Comm' a na rosa

Comm’ a na rosa a ll’aria matutina

COMM’ A NA ROSA

di Salvatore Ragosta

Comm’ a na rosa a ll’aria matutina

che ’a miez’ ’e ffronne, tutta cuntignosa,

s’affaccia appena, e a ’o ffrisco d’ ’a matina

pare cchiù bella, cchiù rossa e cianciosa,

accussì tale e quale Carulina,

ch’ è tanta bella e fa tant’ ’a scurnosa,

quanno mme vede se fa na resella

e trase e ghiesce ’a chella fenestella...

Bellezza bruna, ca ’nfenesta state

e arret’ ’a ggelusia v’annascunnite,

v’ ’o mmaginate o nun v’ ’o mmagginate

che bella ’mpressione mme facite?

Sciummo ca scorre vuie comm’ ’o fermate?

Ammore e tosse comm’ annascunnite?

E a chi aspettammo pe’ fenì stu juoco,

si nuie sentimmo mpietto ’o stesso fuoco?

e pare cchiù guaglione e cchiù cuntento

’O PRESIDENTE

di Claudio Pennino

                                             a mio padre

’O chiammano accussì: ’o Presidente!

Pecché è ’o capintesta d’ammuina.

E’ presidente d’ ’e divertimente,

d’ ’a bbona cumpagnia e d’ ’e festine.

E nun c’è festa si nun stanno ’e suone.

Lle piace ’a canzuncella a filo ’e voce,

’a partetella ’e carte e ’o vino bbuono;

e pe’ ddesserte: tutt’ ’a rrobba doce!

P’ ’a rrobba poca ’un prova simpatia…

Lle piace ’a ggente assaie, ’o votta-votta.

E’ ’o presidente d’ ’a squarciunaria:

si ha dda fà nu sternuto ne fa otto.

Sempe ’mmiez’ ’o bburdello: è bazzeriota,

è zingaro, è scugnizzo, è gravunaro…

Se sposa na nepota? Isso ’a fa ’a dota.

Nasce nu piccerillo? ’O fa ’o cumpare.

S’arape na puteca o cumitato,

foss’anche ’associazione d’ ’e pezziente,

nun le fa niente a restà disperato,

ma guaie si nun ’o fanno Presidente.

Se sceta ampressa, scenne ’int’ ’a nuttata,

e mentre ’a ggente sta durmenno ancora,

va a sparà ’o ffuoco quann’è ’a ’Mmaculata.

’O vico ’ntrona e ’e lluce ’o fanno d’oro.

’Ncielo s’arape nu granato russo,

e, cchiù aveto ancora, uno celeste

ca pare ’e stà assettato ’o Gambrinùs,

mentre tremmano ’e llastre d’ ’e ffeneste.

E ’mmiez’ ’o fummo ride ’o Presidente

affaccennato a cumannà ll’orchesta…

e pare cchiù guaglione e cchiù cuntento,

c’ ’a vita soia chest’è: nu iuorno ’e festa!

(da ’A strata d’ ’e stelle,  2001)

Vengo sempe addù te

vengo sempe addù te, ca te so’ figlio

VENGO SEMPE ADDÙ TE

di Claudio Pennino

                                                      a mia madre

Quanno nun saccio a chi cercà cunziglio,

o sulo si me sento cchiù scuntento,

vengo sempe addù te, ca te so’ figlio,

pe nu cunforto o pe nu giuvamento.

M’assetto a ll’ombra ’e chistu pizzo a riso

e me cunfesso cu na chiacchiariata,

e sempe tu me dice: « T’aggio ntiso! »

c’ ’a cèra assicurante ’e na guardata.

Zitta me siente e, chiano, ’a copp’ ô core,

i’ levo ’o piso amaro ’e ll’esistenza.

Ll’anema mia s’affaccia e trova fore

nu munno nuovo, senza cchiù patenza.

E aspetto ca tu dice na parola...

ma i’ ntenno ’o stesso chello ca nun dice:

me guarde, e cu ’sta faccia ca cunzola,

te rieste muta dint’a na curnice.

(da Primma ca scura notte, 2009)

'E rimpetto

Tu… screvive!… E tremmanno, io liggette

’E RIMPETTO

di Salvatore Di Giacomo

L’ato iuorno c’ ’o sciato facette

d’ ’a fenesta na lastra appannà;

e c’ ’a ponta d’ ’o dito screvette:

«Ah, che bene ve voglio, ’onn’ Amà!»

Doppo scritto, ’onn’ Amà, v’assicuro,

mme sentette ’int’ ’e gamme chïà,

e appuiato restaie nfaccia ’o muro,

senza manco curaggio ’e parlà…

Quanno maie mm’era tanto azzardato?

Quanno maie mm’era ardito accussì?

