chiena ’e foglie d’oro, crisceva ’a pianta d’ ’a felicità

’A PIANTA ’E LL’AMMORE

 di Claudio Pennino

Me ll’arricordo, chiena ’e foglie verde:

pianta ’e ll’ammore, tutta ’razia ’e Dio.

Addó cuglieva ognuno a mane chiene,

e chella dispenzava sulo bene.

Sempe fiurita, a vierno e a primmavera,

faceva frutte n’anno sano sano;

mo ’a tengo mente e nun me pare overo:

se va sfrunnanno, che malincunia.

Arravugliata ’a n’evera malegna,

ca, dint’ ’a morza, ’a stregne e ’a leva ’a vita,

nun dà cchiù frutte, nun caccia nu sciore:

povera pianta, comme s’è arredotta.

’A terra, attuorno, asciutta e mbarbaruta,

pare na mamma ca nun sgrava figlie,

nu pietto sicco ca nun tene latte.

Nera e bruciata, ’a terra cerca aiuto.

Addó ca i’ m’ ’a ricordo sempe nfiore,

pianta ’e ll’ammore, carrecata ’e frutte,

ca prufumava e cunzulava ’o core,

e, pe ll’Umanità, era abbunnanza.

E tutto attuorno era nu ciardino,

e, ognuno, se fermava p’ ’a guardà.

E propio affianco, chiena ’e foglie d’oro,

crisceva ’a pianta d’ ’a felicità.

(da ’A pianta d’ ’a felicità 2004)