claudio Pennino

Il volume è una raccolta di nomignoli, soprannomi, eufemismi e metafore della lingua napoletana relativi all'organo genitale femminile. La ricerca delle voci riportate in questo "curioso" dizionarietto, è tutta ricavata dai Vocabolari compilati da lessicografi napoletani, e da testi letterari. L'Autore, inoltre, si è preoccupato di fornire al lettore le ragioni pratiche che hanno determinato l'estensione del senso originario di ciascun vocabolo. Il lavoro, che per il particolare argomento trattato potrebbe apparire, ai più, un frivolo e goliardico nomenclatore napoletano dell'organo genitale femminile, oltre ad un mero approfondimento semantico-linguistico della parlata napoletana, ci offre l'occasione per conoscere la cultura, i tabù, i costumi e la mentalità del nostro popolo. E quindi una visione più ampia del pianeta femminile e degli atteggiamenti che l'uomo assume e ha assunto nei suoi confronti nel corso dei secoli.

I' so' cchillo...

I’ stevo ’e faccia e Isso appiso ô muro

I’ SO’ CCHILLO...

di Claudio Pennino

I’ stevo ’e faccia e Isso appiso ô muro:

« I’ so’ cchillo ca s’è scurdato ’e Te!

- dicette annascunnennome ’int’ ’o scuro -

e Tu, Tu t’arricuorde ancora ’e me?

I’ songo cchillo ca t’ha iastemmato

quanno ’e ccose nun ghieveno a dderitto.

E cchillo so’ ca, doppo, t’ha priato

quanno me so’ truvato dint’ ’o stritto.

Nzomma – cuntinuaie – i’ so’ cchillo

ca piglià se vuleva ’o posto tuio,

quanno nun saccio stà, nu pucurillo,

nemmanco ô pizzo mio, ca lasso e fuio.

E po’, comm’ommo, ’o posto tuio qual è?

Ncopp’a na Croce! Chisto è ’o trattamento?

Tu vide quanta presunzione. Embè,

faie buono si mm’abbrusce a ’stu mumento.

I’ so’ cchillo ca s’è scurdato ’e Te!

E Tu? Tu no. Tu me tenive mente.

Me purtave, senza te fà vedé,

quann’ero nu cecato mmiez’ â ggente.

E t’aggio ntiso quanno me parlave

e me sanave ’o core d’ ’e ppaure...

e t’aggio visto quanno mm’abbracciave

strignennome cu ’e mmane d’ ’e ccriature. »

(da Primma ca scura notte, 2009)

Chiaro 'e luna

Dint’ ’o vico ’o chiaro ’e luna

ha schiarato tutte ’e ccase

CHIARO ’E LUNA

di Antonino Alonge

Dint’ ’o vico ’o chiaro ’e luna

ha schiarato tutte ’e ccase,

e me pare quase quase

ch’ ’e vvulesse ’nargentà...

Na campana sona ll’una,

nun se sente cchiù na voce;

è na notte fresca e doce

d’ ’o pprincipïo ’e ll’està.

Ride ’a luna ’n miezo ’e stelle

e fa luce a’ terra e ô mare;

si na nuvola accumpare

s’annasconne e ’a fa passà.

Cu sti nnotte accussì belle

ogne vota ca m’affaccio

guardo ’o cielo e, nun ’o ssaccio,

ma me vene ’e suspirà...

Penzo a te ca si’ luntana,

penzo a te ca nun si’ ’a mia;

e suspiro... e te vurria

tutta mia, sempe cu me!

E pe tutta ’a notte sana

accussì passano ll’ore;

sponta ’o sole, ’a luna more,

veco ’e stelle scumparé...

Tu

ogne vota ca nzierre ’st’uocchie ’e fata

TU

di Peppino De Filippo

Ogne suspiro ca ’sta vocca manna

nasce nu sciore ncopp’ a chistu munno.

Ogne llàcrema toja, femmena cara,

nu sciore se ngiallisce, cade e more.

Ogne surriso tujo, ’nnammuratella,

nasceno a mmare trentaduje curalle,

ogne vota ca nzierre ’st’uocchie ’e fata

songhe ddoje stelle ca ’stu cielo stuta!

Maggio

Manca tutto a chi manca ’a libertà

MAGGIO

di Edoardo Nicolardi

Bongiorno, Amà. Bongiorno. È tardulillo.

Se sentono ’e canta ll’aucielle attuorno.

Ma vuie, vuie ve scetate albante juorno

                pe’ guvernà ’o cardillo

pecché, sentenno a ll’ate, ha ddà cantà.

È maggio, è maggio. Addora ’a Primmavera

dint’ ’e sciure, ’int’ a ll’albere, ’int’ a ll’erba

                nfosa ’e rusata,

                tènnera e cenera;

                dint’ a ’st’ aria liggiera,

dint’ a ogne core ca se sceta e spera,

doppo durmuto tanto, ’int’ ’a vernata,

                malinconicamente.

E se fa buono chi fuie malamente.

E aggarbata se fa chi fuie superba...

                (...comme vuie sempe site stata, Amà!)

Maggio. ’Int’ ’e rrose, ancora nchiusulelle,

- pe’ zucà ’o ddoce - ’a vespra s’annasconne.

Quant’aucielle nn’ammore, mmiez’ ’e fronne!

Quanta cose se diceno, cantanno!

E mo’ acchiuppanno e mo’ arapenno ’e scelle,

chiamma ’a femmena, e ’o masculo risponne.