Si cu vuie nu scurnuso c’ è stato,

mo nce vo’, stu scurnuso songo i’.

Tutto nzieme nu zumpo facette…

Me parette, v’ ’o giuro, ’e murì!…

Tu… screvive!… E tremmanno, io liggette

ncopp’ ’a lastra: «E pur’ io, donn’ Errì!…»

Ce sta chi ricco assaie

Che sciorta nera ’o cielo m’ha mannato

CE STA CHI RICCO ASSAIE

di Claudio Pennino

Ce sta chi, ricco assaie,

d’ ’a vita soia surtanto bene ha avuto,

e nun fatica maie,

e sempe sta servuto e reveruto.

E nun le manca niente,

e, senza nu penziero malamente,

nun sape che so’ ’e stiente,

e, tutt’ ’o iuorno, campa alleramente.

Ma basta ca ’stu tale,

tene, però, nu poco ’e male ’e mole,

na cosa naturale,

iusto pe lle fa fà ddoie capriole,

ca, pronto, s’allamenta:

« Che sciorta nera ’o cielo m’ha mannato,

oi vita malamenta,

pecché so’ nato tanto sfurtunato? »

(da ’A pianta d’ ’a felicità, 2004)

'O raggio 'e sole

c’ ’a scusa ’e ta spassà c’ ’a palummella,

ne faje cadé nu raggio nfront’ a mme

’O RAGGIO ’E SOLE

di Eduardo De Filippo

È na tristezza chesta casa mia,

pe bia c’ ’o sole nun ce trase maje:

è sempe scura, che malincunia!

Na casa senza sole che nne faje?

Nun se sente n’auciello, nun se sente;

sta casa è fredda pure int’ a ll’està.

Appicio ’o ffuoco? Appiccio inutilmente:

’o sole scarfa, ’o ffuoco ll’ ’e appicià…

Ma tu ’a rimpetto te ne si’ addunata,

t’ha fatto pen’ ’a casa mia spruvvista;

si’ ’e core buono… e ’a quanno ll’ ’e guardata,

sta fenestella nun ll’ ’e perza ’e vista…

E cu nu specchio o cu na rastulella,

comm’ ’o sole sta tutt’ ’e faccia a te,

c’ ’a scusa ’e ta spassà c’ ’a palummella,

ne faje cadé nu raggio nfront’ a mme.

Nzerro ll’uocchie... Si ’o vraccio s’è stancato,

lass’ ’o specchio appujato... Zitta e muta,

vatténne. Quann’ ’o raggio s’è fermato,

segn’è ca chi ’o muveva se n’è gghiuta.

Ventariello

Chiacchiarea, quase annascosta

mmiez’ a ll’ombra, na funtana

VENTARIELLO

di Salvatore Di Giacomo

Aggarbato, frisco e ffino

d’ ’a matina ’o ventariello

fa, ogni ghiuorno, ’e stu ciardino

tutte ’e ffronne suspirà.

Chiacchiarea, quase annascosta

mmiez’ a ll’ombra, na funtana,

ca, sapenno ’a storia nosta,

’a vo’ a ll’arbere cuntà.

«Bene mio! - diceno ’e ffronne -

Nientemeno accussì è nfama?»

E cu ll’acqua, ca risponne,

fanno nzieme uno ciu ciù...

Tanto ch’io, ca guardo attuorno

e passeo mmiez’a sti ffrasche,

mme murtifico p’ ’o scuorno,

e mme mbroglio a cammenà...

Sabato santo

pe ssentere ’a voce d’ ’e vviole, io mm’affacciaie

SABATO SANTO

di Luca Postiglione

Fore a stu barcunciello a primmo piano,

mammà spennava na gallina nera.

Vulavano, scennenno chianu chiano,

’e ppenne, attuorno a ’e fierre d’ ’a ringhiera.

Era Sabato Santo. Era d’Abbrile.

Na campana sunaie. Nu vennetore

dette ’a voce d’ ’o ggrano, ’int’ ’o curtile.

Po’ n’ato: — " Bellu sciore !... Bellu sciore!... "

Sunaie n’ata campana, cchiù vicina.

E allora, n’ata, comma na risposta,

subeto, appriesso... Chella cchiù vicina

era ’a campana d’ ’a parrocchia nosta.

Pe meglio risciatà ll’aria d’abbrile,

e pe ssentere ’a voce d’ ’e vviole,

io mm’affacciaie. Guardaie. Dint’ ’o curtile

ce steva na culata spasa a ’o sole...

'A bicicletta

P’ ’o cielo ce ne iessemo aunite

’A BICICLETTA

di Claudio Pennino

                                               a mio padre

Si mo tenesse i’ pure ’a bicicletta,

venesse, na matina, a te truvà.

