Tenimmoce abbracciate

 

Tenimmoce abbracciate

TENIMMOCE ABBRACCIATE
 
 
 
Tenimmoce abbracciate, mano a mmano,
ca chisto nun è ttiempo ’e ce fà male;
tenimmoce accussì pe n’anno sano:
accumminciammo ’a mo, ’a ’stu Natale.

Chillo ca è stato uffeso perdunasse,
e cchillo ca ll’ha fatta se pentesse;
p’addimustrà ca nun songo prumesse,
’o munno sano sano s’abbracciasse.

© Claudio Pennino

'A bbestia

 

Arresentuta, chella mmosta ’e diente

’A BBESTIA
 
di Claudio Pennino
 
 
 
Io tengo ncuorpo comm’ a n’animale
ca notte e gghiuorno me guarda ’int’ a ll’uocchie;
na bestia ca cuncerta sempe a mmale:
sulo si’ ’a guardo, tremmo ’int’ ê ddenocchie.
 
P’ ’a fà stà bbona, quann’ ’a tengo a ffianco,
lle mmocco fessarie ogni mmumento,
lle faccio vedé niro pure ’o gghianco,
e ’a dico ca a ’sta recchia nun ce sento.
 
Arresentuta, chella mmosta ’e diente,
ma i’ m’ ’a piglio comm’ a na resata.
E intanto ’a ggente nun ne sape niente
ca io campo cu na bbestia addubbechiata.
 
Pe cchistu fatto, campo mmiez’ ê bbotte,
penzanno a cchisà quale iuorno ’e chisto
se sceta ll’animale e... bbonanotte,
me magna sano sano e ttorna nzisto.

 
da Acqua salata, 2019

Streca 'e Beneviento

 

Ah, che m’hê fatto, streca ’e Beneviento

STRECA ’E BENEVIENTO

di Claudio Pennino


Ah, che m’hê fatto, streca ’e Beneviento,
nemmanco ’a via d’ ’a casa è cchiù sicura;
quanno tu passe, s’arrevota ’o viento,
sulo ’o penziero ’e te, me fa paura.

Anema nera, disperata e perza,
me sto’ facenno ’e ccroce a mana smerza;
pure ’stu core mio t’ha canusciuto:
cu n’aco avvelenato ll’hê pugnuto.

(da Villanelle, 2016)

'E passarielle

 

So’ ppassarielle e ccórreno

’E PASSARIELLE

di Claudio Pennino

So’ ppassarielle e ccórreno
d’ ’e nive cchiù lluntane,
quanno pe tterra avvìstano
na mullechella ’e pane.

S’accostano ’e cchiù ggiùvene
facenno nu ciù-ciù,
tanto ca mm’arricòrdano
ll’anne d’ ’a ggiuventù.

Po’, appriesso, secutànnose,
ne veneno tant’ate,
ca quanno so’ nu cuófano
nun l’aggio cchiù ccuntate.

«Comme ve mmirio, pàssare,
ca libbere vulate,
’a do’ venite e, a ll’ùrdemo,
diciteme: addó iate?»

Si ’a mano provo a stènnere
pe n’afferrà quaccuno,
mparanza se ne vòlano
e nun resta nisciuno.

E ppassarielle pàreno
ll’anne d’ ’a meglia età,
nun se fa a ttiempo a còglierle
ca so’ vvulate già.


(da Primma ca scura notte, 2009)

'E mmane stese

 

teneno ’e mmane stese

’E MMANE STESE

di Claudio Pennino

’E ttruove fore ê cchiese,

sott’ ’e fferze ’e velluto;

teneno ’e mmane stese,

e ccercano n’aiuto.

Si n’ommo cade nterra,

o smania pe na freva,

stenne na mano e afferra

na mano c’ ’o sulleva.

Pure nu criaturiello,

ca chiagne e ccerca ’a mamma,

vavuso e mmuccusiello,

cu ’e mmane stese ’a chiamma.

E ognuno, a chistu munno,

fosse gigante o nano,

quanno stà pe gghì a ffunno,

stenne sempe na mano.

Pecché ’sti mmane stese,

parlano senza voce,

ma, tennere e ’ndifese,

schiovano a Cristo ncroce.

Arrivano ’nzì ô ncielo,

patute, ma splennente,

e stracciano ogni vvelo

nnant’ a chi è ’ndifferente.

E ’o cielo è ’a perdunanza

a ttutto ’stu struppìo;

cercano na speranza:

trovano ’a mano ’e Ddio.

(da ’A pianta d’ ’a felicità, 2004)

Na vita nova

 

NA VITA NOVA

di Claudio Pennino

Voglio na zappa cu nu piezzo ’e terra,

pe ssemmenà patane e ppummarole...

’Sta vita sempe ’e corza, sempe nguerra,

ll’aggia cagnà cu ’e ffronne d’ ’e scarole.

Voglio parlà c’ ’aucielle, naturale...

comme si fosse io pure n’animale.

