'O campaniello affatato

Tengo nu campaniello ch’è affatato

’O CAMPANIELLO AFFATATO

di Claudio Pennino

Tengo nu campaniello ch’è affatato:

legge ’int’ ’o core â nnammurata mia.

È tutt’ ’e prete d’oro tempestato,

e sona quanno sente na buscia.

C’ ’a mana ncopp’ ô core me giuraste:

« Cu tte pe tutt’ ’a vita! » e m’abbracciaste.

E ’o campaniello, ca st’appiso fora,

son’ ’a tre ghiuorne e nun se ferma ancora.

(da Villanelle, 2016)

Uocchie ca a chistu core site care

si ve nzerrate, vuie stutate ’o sole

UOCCHIE CA A CHISTU CORE SITE CARE

di Claudio Pennino

Uocchie ca a chistu core site care,

cu ’sti guardate vuie me cunzulate;

comm’ a ddoie prete ’e dïamante rare,

dint’ a ’stu core mio state astipate.

Vuie ca parlate, e nun tenite voce,

comm’ a ddoie gocce ’e mèle site doce;

e site ’a mmiria ’e femmene e figliole,

si ve nzerrate, vuie stutate ’o sole.

(da Villanelle, 2016)

guardo sempe na stella

NA STELLA PICCERELLA

di Claudio Pennino

Speruto, tutt’ ’e ssere,

guardo sempe na stella,

ca mmiezo a ttutte ll’ate,

pare ’a cchiù piccerella.

Vene ’a tanto luntano,

e lenta s’avvicina…

me passa ’nnante e subbeto

p’ ’o cielo se ncammina.

Cu ll’anema ncantata

veco ca s’alluntana,

tanto ca me piacesse

’e ll’afferrà c’ ’a mana.

E’ ’a stessa stella ’e quanno,

ancora piccerillo,

passavo ’e nnotte sane,

’mmustanno c’ ’o detillo.

Finché na bella sera,

senza cercà ’o permesso,

penzaie: « Chi sa addó porta… »

e lle currette appriesso.

Dint’a na notte sola,

vulanno nzieme ’e viente,

vedette ’e mmeraviglie

ca stanno nzì a ll’Uriente.

Perle quanto a ccerase,

scrigne chine ’e ricchezze;

Riggine e Pprincipesse

cu ll’oro dint’ ’e ttrezze.

Dint’a na sola notte,

vulanno comm’ aucielle,

vedette ’o munno sano,

paise e paisielle.

Quanno a mustrarte ’a strata

ncielo na stella vola,

nun c’è bisogno ’e dicere

nisciun’ata parola.

. . . . . . .

Schiarava iuorno e ’o sole

ncielo luceva a ffesta…

e me truvaie addurmuto

arreto a na fenesta.

(da ’A strata d’ ’e stelle, 2001)

Stroppola p' 'o Capodanno

facimmo ll’aurie pe tutto ll’anno

STROPPOLA P’ ’O CAPODANNO

di Claudio Pennino

                                             da G. Rodari

Chesta è na stoppola p’ ’o Capodanno:

facimmo ll’aurie pe tutto ll’anno:

voglio gennaio c’ ’o sole d’abbrile,

nu luglio frisco e nu marzo gentile;

voglio nu iuorno ca nun fa maie sera,

nu mare calmo comm’ a primmavera;

’o ppane cavero, frisco sfurnato,

ncopp’ ’o cepriesso na rosa schiuppata;

voglio c’ ’a iatta è cumpagna d’ ’o cane,

’o llatte ca iesce ’a dint’ ’e ffuntane;

E si voglio troppo nun me dà niente,

damme n’abbraccio e simmo cuntente.

© Claudio Pennino

Senza fà niente

M’aggi’ ’a stancà a stà cu ’e mmane mmano

SENZA FÀ NIENTE

di Claudio Pennino

Me voglio stà nu iuorno sano sano,

senza fà niente, senz’appriett’ ’e core.

M’aggi’ ’a stancà a stà cu ’e mmane mmano,

nun voglio caccià manco ’o naso ’a fore.

Senza arapì na paggena ’e ggiurnale,

senza penzà chi me vo bene o male:

p’ ’a capa, leggia comm’a nu veliero,

nun voglio avé nemmanco nu penziero.

(da Villanelle, 2016)

Ciardeniere

me so’ fatto, pe nziria, ciardeniere

CIARDENIERE

di Claudio Pennino

Pe me scurdà chesta faccella tonna,

me so’ fatto, pe nziria, ciardeniere;

’a ccà scippo nu ramo e ’a llà na fronna,

e me te sto’ levanno d’ ’e penziere.

