'O iuorno 'e Pasca

Quant’abbunnanza rimasta comm’era,

llà, tale e quale, pe’ mancanza ’e solde!

’O IUORNO ’E PASCA

di Giovanni Capurro

E cu ssalute: comme ll’ite vista

st’anno ’a puzzate vedé pe’ cient’anne.

Se so’ sciugliute già tutte ’e ccampane,

’ngloria d’ ’o Cielo.

E tengo ancora nnante all’uocchie mieie

tutta ’apparata ca s’è fatta st’anno

d’ ’o magnà ’e Pasca, comme se fa sempe

fora ’e pputeche

d’ ’e casadduoglie, d’ ’e meglie chianchiere:

cantine nove, magazzine ’e pasta...

Che bella cosa, che scicchezza ’e rrobba,

quanta ricchezza!

Quant’abbunnanza rimasta comm’era,

llà, tale e quale, pe’ mancanza ’e solde!

’Izate ’a voce, meh, gente, alluccate

forte : Alleluia!

Quanno, trasenno, zi’ prevete nuosto

benedicette tutta ’a casa, allora

avimmo miso suspiranno ’o soldo

dint’ ’o catillo,

e mentre asceva nzieme c’ ’o pecuozzo

dicenno a tutte quante: — Buona Pasqua! —

ll’aggio guardato cu ’e bbraccia chïate

nzi’ ch’è scumparso,

e aggio penzato: quanta bona gente

mettono ’o soldo cu ’a speranza ’o core!

Ma è nu destino: ll’acqua santa e ’a parma

mai fanno niente.

Resta ’a speranza, ma speranno sempe,

a poco a’ vota, tutte nce ne iammo,

e tutte ’e ccose ’e chesta vita nfama

restano ’o stesso.

Qgge chi scippa, chi afferra ’a campata,

se guarda attuorno pe’ chi sa lle sfuie,

pecché chi campa nu’ sta maie sicuro,

tutto fallesce.

Munno busciardo, fauzo, traditore;

te vene meno stesso ’o sango tuio;

tutto è denaro! denare, denare,

sempe denare,

sinò si' muorto. Ma, penzammo a Pasca:

nzi’ ca c’esiste nu bicchiere ’e vino

vevimmencillo. Vuo’ penzà... che cosa?

Pienze dimane.

Ogge se campa, dimane se more;

e bona Pasca, comme dico a vuie,

dico a me pure. Bona ge’, alluccate

forte: Alleluia!

'Ndifferenza

Chïato sott’ ’o pisemo ca ’ncopp’ ’e spalle porta

’NDIFFERENZA

di Claudio Pennino 





N’ommo pe’ ’mmiez’ ’a folla
distratta e ’ndifferente,
assomma lentamente
e sulo se nne va.

Chïato sott’ ’o pisemo
ca ’ncopp’ ’e spalle porta,
p’ ’a strata tutta storta,
arriseca ’e cadé.

E quanno chesta saglie,
stracquato d’ ’a fatica,
sfatto cchiù d’ ’a mullica,
scunocchia e resta llà.

Nisciuno se nne cura.
Nisciuno sente ’o schianto.
Na femmena surtanto
corre pe’ ll’aiutà.

Guardannolo ’int’a ll’uocchie,
- prete d’acquamarina -
’mpietto, comm’a na spina,
se sente ’e trapassà.

Carnala, cu na mana,
ll’asciutt’ ’a fronte ’nfosa,
e, tennera e piatosa,
’nzino ’o fa arrepusà.

Isso, ’accarezza ’a faccia,
e, doppo suspirato,
pigliato ’o ppoco ’e sciato,
s’abbïa pe’ partì.

Sistema bbuono ’o pisemo,
e, senza cchiù sustegno,
na Croce fatta ’e legno
se mette a strascenà.

Sulo p’ ’a strata soia,
nisciuno cchiù ll’ha visto,
e stu povero Cristo
va trova mò addó stà.



(da ’A strata d’ ’e stelle 2001)

Uocchie gentile, sguardo 'e tennerezza

vuie site ’o ffuoco che me dà frischezza

UOCCHIE GENTILE, SGUARDO ’E TENNEREZZA

di Claudio Pennino

Occhi leggiadri, o grazïoso sguardo



Occhi leggiadri, o grazïoso sguardo,
che fusti e primi che m’innamoraro,
occhi sereni, donde uscì quel dardo
che passò il core e non valse riparo,
occhi, cagion del foco in qual sempre ardo,
senza li quali el viver non m’è caro,
a voi ne vengo a dimandar se mai
sperar debbo merzé di tanti guai!


Angelo Poliziano






Uocchie gentile, sguardo ’e tennerezza



Uocchie gentile, sguardo ’e tennerezza,
ca ’e primme fusteve a rialarme ammore,
uocchie cuiete, addó partette ’a frezza
ca me perciaie senza cchiù scanze ’o core,
vuie site ’o ffuoco che me dà frischezza,
d’ ’a vita mia felicità e dulore,
a vuie turnanno i’ sempe spio si maie
sullievo aggi’ ’a sperà pe tanta guaie. 

