Brinnese

ELOGIO DEL BRINDISI

Storie e aneddoti del bere conviviale

BRINNESE

di Luigi Chiurazzi

So ghiornate tutte cheste

de gran gioja e d’allegria:

mille e cchiù de cheste feste

dongo a chesta compagnia.

Co salute e co denare,

accossì pozzate stare.

Mantenere chesta vita

sempe fresca e divertita,

fare sempe campagnelle,

co le nenne fresche e belle,

sempe vuje pozzate fa;

nfì a la morta chesto ccà. 

’A cchiesa è chiena, e trase ancora gente…

’O MIRACULO

di Claudio Pennino

                                 ’O iuorno ’e S. Gennaro

’A cchiesa è chiena, e trase ancora gente…

Tutte vonno arrivà ’nnanz’a ll’altare

c’arde ’e cannele e ccére a centenare.

E pare d’oro tanto ca è lucente.

Pe’ mmiez’ ’a folla io te tengo mente.

Sta folla ca ce sbatte comm’ ’o mare…

e, comm’a vvarca senza marenare,

veco ca t’alluntane lentamente…

Nuvule ’e ’ncienzo. ’A cchiesa s’arrevota.

’A folla smania, prega, sbatt’ ’e mmane:

’O Santo scioglie ’o sango n’ata vota!

Ma a tté, nun te se scioglie ’o sango mpietto.

Te perdo!… E intanto,  sònano ’e ccampane.

Sònano a ffesta pe’ mme fà dispietto.

(da ’A strata d’ ’e stelle, 2001)

Alleramente...

I’ mo’ già penzo che sarrà ’sta vita

ALLERAMENTE…

di Rocco Galdieri





Me ne vogl’ì’, cantine cantine,
pe’ copp’ ’o Campo, a Pucerïale.
Voglio campà cu’ ’e muorte pe’ vvicine…
ca nun sanno fa’ male.
Nu’ pàrlano… Nu’ càntano… So’ buone…
E so’ ’e meglie inquiline:
so’ chille ca nu’ pavano pesone!

Là m’affitto, cu’ poche denare,
’na cammarella pe’ me surtanto.
Che mme ne ’mporta ca nun veco ’o mare?
M’abbasta ’o campusanto!
Amice? No! M’aggia fa’ chiatto e ttunno:
ll’amice, ogge, so’ rare.
Sulo… quacche cucchiere ’e Bellumunno.

Si vene, ’a sera, pe’ ’na partita,
sia benvenuto. ’Nu litro ’e trenta.
I’ mo’ già penzo che sarrà ’sta vita,
ca mme chiamma e me tenta!
Vevo e dormo e nisciuno me ’ncuieta…
E all’ora stabilita,
canta ’na ciucciuvettola e mme sceta!

I’ nun me voglio piglià veleno…
Addio, canzone, ca so’ turmiente!
Voglio sentere ’a pala ’int’ ’o tturreno;
’o chianto d’ ’e pariente…
E quanno vene ’a morte ’a parta mia,
faccio ’e ll’esequie ammeno:
m’ ’o ffaccio appere… ch’è ’nu passo ’e via!

'A gatta d' 'o palazzo

pe’ na fenesta, si t’ ’a scuorde aperta...

’A GATTA D’ ’O PALAZZO

di Eduardo De Filippo

Trase p’ ’a porta,

pe’ nu fenestiello,

pe’ na fenesta, si t’ ’a scuorde aperta...

quanno meno t’ ’aspiette.

Pe’ copp’ ’e titte,

da na loggia a n’ata,

se ruciuléa pe’ dint’ ’a cemmenera.

E manco te n’adduone

quann’è trasuta:

pe’ copp’ ’o curnicione

plòffete!, int’ ’o balcone,

e fa culazione

dint’ ’a cucina toja.

È ’a gatta d’ ’o palazzo.

Padrone nun ne tene.

Nunn’ è c’ ’a vonno male,

ma essa ’o ssape

che manc’ ’a vonno bene.

