Ce sta nu posto

Ce sta nu posto ca prufuma ’e rosa

CE STA NU POSTO

di Claudio Pennino

Ce sta nu posto ca prufuma ’e rosa,

quanno ce vaco stongo mparaviso;

llà sulamente ’o core s’arreposa

e se cunzola cu nu pizzo a rriso.

Chi ’o cerca nun ’o trova ncopp’ ê ccarte,

e, dint’ ê libbre, ognuno va sbarianno;

chi ce vo ì, è inutele ca parte,

ca nun ce stanno strate ca ce vanno.

E nun ce vonno vele o bastimiente,

ca, a chistu posto, nun se va pe mmare.

Cu ttutto ca nisciuno sape niente,

se nformano pe gghì ggente a migliare.

A chistu posto ca prufuma ’e rosa,

comme s’arriva ognuno ’o vvo sapé;

llà sulamente ’o core s’arreposa,

e i’ ce vaco quanno sto cu tte.

(da Primma ca scura notte, 2009)

strignenno dint’ ’e mmane

na rosa prufumata.

’A FINE D’ ’O MUNNO

di Claudio Pennino

              Appuntamento a Capemonte

Leggo ncopp’ ’o ggiurnale,

stampato chiaro e ttunno:

« Stasera a ll’otto mpunto,

vene ’a fine d’ ’o munno! »

Me faccio ’a resatella

e penzo a ’stu mumento:

«Propio stasera a ll’otto

ca tengo ’appuntamento?!… »

Vi’ quanta fessarie

se ’mmentano ’e ggiurnale.

E ntanto songo ’e sseie,

e tu si’ puntuale.

Me vesto lindo e pinto:

cammisa e fazzulette,

’o vestetiello ’e lino,

e ggià so’ fatte ’e ssette.

Felice mmiez’ ’a ggente

me faccio ’a cammenata,

strignenno dint’ ’e mmane

na rosa prufumata.

Priciso, a ll’otto mpunto,

me trovo ncopp’ ’o Tunno.

Tu spunte ’a ll’ata parte

e si’ ’a fine d’ ’o munno.

(’A pianta d’ ’a felicità 2004)

Ce sta n'aucelluzzo

ch’è affatturato e tene ’e ppenne d’oro

CE STA N'AUCELLUZZO

di Claudio Pennino

Ce sta n’aucelluzzo mmiez’ ê ffronne,

ch’è affatturato e tene ’e ppenne d’oro.

Quanno t’affacce, ’o mpiso, s’annasconne,

e ’a miez’ ê ffrasche canta: « I’ pe tte moro…»

Sott’ ’a fenesta toia, tutt’ ’a nuttata,

aggio cantato e nun te si’ affacciata.

E ’aucelluzzo, c’ ’o bbeccuccio ’argiento,

m’ha ditto: «’Sti suspire vanno ô viento!»

(da Villanelle, 2016)

'E pparole toie

Songo, ’e pparole toie, suonne ncantate

’E PPAROLE TOIE

di Claudio Pennino

Songo, ’e pparole toie, liquore doce,

barzamo ’e rose, perzeche e cannella,

e sanno ’e fiche, giesummine e noce,

nespola nzuccarata e cerasella.

Songo, ’e pparole toie, suonne ncantate:

parlano ’e draghe, Rre, Riggine e fate;

so’ sante, comm’ ’e vierze ’e na preghiera,

e addorano ’e vainiglia e de pastiera.

(da Villanelle, 2016)

'O tiempo

A precipizzio chistu tiempo passa

’O  TIEMPO

di Claudio Pennino

A precipizzio chistu tiempo passa,

e nun capisco pecché tene pressa.

Nu iuorno vene e n’ato già ll’appassa,

c’ ’a vita sana sfuma ampressa ampressa.

Si ’o vuò fermà, è inutile ogne sfuorzo,

e sissant’anne pareno nu muorzo.

Me so’ fatto capace, urdemamente,

ca sto’ perdenno ’o tiempo sulamente.

(da Villanelle, 2016)

'A strata mia

St’urdemo tratto ’e strata

facimmoncillo aunite

’A STRATA MIA

di Claudio Pennino

 Facimmo ’a stessa strata,

- longa, pesante, storta, -

e tutte ’nzieme iammo,

senza sapé addó porta.

E ghiammo, e via facenno

cuntente nuie ce aunimmo,

ma comme ’a strata saglie,

subbeto ce perdimmo.

Ma appriesso vene n’ato

cchiù svelto, cchiù sicuro.

St’ato che m’ ’o ricordo

quanno era nu criaturo.

Tutte p’ ’a stessa strata,

comm’a tanti fuiente,

guardanno fisso nterra,

senza sapé maie niente.

E mo vene na curva,

mo vene na sagliuta.

Chi m’è cchiù cara ô munno,

me lassa e me saluta.

Scumpare comm’a n’ombra.

Cchiù primma s’è abbiata…

Ce dammo appuntamento

ȃ fine ’e chesta strata.

’O tiempo ’e piglià sciato:

e ghiammo, alleramente.

P’ ’a via chesto ce aspetta:

’o bbuono e ’o mmalamente.

Guardammoce ’int’a ll’uocchie,

mo ’a strata se fa appesa.

Doppo stu tratto a lluongo

subbeto vene ’a scesa.

Restammo tutt’ ’e dduie

pe chesta via stramana,

cu nu criaturo mbraccio

e n’ato mana a mmana.

Tenimmoce vicine.

St’urdemo tratto ’e strata

facimmoncillo aunite,

comm’a na cammenata.

Senza fa cchiù dumanne...

senza truvà ’a risposta...

pecché sta strata mia

è addeventata ’a nosta.