(Comme cchiù bbuone ’e nuie songo ll’aucielle!)

E, si ’o nivo nun teneno, s’ ’o fanno

dint’ a na ceppa, cu ddoie pagliuchelle...

Maggio! E, pe’ ttuorno ’e ccase, ’e rrundinelle

volano, cu nu vuolo capricciuso,

struscianno ’o pietto ’int’ ’o turreno nfuso,

pe’ fravecà, cu ’stu turreno, ’o nivo

sott’ ’a pennata, o azzicco ’a cemmenera.

Che priezza che porta ’a Primmavera!

***

E ’stu cardillo, sutterrato vivo,

nzerrato dinto a na caiola nera,

ca vede ’o cielo blu, ll’arbere verde,

’sta campagna assolata ca se sperde

nzi addò ll’uocchio speruto ’a po’ arrivà;

e se mmesura ’int’ ’a caiola, astritto,

e nun sbatte, e nun zompa annanze e arreto;

guarda surtanto!... Guarda e sta cuieto.

E nun canta, ’o vedite? Zitto e zitto,

ncopp’ ’o teraturiello d’ ’o mangià.

Tene tutto, è accussì ? Semmenta ’e cardo,

cimma ’e lattuca... Nun lle manca niente.

È overo? Embè: guardate, comm’ i’ guardo,

’stu cielo blu, liggiero e trasparente,

’st’ aria lucente, st’ arbere lucente...

Niente lle manca? Embè: tenite mente.

Manca tutto a chi manca ’a libertà.

Amalia, Amà! Si me vulite bbene,

arapite ’a caiola a ’stu cardillo...

Datele ’a libertà. Cacciatennillo,

si me vulite bene overamente.

Nun saccio che curaggio ch’ uno tene

a ffa male accussì, pe’ se spassà!

E ’stu curaggio vuie ll’ îte tenuto.

(Va trova senza manco ce penzà).

E che male v’ ha fatto, comme fosse,

’stu core piccerillo, annascunnuto

dint’ a ddoi' penne cennerine e rosse?

So’ scemo, è overo. E che pietà me vene,

e che pena ne tengo ’e ’stu cardillo

nchiuso ’int’ ’e fierre, addò ch’ era crisciuto

pe’ ffa nu nivo, pe’ vulà e cantà!

So’ scemo, è overo. Che vvulite fa’!...

Tengo i’ pure nu core piccerillo

ca ’e vvote tremma pe na scemità.

Comm' a na rosa

Comm’ a na rosa a ll’aria matutina

COMM’ A NA ROSA

di Salvatore Ragosta

Comm’ a na rosa a ll’aria matutina

che ’a miez’ ’e ffronne, tutta cuntignosa,

s’affaccia appena, e a ’o ffrisco d’ ’a matina

pare cchiù bella, cchiù rossa e cianciosa,

accussì tale e quale Carulina,

ch’ è tanta bella e fa tant’ ’a scurnosa,

quanno mme vede se fa na resella

e trase e ghiesce ’a chella fenestella...

Bellezza bruna, ca ’nfenesta state

e arret’ ’a ggelusia v’annascunnite,

v’ ’o mmaginate o nun v’ ’o mmagginate

che bella ’mpressione mme facite?

Sciummo ca scorre vuie comm’ ’o fermate?

Ammore e tosse comm’ annascunnite?

E a chi aspettammo pe’ fenì stu juoco,

si nuie sentimmo mpietto ’o stesso fuoco?

e pare cchiù guaglione e cchiù cuntento

’O PRESIDENTE

di Claudio Pennino

                                             a mio padre

’O chiammano accussì: ’o Presidente!

Pecché è ’o capintesta d’ammuina.

E’ presidente d’ ’e divertimente,

d’ ’a bbona cumpagnia e d’ ’e festine.

E nun c’è festa si nun stanno ’e suone.

Lle piace ’a canzuncella a filo ’e voce,

’a partetella ’e carte e ’o vino bbuono;

e pe’ ddesserte: tutt’ ’a rrobba doce!

P’ ’a rrobba poca ’un prova simpatia…

Lle piace ’a ggente assaie, ’o votta-votta.

E’ ’o presidente d’ ’a squarciunaria:

si ha dda fà nu sternuto ne fa otto.

Sempe ’mmiez’ ’o bburdello: è bazzeriota,

è zingaro, è scugnizzo, è gravunaro…

Se sposa na nepota? Isso ’a fa ’a dota.

Nasce nu piccerillo? ’O fa ’o cumpare.

S’arape na puteca o cumitato,

foss’anche ’associazione d’ ’e pezziente,

nun le fa niente a restà disperato,

ma guaie si nun ’o fanno Presidente.

Se sceta ampressa, scenne ’int’ ’a nuttata,

e mentre ’a ggente sta durmenno ancora,

va a sparà ’o ffuoco quann’è ’a ’Mmaculata.

’O vico ’ntrona e ’e lluce ’o fanno d’oro.

’Ncielo s’arape nu granato russo,

e, cchiù aveto ancora, uno celeste

ca pare ’e stà assettato ’o Gambrinùs,

mentre tremmano ’e llastre d’ ’e ffeneste.

E ’mmiez’ ’o fummo ride ’o Presidente

affaccennato a cumannà ll’orchesta…

e pare cchiù guaglione e cchiù cuntento,

c’ ’a vita soia chest’è: nu iuorno ’e festa!

(da ’A strata d’ ’e stelle,  2001)