Te guarda cu dduje uocchie speretate:

lésa.

N’ha avute scarpe appriesso e ssecutate.

È mariola!

Ma ’a povera bestiella, ch’adda fà?

È mariola pecché vo mangià.

È mariola...

Chest’ ’o ddice ’a ggente;

ma i’ nun ce credo, pecché, tiene mente:

tu lasse int’ ’a cucina,

che saccio...

nu saciccio.

Làsselo arravugliato

dint’ ’a na bella carta ’e mille lire.

Tuorne ’a matina:

’a mille lire ’a truove, che te crire?

Nzevata. Ma sta llà.

Ogne pugnente e velenosa spina

Spero ca ’o mmale mio se cagna a bene

OGNE PUGNENTE E VELENOSA SPINA

di Claudio Pennino






Ogni pungente e venenosa spina



Ogni pungente e venenosa spina
si vede a qualche tempo esser fiorita;
crudel veneno posto in medicina
più volte torna l’uom da morte a vita;
el fuoco che ogni cosa arde e ruina
spesso risana una mortal fedita:
così spero il mio mal mi fia salute,
ché ciò che nuoce ha pur qualche virtute.


Angelo Poliziano






Ogne pugnente e velenosa spina



Ogne pugnente e velenosa spina
se vede, ’e vvote, bella e rifiurita;
pure ’o vveleno, fatto mmedecina,
d’ ’a morte leva ll’ommo e le dà vita;
e ’o ffuoco c’ogne cosa t’arruvina,
spisso te sana ’a peggio ’e ogne ferita.
Spero ca ’o mmale mio se cagna a bene, 
ca na vertù pure ’a patenza tene.


Claudio Pennino




(da Na guardata amurosa, 2006)

L'ammore mio

Oh, arciula mia de vino prelibato!

L’AMMORE MIO

di Eduardo Scarpetta





Quanno me staje vicino, chisto core
me sbatte forte forte int’a lo pietto,
vurria co ttico stare ntutte l’ore
pe me turnà la pace e l’arricietto!...

Quanno me si luntana, oh, che dolore,
non mangio chiù, non dormo int’a lo lietto.
Pe te surtanto io sento tant’ammore,
e no remmerio tu quanno nce mietto?

Viene, bellezza mia, non cchiù tardare,
viene na vota, assai t’aggio aspettato.
A te lo musso mio voglio accostare,

schitto accussì me sento conzolato;
viene, via mò, non farme spantecare...
Oh, arciula mia de vino prelibato!

N'aceno d'uva

Accosto ’a vocca e zuco ’a malvasia,

e mmocca sent’ ’o mmèle e me cunzolo

N’ACENO D’UVA

di Claudio Pennino






Cu n’aceniello d’uva mpont’ ô musso,
me tiente cu ’sta vocca fresca e bella.
Vuò ca me zuco ’stu cunfietto russo?
E appriesso voglio ’a vocca sciuliarella.

Affonno ’a vocca mia ncopp’a ’sta vocca,
pe t’ ’a vasà speruto e assaie guliuso…
e sento ll’uva ca se schiatta mmocca,
e sento ’o musso tuoio ncerato e nfuso.

E ’o zuco scorre senz’avé arricietto:
primma te tegne nfaccia na viuletta,
po’, chianu chiano, sciulia nfino e mpietto,
nfezzannose pe dint’ ’a cammicetta.

Accosto ’a vocca e zuco ’a malvasia,
e mmocca sent’ ’o mmèle e me cunzolo.
Se sponta ’a cammicetta e, vita mia,
ll’anema saglie ncielo cu nu volo.

Me piglio chello ca tu mm’hê prummiso:
n’aceno d’uva e nu zeffunno ’e bbene.
Mo saccio comm’è ffatto ’o Paraviso,
e saccio pure che sapore tene.