(da Vela ’e penziere, 1999)

Si 'o core tuio...

Si ’o core tuio fosse nu libbro ’e scola

SI ’O CORE TUIO...

di Claudio Pennino

Si ’o core tuio fosse nu libbro ’e scola,

io me liggesse appena ddoie tre ccose;

e me mparasse sulo na parola...

ca è prufumata comm’ ’e ffronn’ ’e rose.

Na parulella corta e longa assaie,

ca è paraviso ma è zuffunno ’e guaie;

ch’è amara... ma nu barzamo è ’o sapore,

ca se scrive veleno e legge ammore!

(da Villanelle, 2016)

Valente cavaliere

Quanno vengo addù te, tu acala ’a trezza

VALENTE CAVALIERE

di Claudio Pennino

Me voglio fà valente cavaliere,

’e chille arresolute e preputente;

na spata quanto a chella ’e nu chianchiere,

e nu cemmiero d’oro e stralucente.

Quanno vengo addù te, tu acala ’a trezza,

sinò scarrupo ’a torre cu ’a furtezza;

e si me cade mbraccio appassiunata,

i’ stuto ’a luna cu na sciabbulata.

(da Villanelle, 2016)

Cu na faccella tonna, ride Ggiesù Bammino

LL’ADDORE D’ ’O NATALE

di Claudio Pennino

Spàrano dint’ ô vico:

sinò nun è Natale.

’A copp’a na fenesta,

s’appiccia nu biancale.

Dint’a na festa ’e luce,

se spanne attuorno e saglie

n’addore amarulillo

’e zurfo e fummecaglie.

Trase d’ ’a senga aperta

ca sta dint’ â cucina,

mmescànnose c’ ’addore

d’ ’o broro d’ ’a gallina.

Ncopp’a na vrasa, ’ntanto,

bruscia na pigna verde,

e nu prufumo ’e musco,

attuorno va e se sperde.

Natale! Na campana,

voce gentile e doce,

già sona ’a mezanotte:

e ce facimmo ’a croce.

Chesta manella toia,

’e marmo cepullino,

Ggiesù, comme prufuma

’e scorze ’e mandarino.

Cantano ’e pasturielle

ncopp’ ô presebbio: « È nnato! »

Allummano, ’e Rre Magge,

’o ncienzo prufumato.

Maria aspetta ’o figlio:

« ’A vi’ ca stenn’ ’e bbraccia? »

Tu ’o piglie e c’ ’a manella

te ll’accarizze ’a faccia.

E tutte quante ’e ccose,

nnant’a ’sta fantasia,

prufumano d’ammore,

pecché nasce ’o Messia.

Cu na faccella tonna,

ride Ggiesù Bammino,

e tutt’attuorno spanne,

n’addore ’e mandarino.

(da Primma ca scura notte 2009)

Quanno nasce nu criaturo...

QUANNO NASCE NU CRIATURO

di Claudio Pennino

Quanno nasce nu criaturo,

’ncielo, pronta, na fatella,

corre e appiccia dint’ ’o scuro,

lustra e nova n’ata stella.

Na cumeta ’nnargentata

ca lle dà forza e curaggio,

e lle ’mmosta qual è ’a strata,

comme fosse nu Rre Maggio.

E p’ ’o cielo è ’a cchiù splennente

comm’ ’a stella d’ ’o Messia.

Quanno ’a mamma ’a tene mente

dice: «Chella è ’a stella mia!»

E pe’ cchesto tanta stelle

fanno chiare ’e nnotte scure:

stelle grosse e piccerelle

c’accumpagnano ’e ccriature.

(da ’A strata d’ ’e stelle, 2001)

’O llegno sott’ ’e bòtte iastemmava

’O MASTERASCIO

di Claudio Pennino

Nu paro ’e lente sporche ’e secatura

’ncopp’a nu naso russo d’ ’o ’mbriacone,

e, areto a chella lenta sporca e scura,

dduie uocchie fisse ’ncopp’a nu bancone.

Pe’ dint’a na felinia ’nfacci’ ’o muro,

cercava ’e se salvà nu muschiglione…

e ’o masto falignamme, don Arturo,

taglianno se cantava na canzone.

’O llegno sott’ ’e bòtte iastemmava,

cu tutto ca era cippo staggiunato…

ma ’o masto, ’ndifferente, s’ ’a siscava.

E d’ ’o llegno, c’aveva iastemmato,

mast’Arturo facette, ca pregava,

nu bellu Giesucristo addenucchiato.

(da Vela ’e penziere, 1999)

Pecché te voglio bene

ncimm’a na torre te vurria tené

PECCHÉ TE VOGLIO BENE

di Claudio Pennino

Pecché te voglio bene,

i’ te vuless’avé sulo pe me;

e comm’a na riggina,

ncimm’a na torre te vurria tené.

Pecché te voglio bene,

nun suppurtasse ’e te vedé nzerrata,

e t’arapesse ’a porta

e te dicesse: « Va, si’ libberata! »

Pecché te voglio bene,

i’ me t’annascunnesse ’int’a ’sta mano,

e te strignesse forte,

pe nun te fà vedé d’ ’o munno sano.

Pecché te voglio bene,

i’ me pentesse ’e chesta debbulezza,

e t’arapesse ’a mano,

e te facesse, doce, na carezza.

Pecché te voglio bene,

i’ t’attaccasse ’o core cu ’e penziere,

e cu catene d’oro,

e te tenesse comm’ ’e priggiuniere...

Ma doppo te sciugliesse,

e te dicesse: « Niente te trattene! »

Pecché facesse chesto?

’O vvuó sapé? Pecché te voglio bene.

(da Primma ca scura notte, 2009)