E voglio ’iettà ’sti panne ’a cuollo e, frisco,

dint’ a nu sacco, comm’ a San Francisco.

(da Vela ’e penziere, 1999)

'A luna

 

’A LUNA
 
di Claudio Pennino
 
 
 
Ncopp’ a nu specchio d’acqua,
- ianca ca pare ’e cera, -
na luna, tonna e llustra,
s’affaccia a pprimma sera.
 
Fermo, senza nu triémmolo,
’o mare s’è qquagliato,
e ppure ’o viento, pare,
ca se trattene ’o sciato.
 
Dint’ a ’stu specchio ’e luce
però cade na fronna,
e ’a luna, mille piezze,
se ll’arravoglia ll’onna.
 
E ncopp’ ’o mare pareno,
’sti ccrastulelle ’e luce,
nun già nu specchio rutto,
ma tanti lluce-luce.
 
Ma tutto acconcia ’o tiempo
e ogni strata schiana…
’o mare s’accuieta,
e ’a luna torna sana.
 
 
(da ’A strata d’ ’e stelle, 2001)

Pianta rampicante

 

Balcone cu ’sta rosa rampicante

PIANTA RAMPICANTE
 
di Claudio Pennino
 
 
 
Balcone cu ’sta rosa rampicante,
quanno te guardo, comme so’ ccuntento;
’sti ffoglie nturcigliate, tutte quante
attuorno ô core mio pare ca ’e ssento.
 
Saglie addù te chesta passione mia
comme saglie ’sta pianta pe fà ’a spia;
senza paura saglie ’sta passione,
ntricciannose cu ’e fierre ’e ’stu balcone.
 
 
(da Villanelle, 2016)

Serenatella fatta a vvino

 

Aggio scigliuto na canzona ’e voce

SERENATELLA FATTA A VVINO

di Claudio Pennino


Aràpeme na senga ’e ’sta fenesta,
e aràpeme d’ ’o core tutt’ ’e pporte;
quanno me vide abbascio famme festa,
e ccacce ll’oro ’a dint’ ’a casciaforte.

Pe ’st’occasione ncìgnete na vesta,
e ffatte bbella ca, mannaggia ’a morte,
stasera aggio purtato ’a meglia urchesta
e t’aggi’ ’a fà sentì nu piezzo forte.

Aggio scigliuto na canzona ’e voce
pecché già saccio c’ ’o ccantà te piace.
Si nun t’affacce mo, te metto ncroce:

te scasso ’e llastre, ’o ssà? Fatte capace.
E tanno m’ammanzisco e ttorno doce,
quanno te vutte abbascio pe ffà pace.


(da Primma ca scura notte, 2009)

'A cura d' 'e vase

 

e nfino e â sera... uno appriesso a n’ato

’A CURA D’ ’E VASE
 
di Claudio Pennino
 
 
 
Si ’e vase tuoie fosseno mmericina,
comme vurria cadé bbuono malato;
’o miereco dicesse: « Uno â matina,
e nfino e â sera... uno appriesso a n’ato ».
 
Si mmericina fosseno, e ’o vvulesse,
’o miereco ’e cuscienza te dicesse:
« Si doppo dduie tre gghiuorne nun se sana,
continuate ’a cura na semmana! »
 
 
(da Villanelle, 2016)

È ccomm' a tturnà a nnascere

 

’E vvele, attesate d’ ’o viento, so’ ppronte

È CCOMM’ A TTURNÀ A NNASCERE

di Claudio Pennino
 
 

Cuntammo ll’uommene, se parte:
se torna â casa. ’E vvele,
attesate d’ ’o viento, so’ ppronte,
e, ppure ’o mare, ce succorre.
Mo s’ha dda piglià ’o llargo.
’O sullievo ’e na partenza
ce mette ’e buonumore;
pecché partì
è ccomm’a tturnà a nnascere.


’O ’i llànno: già se vede ’o puorto...
ggente antica,
facce cotte d’ ’o sole,
mane annudecate e ssecche,
veste nere, prete
cunzumate d’ ô tiempo,
e scale... e ccase...
e dint’ ê ccase ’a ggente:
luce appicciate ’e sera,
matine cu ’e ffeneste aperte.


Luntano, ’o sole,
se stuta mmiez’ ô mare.
Nzerro ll’uocchie:
dimane se parte.


Claudio Pennino © 2021

Torno

 

comme ’int’ ’a cchiesa torna ’o peccatore

TORNO

di Claudio Pennino

Comme ll’auciello torna, stanco, ô nivo,

e mmiez’ ê ffronne s’arreposa e ccanta,

i’ pure torno a tte cuntento e vvivo,

pe na carezza ’a chesti mmane ’e santa.

Comm’ ’int’ ô puorto tornano ’e llampare

quanno cuntrarie songo ’e viente a mmare,

pur’io torno addu te, ca si’ ll’ammore,

comme ’int’ ’a cchiesa torna ’o peccatore.