Venesse a rispirà pur’io ’st’arietta

ca sulo mparaviso mo ce sta.

P’ ’o cielo ce ne iessemo aunite:

tu cammenasse annanze e io addereto,

redenno mmiez’ ê campe ’e margarite,

tu me cuntasse ’e ll’uommene ’o secreto.

Liggere me paresseno ’e ssagliute,

liggiero se facesse ’o core mio;

comme si maie ce fossemo perdute

parlassemo cuiete... ngrazia ’e Dio.

Tanno vulesse riturnà criaturo,

quanno accattaste ’a primma bicicletta;

ca pure si cadevo, ero sicuro,

c’ ’a mana toia me manteneva stretta.

Quanno fosse fernuta ’a cammenata,

e me pigliasse ’o ppoco ’e pecundria,

t’accumpagnasse pe nu tratto ’e strata

cuntento ’e farte ancora cumpagnia.

Guardanno ’o cielo, maneca e ncammisa,

tu me mmustasse tutt’ ’e ccose bbelle;

e t’avviasse, cu nu pizzo a rrisa,

p’ ’a strata ca te porta ncopp’ ê stelle.

Si dummeneca è bon tiempo

T’ aggia di’ nu sacco ’e cose

ca mme passeno p’ ’a mente

SI DUMMENECA È BON TIEMPO

di Salvatore Di Giacomo

Si dummeneca è bon tiempo,

ce ne iammo a Marechiare:

llà mangiammo a llido ’e mare,

e parlammo io ’e te, tu ’e me.

T’ aggia di’ nu sacco ’e cose

ca mme passeno p’ ’a mente,

ca p’ ’a strata o ’a gente ’e ssente,

o nun so’ maie buono a dì’.

Già ’e vedé quase mme pare

chella verde acqua addurosa,

chell’ arena ch’ essa ha nfosa

a caliscia e asciutta è già...

Chelli rezza arravugliate,

chelli nnasse, ’e bbarchetelle,

e, ’int’ ’o monte, ’e grutticelle

ca cchiù fresche so’ ll’està...

T’ aggia dì’ llà, tutte ’e ccose

ca me passeno p’ ’a mente,

ca p’ ’a strata o ’a gente ’e ssente,

o nun so’ maie buono a dì’.

T’ aggia fa’, llà, ’int’ ’a taverna

ca sta proprio a llido ’e mare,

d’ ’a canzona ’e Marechiare

tutte ’e vierze allicurdà.

Tutto me parla 'e te

Ncielo sponta na luna malandrina,

pallida, delicata, trasparente…

TUTTO ME PARLA ’E TE

di Claudio Pennino

’A sera scenne e i’ sulo cu ’e penziere,

vaco sbarianno senza nu pecché.

Cerco d’ ’a cuitudine ’o piacere,

ma tutto cosa attuorno parla ’e te.

Ncielo sponta na luna malandrina,

pallida, delicata, trasparente…

comm’ ’a faccella toia gentile e fina,

e, ’a cielo, pare ca me tene mente.

Me parla ’e te ’o prufumo d’ ’a campagna,

’o canto ’e n’auciello cchiù luntano.

E sento ’a voce toia ca m’accumpagna,

comm’a nu piccerillo, mano a mano.

Pe dint’a na felinia, mmiez’ ’e ppiante,

n’anemaluccio, rassignato, aspetta.

S’è arravugliato e nun sape i’ cchiù nnante,

e, appiso ê file, fa na mariunetta.

Nu triemmolo me passa ’int’ ’e ddenocchie:

pecché succede chesto, ma pecché?

Pe nun vederte cchiù nzerro chist’uocchie,

ma pure ô scuro, i’ veco sempe a tte.

(da ’A pianta d’ ’a felicità, 2004)

L'Uorco

E l’Uorco era venuto trasfurmato,

e pareva na Fata d’ ’a bonora!

L’UORCO

di Ferdinando Russo 

Doppo curruto e cammenato tanto,

neh, bonasera, ch’è fernuto ’o cunto!

E l’Uorco s’ha magnato all’alifanto

tutto cuntento ch’ ha vinciuto ’o punto.

Accussì, cu ’a priezza ’e tutt’ ’a vita,

passata a cercà doce e averne fèle,

mo’ nun me resta ca jettà l’acita,

cu nu prèveto appriesso, e doi cannele...

E l’Uorco era venuto trasfurmato,

e pareva na Fata d’ ’a bonora!

E me dicette: Oi ni’, t’aggio ncantato!

E te so’ nnammurata e te so’ sora!

E chesta fuie ’a sora, oi frato mio,

me subbissai senza timore ’e Dio;

e chesta fuie, e m’accedette ’o core,

e pretenneva de chiammarle Ammore!