Claudio Pennino

(da Na guardata amurosa, 2006)

Natale e Pasca

Pasca strascina ’a ggente mmiez’ ’a via

NATALE E PASCA

di Eduardo De Filippo

Natale e Pasca so’ cumpagne tale

ca vanno sott’ ’o vraccio eternamente.

Chi Pasca dice annòmmena Natale,

e de Natale Pasca vène a mmente.

Eppure ce sta tanta differenza

comme ’a casa d’ ’o Papa e ’a casa mia.

Natale porta friddo e sufferenza,

Pasca strascina ’a ggente mmiez’ ’a via.

« Buon Natale! », te dice ’o guardaporta,

c’ ’o naso ’a for’ ’a senga d’ ’o cappotto.

« Buona Pasqua! », te strilla, e nun le mporta

si s’è rotta na lastra d’ ’o casotto.

« Buon Natale! », te dice ’o farmacista,

e te cunzegna ’e pinnole p’ ’a sera.

« Buona Pasqua! », e te pesa a primma vista

l’essenza ’e fior d’aracio p’ ’a pastiera.

« Buon Natale! », te dice ’o cusetore,

e te cunzegna ’o piso ’e nu cappotto.

« Buon Pasqua! », e accummencia nu calore

ca te sfile ’a cammisa e ’a maglia ’a sotto.

« Buon Natale! », sta scritto add’ ’o barbiere,

e te siente ’o ssapone friddo nfaccia.

« Buon Pasqua! », e ’o rasulo è nu piacere.

’A nnamurata toia nun te ne caccia.

Chi Pasca dice annòmena Natale,

ma pe’ Pasca ce tengo ’a simpatia.

’O sole ’e Pasca nun te pò fà male

e scarfa ’e puverielle mmiez’ ’a via.

Pasca porta ’e pesielle, ’a ncappucciata,

ll’aglie nuvelle, ’a cepulluzza, ’o ggrano;

e porta n’aria fresca e profumata

ca l hê desiderata n’anno sano.

Te porta ll’uocchie nire ’e chi vuò bene,

ca te veneno a dì: « Facimmo pace »...

Ll’uocchie ca nun cunoscene catene

tu sulamente a Ppasca ’e ffaie capace.

« Buona Pasqua! », te dice, e chianu chiano

te pos’ ’a capa ncopp’ ’a spalla... e aspetta.

E ’a mano va truvanno ll’ata mano...

Ah, benedetta Pasca, benedetta!

Culure

tutto ’o llilla e ’o blummaré

CULURE

di Edoardo Nicolardi

Ll’aria ’e terra nun ancora

scopa ’e nnuvole a ppunente,

mo’ ca ’o Sole lentamente

se ne va pe’ se cuccà.

E nfra ’e nnuvole chiummine

- lenze chiare e lenze scure -

che culure, che culure

sape ’o Sole trezzià!

Tutt’ ’o rrusso, a gradazione,

ca se sfuma e ca se sperde;

tutt’ ’o ggiallo, tutt’ ’o vverde,

tutto ’o llilla e ’o blummaré.

E i’ me ncanto, comme maie

fino a mo’ ll’avesse viste...

E ’sta ggioia me fa cchiù triste.

Nzerro ll’uocchie, e penzo a tte.

dinto ce metto chello ca me piace

VA TROVA CHE SARRÀ

di Claudio Pennino

                                                L’essenziale è invisibile agli occhi

Antoine de Saint-Exupery

Aiere m’è arrivato nu pacchetto

bello e ncartato ’int’a nu foglio ’argiento;

tanto na nocca, e senza nu biglietto,

teneva sulo ’o nomme scritto a stiento.

« Che sarrà maie? » stranito aggio penzato.

« Che vene a dì chest’ata nuvità? »

’o peso, ’o voto e ’o ggiro a ogne lato,

ma nn’addivino dinto che ce sta.

Sarrà na cosa bona o malamente?

Sarrà na guerra o ce starrà na pace?

Volo cu ’a fantasia e... alleramente,

dinto ce metto chello ca me piace:

nu piccerillo senza na pazziella…

na nnammurata cu dduie uocchie blu…

’o lupo ca se magna ’a pecurella…

chilli vint’anne ca nun tengo cchiù…

E senza ll’arapì m’ ’o tengo mente,

pecché mo saccio dinto che ce sta…

Basta ca nzerro ll’uocchie sulamente

e, llà pe llà, trovo ’a felicità.

(da Primma ca scura notte, 2009)

'A luna

Tu stive durmenno. Sunnave

’A LUNA

di Ferdinando Russo

’A luna d’ ’a notte serena,

riggina d’ ’o cielo stellato,

menava int’ ’a stanza nu raggio ndurato;

io, tutto ncantato, te steva a guardà.

Tu stive durmenno. Sunnave

e dint’a lu suonno redive...

Che suonno celeste, sunnanno, facive?

E nun te muvive; redive, accussì.