(da Villanelle, 2016)

Na cappellucia

 

Mmiez’ ’a campagna, pe na via stramana

NA CAPPELLUCCIA

di Claudio Pennino

Mmiez’ ’a campagna, pe na via stramana,

ce sta na cappelluccia c’ ’a Madonna;

sempe ca passo, resto n’ora sana

sulo a guardà chella faccella tonna.

« Madonna mia ca faie na ’razia ô iuorno,

t’ ’o ccerco pe piatà, guardate attuorno,

levame ’sta passione ’a dint’ ’e vvene,

chella m’accide... e io ’a voglio bene. »

(da Villanelle, 2016)

Punteggiatura

 

Te voglio di’... puntini sospensivi

PUNTEGGIATURA

di Claudio Pennino

Tu si’ pe mme nu punto esclamativo,
nu punto fermo dint’ â vita mia.
Eppure nfacci’ a tte, uh mammamia,
se legge ’o punto, ma è interrogativo.

Si’ ttutta “punto e vvirgula”, precisa,
e vvuò tené sempe raggione tu;
nun te spuoste ’e na virgula, Ggiesù,
facisse maie pe mme nu pizzo a rrisa.

Te voglio di’... puntini sospensivi,
meglio ca me sto’ zzitto, è meglio assaie,
sinò c’appiccecammo, e nun sia maie,
fernesce ca passammo a “ll’aggettive”.

«Pe mme si’ na parentesi...» diciste,
ma m’ ’o ddiciste cchiù ’e diece anne fa.
Mo, sulamente pe puntualizzà,
te voglio arricurdà ca rummaniste!

E stammo punto e a ccapo n’ata vota,
me vuò sottolineà ogni pparola,
comme si fosse ’o guagliunciello ’e scola,
e sento ncuorpo a mme ca s’arrevota.

E nun ’o vvuò capì, senza buscia,
ca si’ pe mme nu punto esclamativo,
che ddico? ’e cchiù: nu punto ammirativo,
nu punto fermo dint’ â vita mia.



© Claudio Pennino

'A bbella

 

Ma i’ vengo a llibberarte cu na spata

 ’A BBELLA

di Claudio Pennino

Ncimm’ a na torre d’oro tempestata,

ce sta nzerrata ’a bbella ’e tutt’ ’e bbelle;

n’uorco peluso ’a tene carcerata

’int’ a na stanza senza fenestelle.

Ma i’ vengo a llibberarte cu na spata...

e cu nu cartucciello ’e sfugliatelle;

scarrupo ’a torre cu na sciabbulata,

mentre ca ll’uorco magna ’e ppastarelle.

(da Villanelle, 2016)

'Sti vierze so' 'e tuoie

 

e te sarranno ’e cumpagnia
quanno te siente sola

’STI VIERZE SO’ ’E TUOIE

di Claudio Pennino


’Sti vierze so’ ’e tuoie,
t’apparteneno.
Si’ ttu ca ’e ffaie nascere,
pirciò, tienele care,
e astipatille
dint’ ô core.

Songo parole cavere,
comm’ ’o ppane frisco;
e chiare comm’ ’e mmane
’e chi è nnucente.
So’ mmerecina franca
pe te curà e ssanà:
’sti pparole
t’arricurdarranno ’e me.

Te scarfarranno
’int’ ’e sserate fredde;
e te sarranno ’e cumpagnia
quanno te siente sola.

Sarranno ’e piede pe cammenà
e gghì luntano;
primma sarranno amare,
comm’ ’e nnespule acevere,
e po’ sarranno doce…

’Sti vierze so’ ’e tuoie,
t’apparteneno.
Si’ ttu ca ’e ffaie nascere,
pirciò, tienele care.


(da Acqua salata, 2019)

Te sto' aspettanno

 

TE STO’ ASPETTANNO
 
di Claudio Pennino
 
                                               A mio fratello Carmine
 
 
 
Te sto’ aspettanno, e ancora ’un si’ vvenuto.
Faie sempe chesto, vuó sempe pazzià!
Va trova addó si’ stato annascunnuto:
iesce, fa’ ampressa, nun me fà aspettà!
 
Dimme ch’è stata tutta na pazzia,
ca nun te ne si’ gghiuto maie ’a lloco;
starraie sicuro ’int’ a na tratturia:
ma ’o iuoco è bbello quanno dura poco!
 
Ccà stammo tutte quante c’ ’o penziero:
ma che pazzia è cchesta? E mmamma mia!
Bevimmoce abbracciate nu bicchiero,
ch’ a tte te piace ’a bbella cumpagnia!
 
Comme facimmo quanno stammo nzieme,
ca ce mette alleria ’o surzo ’e vino;
nun me fa piglià collera, e ghia’, viene!
Che frate si’, si nun me staie vicino?
 
Tengo nu sferrazzuolo sapurito,
’o ttengo nfrisco, meh, fatte vedé.
Nun veco ll’ora ’e ne pruvà nu dito:
iammo fa ampressa, sto’ aspettanno a tte!

© Claudio Pennino 2022