(da ’A pianta d’ ’a felicità, 2004)

'O paese 'e Pulicenella

’O PAESE ’E PULICENELLA

di Eduardo De Filippo








Pulicenella sapite che dice?
Ca paese significa munno.
Sape sulo ca è largo e ca è tunno;
E nun tene pariente né amice.
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella è padron’ ’e Paese.
Pulicenella fa tutte cos’ isso.
Pulicenella, si arriva ’nu fisso,
ca vulesse... che saccio... fà spese...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella ’o sapimmo ca tene
tutt’ ’e vizie d’ ’a rosamarina.
E pirciò ca se sceta matina...
vò sapé... se ’ntalléa... se trattene...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella, adderet’ ’o spurtiello
’e ll’ufficio « Domanda e risposta »...
te risponne... ma caro te costa...
ca pe cchesto... pe cchesto e pe cchello...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella sta sempe stunato;
puveriello... nun sap’ e nun sente.
Ma si appura c’ ’a povera gente,
s’ha mettuto nu sold’ astipato...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella nun tene giudizio;
nun ce penza c’ ’o tramm’ è scassato.
Si ’o biglietto l’avite pavato...
bene o male, v’ha fatto ’o servizio...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella ha signato, ha guardato,
dint’ ’o vico di tale... di tale...
s’hadda fa nu lavoro stradale;
s’hadda fa... ma però s’è fermato.
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella te dice: « Firmate.
Questa causa l’abbiamo vinciuta ».
Sì sicuro ca già l’hê perduta...
E cu tutto ch’ hê avut’ ’e mmazzate...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella le piàceno ’e ccarte,
spicialmente... si songo signate.
Chelli bbone s’ ’e tten’ astipate,
’e ssuggette t’ ’e mmen’ jnt’ ’e scarte...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella è spassuso... Se spassa
quanno port’ ’e ccartelle arretrate...
Sono imposte d’uscita e d’entrata,
però isso nun pava na tassa.
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella fa mille mestiere:
’o barbiere, ’o stagnaro, ’o pittore,
ll’architetto, ’o ngignere, ’o dottore.
Sap’ ’o munn’ ’e diman’ e d’ajere...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella fa pure ’o scrittore.
E s’abbacca cu cchist’ e cu cchillo...
Ten’ ’a penna, e nu core tantillo...
e se joc’ ’a parola d’onore.
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella è padrone ’e paese.
Sape vita, miracul’ e morte.
P’ ’e pprtose, p’ ’e ssenghe e p’ ’e pporte
mette recchie... e s’ ’a squaglia all’inglese.
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella se mena d’ ’o lietto,
quanno tras’ ’o vapore int’ ’o puorto.
E nunn’ ave né colpa né tuorto,
quann’ afferr’ ’o straniero pe pietto...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Luna chiena

pittasse tonna e bella ’a luna chiena

LUNA CHIENA

di Claudio Pennino




S’io fosse nu pittore, ’o cchiù valente,
pe te pittà scigliesse unu culore:
pe chesti ccarne toie chiare e splennente,
bastasse ’o ghianco pe te dà ’o lustrore.

Primmo facesse ’a faccia ’e santarella,
po’, areto ’e spalle, una sciuliarella;
quanno arrivasse addó arrutonna appena,
pittasse tonna e bella ’a luna chiena.

'O cunto 'e ll'ove

« cò-cò-cò »... sbattono ’e scelle

e lle fanno dudece ove.

’O CUNTO ’E LL’OVE

di Ettore De Mura





Tutt’ ’e pulle d’ ’o « cumpare »
songhe dudece e no chiù.
Ma Rusina ’e ttene care
e ce parla a tu pe tu.

’E ccapisce, ’e chiamma a nomme,
’e gguverna, e ogne gallina
— nun ’o ssape manco comme —
lle fa n’uovo ogne matina.

Tutte quante ’e ggallenelle,
ogne ghiuorno verso ’e nnove,
« cò-cò-cò »... sbattono ’e scelle
e lle fanno dudece ove.

Ne venne ùnnece annascuso
d’ ’o marito, e, puntualmente,
quanno è ’a sera ha miso ll’uso
d’ ’o dà n’uovo sulamente...