Parive na rosa maggese

appassuliata nu poco...

Sunnave nu core cucente de fuoco?

Sunnave nu poco, tantillo, de me?

’O vraccio, da fora ’a cuperta,

pareva nu giglio. ’A manella

pareva na penna de na palummella,

na cosa, tantella, cchiù bella de te!

Menava int’ ’a stanza nu raggio

’a luna da ’o cielo stellato;

io, sulo, te stevo guardanno, ncantato,

tenennome ’o sciato, pe’ nun te scetà.

'O rummore

’A razza nosta è ’a razza d’ ’o rummore

’O RUMMORE

di Claudio Pennino

                          Le persone che fanno poco
                                        rumore sono pericolose.                                                               
                                                                La Fontaine

’A razza nosta è ’a razza d’ ’o rummore:

pecché rummore fa ’o napulitano.

Si parla, move ’e mmane, fa l’attore,

e pe’ fà cchiù ammuina fa ’o suprano.

Fa na resata e pare na fanfara,

’a banda musicale ’e Torcicollo,

nu tracco a seie vutate quanno spara,

nu filobbusso ca lle scappa ’o trollo.

Lle vene comme fosse naturale,

pecché ’o silenzio ’o mette ’e malumore.

Pare che s’arricorda d’ ’o spitale...

Arrassusia!... E canta a tutte ll’ore.

Quanno cammina po’ è nu cuncertino:

’ntrònano ’e scarpe comme a ddoie tïane.

A ttavula? Bicchiere e fiasche ’e vino

sònano comme fossero campane.

Ma è buono ’e core. Nun è malamente.

Chillo ca ’un fa rummore è ammalezziato.

Chillo ca striscia comme fa ’o serpente...

ca dint’ ’o scuro se trattene ’o sciato.

’O scuro, nuie, facimmo cchiù rummore.

Pecché quanno durmimmo sazzie e chiatte,

si nun runfammo comm’a nu trattore,

’mpietto se sente ’o core ca ce sbatte.

(da Vela ’e penziere, 1999)

Na tavernella...

Stammo a na tavulella tutte e dduie

NA TAVERNELLA

di Salvatore Di Giacomo

Maggio. Na tavernella

ncopp’ ’Antignano: ’addore

d’ ’anèpeta nuvella;

’o cane d’ ’o trattore

c’abbaia: ’o fusto ’e vino

nnanz’ ’a porta: ’a gallina

ca strilla ’o pulcino:

e n’aria fresca e ffina

ca vene ’a copp’ ’e monte

ca se mmesca c’ ’o viento,

e a sti capille nfronte

nun fa truvà cchiù abbiento...

Stammo a na tavulella

tutte e dduie. Chiano chiano

s’allonga sta manella

e mm’accarezza ’a mano...

Ma ’o bbì ca dint’ ’o piatto

se fa fredda ’a frettata?...

Comme me so’ distratto!

Comme te si’ ncantata!...

Ncopp’a ll’acqua, addó ’e llampare

songo stelle mmiez’ ô mare

NOTTE A MMARE

di Claudio Pennino

Nun è manco sciso ’o sole

addereto ’e ccasarelle,

ca ’o cielo ha ditto: « Ascite! »

e so’ asciute tutt’ ’e stelle.

E nu velo ’e seta fina,

tutt’ ’e luce arricamato,

dint’a niente, chistu cielo,

bell’e buono è addeventato.

Già se specchia ncopp’ ô mare

ianca e bella ’a luna tonna;

se quartea pe mmiez’ ê scoglie,

ruciulea pe copp’a ll’onna.

Ncopp’a ll’acqua, addó ’e llampare

songo stelle mmiez’ ô mare,

na paranza s’alluntana…

s’alluntana, e po’ scumpare.

(da Primma ca scura notte 2009)

Malata

E viene, core mio, nun stà malata!

MALATA

di Ettore De Mura

Aggio saputo ca tu staie malata...

Perciò l’autriere nun ce si’ venuta!

... Che friddo!... Comm’è triste sta jurnata!

Chissà... chissà si te sarraie susuta...

... E quanno saparraggio ca staie bona?

Ancora senza te chi me mantene!?

... Sta radio che trasmette sta canzona...

Che desiderio ’e te, m’arde p’ ’e vvene!

E viene, core mio, nun stà malata!

Pecché si tarde ancora nu minuto...

senza sta vocca toia desiderata

pe me ce vo’ sultanto nu tavuto!

Mo passa

Ma tu me manche assaie…

MO PASSA

di Claudio Pennino

                                                         madrigale

« Mo passa – i’ stesso dico - mo me passa

chesta malincunia ca nun me lassa. »

E allora nun ce penzo,

e vaco mmiez’ ’a ggente

e cerco, a ’sti gghiurnate, ’e dà nu senzo,

e a chistu core ardente,

na mana a sgravuglià chesta matassa.

E tanno dico: « ’O ssento… mo me passa… »

Ma tu me manche assaie…

e ’sta malincunia nun passa maie.