Pe me sanà cchiù ampressa ’sti fferite,

sto’ semmenanno viole e margarite...

ma unu sciore schioppa p’ ’e ciardine:

na rosa prufumata e chiena ’e spine.

(da Villanelle, 2016)

na vela ’e penziere

’A VELA

di Claudio Pennino

’O viento giallo

d’ ’o sole che more,

smove appena

na vela ’e penziere

’ncopp’a ll’acqua d’ ’a malincunia.

(da Vela ’e Penziere, 1999)

'A chiavetella d'oro

Tengo na chiavetella tutta d’oro

’A CHIAVETELLA D’ORO

di Claudio Pennino

Tengo na chiavetella tutta d’oro,

c’arape ’o core ’e ffemmene cchiù bbelle;

quanno nce traso trovo nu tesoro,

ch’è fatto ’e sentimente e canzuncelle.

Ma quanno ’o core tuio aggio araputo,

na bbotta ’mpietto i’ pure aggio sentuto:

« Ggiesù, che sarrà maie chistu dulore? »

E tu, senza piatà, m’hê ditto: « E’ ammore! »

(da Villanelle, 2016)

’O specchietiello

Tengo nu specchietiello affatturato

’O SPECCHIETIELLO

di Claudio Pennino

Tengo nu specchietiello affatturato:

quanno nce guardo dinto tu accumpare.

Veco si staie tu sola o staie cu n’ato,

si staie ncopp’a nu monte o nfunn’ ô mare.

Tutto me dice, pure si suspire,

e legge nfunn’ ’o nniro ’e ’st’uocchie nire.

Pure ’int’ ’o scuro saccio tu che faie…

Ma, pe paura, i’ nun ce guardo maie.

(da Villanelle, 2016)

Ce sta nu posto

Ce sta nu posto ca prufuma ’e rosa

CE STA NU POSTO

di Claudio Pennino

Ce sta nu posto ca prufuma ’e rosa,

quanno ce vaco stongo mparaviso;

llà sulamente ’o core s’arreposa

e se cunzola cu nu pizzo a rriso.

Chi ’o cerca nun ’o trova ncopp’ ê ccarte,

e, dint’ ê libbre, ognuno va sbarianno;

chi ce vo ì, è inutele ca parte,

ca nun ce stanno strate ca ce vanno.

E nun ce vonno vele o bastimiente,

ca, a chistu posto, nun se va pe mmare.

Cu ttutto ca nisciuno sape niente,

se nformano pe gghì ggente a migliare.

A chistu posto ca prufuma ’e rosa,

comme s’arriva ognuno ’o vvo sapé;

llà sulamente ’o core s’arreposa,

e i’ ce vaco quanno sto cu tte.

(da Primma ca scura notte, 2009)

strignenno dint’ ’e mmane

na rosa prufumata.

’A FINE D’ ’O MUNNO

di Claudio Pennino

              Appuntamento a Capemonte

Leggo ncopp’ ’o ggiurnale,

stampato chiaro e ttunno:

« Stasera a ll’otto mpunto,

vene ’a fine d’ ’o munno! »

Me faccio ’a resatella

e penzo a ’stu mumento:

«Propio stasera a ll’otto

ca tengo ’appuntamento?!… »

Vi’ quanta fessarie

se ’mmentano ’e ggiurnale.

E ntanto songo ’e sseie,

e tu si’ puntuale.

Me vesto lindo e pinto:

cammisa e fazzulette,

’o vestetiello ’e lino,

e ggià so’ fatte ’e ssette.

Felice mmiez’ ’a ggente

me faccio ’a cammenata,

strignenno dint’ ’e mmane

na rosa prufumata.

Priciso, a ll’otto mpunto,

me trovo ncopp’ ’o Tunno.

Tu spunte ’a ll’ata parte

e si’ ’a fine d’ ’o munno.

(’A pianta d’ ’a felicità 2004)

Ce sta n'aucelluzzo

ch’è affatturato e tene ’e ppenne d’oro

CE STA N'AUCELLUZZO

di Claudio Pennino

Ce sta n’aucelluzzo mmiez’ ê ffronne,

ch’è affatturato e tene ’e ppenne d’oro.

Quanno t’affacce, ’o mpiso, s’annasconne,

e ’a miez’ ê ffrasche canta: « I’ pe tte moro…»

Sott’ ’a fenesta toia, tutt’ ’a nuttata,

aggio cantato e nun te si’ affacciata.

E ’aucelluzzo, c’ ’o bbeccuccio ’argiento,

m’ha ditto: «’Sti suspire vanno ô viento!»

(da Villanelle, 2016)