— Ne fanno uno !... — Isso s’ ’o ccrere,
capuzzea e, muollo muollo,
dice: — N’uovo tutt’ ’e ssere...
A sti bestie ’e ttiro ’o cuollo!

— Nonzignore ! — fa ’a mugliera
Aspettammo !... — E sta cafona
tene sempe ’a bbona cera,
e lle vene sempe bona.

Tene sott’a na riggiola
tutt’ ’e llire ch’ ’abbuscate.
Quanno ’e gguarda se cunzola:
sti galline so’ affatate !

*  *  *

Na matina ca p’ ’o ggrano
nun ce steva ’a fatica,
’o « cumpare » chianu chiano
torna ’a casa e resta llà.

— Stu pullaro costa caro... —
suspiranno ha riflettuto.
Ma guardanno ’o gallenaro
resta comma n’alleccuto...

— E che so’ sti dudece ove ?
Veco buono ?... È overo o no ?
Cheste songhe cose nove...
Comme va stu fatto, oj Ro’ ? —

E Rusina, ’ntartaglianno :
— Chelle spisso t’hanno ntiso...
Ogne pullo va scanzanno
certamente ’e muri acciso,

e accussì... se so’ sfurzate...
hanno miso ’a vuluntà,
e ’int’ a niente hanno mpastate
dudece ove... stanno ccà !—

’O cafone ch’ è suttile
e capisce comm’ è ghiuto,
piglia ’nmano nu fucile
e lle dice risoluto:

— Ah! Sicché tutto s’ottiene
cu ’e mminacce e niente cchiù ?
Siente, Ro’, io te voglio bene,
ma he’ ’a fà ll’uovo pure tu!

Ogne ghiuorno! E si na sera
quanno torno nun m’ ’o daie,
ah, mugliera mia mugliera,
t’assicuro ca so’ guaie!

*  *  *

Rosa, mo, s’ è appaurata...
tremma pure si sta sola...
n’uovo accatta ogne ghiurnata
cu ’e denare d’ ’a riggiola.

E accussì tutt’ ’e mmatine
piglia ll’ove e nun ’e mmove.
Tene dudece galline
ca lle fanno tridece ove!

Quann'io te penzo

e comm’a dduie palumme,

se portano ’a mmasciata

QUANN’ IO TE PENZO

di Claudio Pennino






Quann’ io te penzo, ’a sera,
tu pure, propio tanno,
dint’ ’o stesso mumento,
certo me staie penzanno.

E stu penziero mio, 
pe tte se parte e vola,
e ’o tuoio fa tale e quale
doppo na capriola.

Ma tutt’ ’e dduie, vulanno,
se ncontrano p’ ’a strata,
e comm’a dduie palumme,
se portano ’a mmasciata.

E mentre nuie restammo
scetate a ll’aspettà...
lloro vòlano ncielo
pazzianno a s’acchiappà.




(da ’A strata d’ ’e stelle, 2001)

Nuttata 'e luglio

na luna tonna: nu chirchio
smaltato senza na macula

NUTTATA ’E LUGLIO

di Eduardo Nicolardi

Nuttata ’e Luglio... ’Int’ a ll’albere

tra fronna e fronna, se ntrecciano

’e lluce-luce ’e ’sta luna;

na luna tonna: nu chirchio

smaltato senza na macula,

senza na ntacca. Manco una.

Ccri-ccri... Ma cantano o chiagneno

’mmiezo a ’sti pàstene ’e cànnevo,

’mmiezo a ’stu ggrano, ll’agrille ?

So’ cinco o sei ch’accummenciano

’stu zzerri-zzerre patetico

— rummore ’e comme vattesseno

nu fierro ncopp’a na cràstula —

ma pò so’ ciente... so’ mille...

So’ diecemila... E zzerréano

tutte mparanza, sbrucànnose

a cchi fa ’a voce cchiù meglia...

So’ diecemila. E ’sta musica

se spanne dint’ ’o silenzio

’e tutte ’e ccose ca dormeno

sott’a ’sta luna ca ’e vveglia.