L'ammore mio

Oh, arciula mia de vino prelibato!

L’AMMORE MIO

di Eduardo Scarpetta





Quanno me staje vicino, chisto core
me sbatte forte forte int’a lo pietto,
vurria co ttico stare ntutte l’ore
pe me turnà la pace e l’arricietto!...

Quanno me si luntana, oh, che dolore,
non mangio chiù, non dormo int’a lo lietto.
Pe te surtanto io sento tant’ammore,
e no remmerio tu quanno nce mietto?

Viene, bellezza mia, non cchiù tardare,
viene na vota, assai t’aggio aspettato.
A te lo musso mio voglio accostare,

schitto accussì me sento conzolato;
viene, via mò, non farme spantecare...
Oh, arciula mia de vino prelibato!

N'aceno d'uva

Accosto ’a vocca e zuco ’a malvasia,

e mmocca sent’ ’o mmèle e me cunzolo

N’ACENO D’UVA

di Claudio Pennino






Cu n’aceniello d’uva mpont’ ô musso,
me tiente cu ’sta vocca fresca e bella.
Vuò ca me zuco ’stu cunfietto russo?
E appriesso voglio ’a vocca sciuliarella.

Affonno ’a vocca mia ncopp’a ’sta vocca,
pe t’ ’a vasà speruto e assaie guliuso…
e sento ll’uva ca se schiatta mmocca,
e sento ’o musso tuoio ncerato e nfuso.

E ’o zuco scorre senz’avé arricietto:
primma te tegne nfaccia na viuletta,
po’, chianu chiano, sciulia nfino e mpietto,
nfezzannose pe dint’ ’a cammicetta.

Accosto ’a vocca e zuco ’a malvasia,
e mmocca sent’ ’o mmèle e me cunzolo.
Se sponta ’a cammicetta e, vita mia,
ll’anema saglie ncielo cu nu volo.

Me piglio chello ca tu mm’hê prummiso:
n’aceno d’uva e nu zeffunno ’e bbene.
Mo saccio comm’è ffatto ’o Paraviso,
e saccio pure che sapore tene.





(da ’A pianta d’ ’a felicità, 2004)

'O paese 'e Pulicenella

’O PAESE ’E PULICENELLA

di Eduardo De Filippo








Pulicenella sapite che dice?
Ca paese significa munno.
Sape sulo ca è largo e ca è tunno;
E nun tene pariente né amice.
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella è padron’ ’e Paese.
Pulicenella fa tutte cos’ isso.
Pulicenella, si arriva ’nu fisso,
ca vulesse... che saccio... fà spese...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella ’o sapimmo ca tene
tutt’ ’e vizie d’ ’a rosamarina.
E pirciò ca se sceta matina...
vò sapé... se ’ntalléa... se trattene...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella, adderet’ ’o spurtiello
’e ll’ufficio « Domanda e risposta »...
te risponne... ma caro te costa...
ca pe cchesto... pe cchesto e pe cchello...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella sta sempe stunato;
puveriello... nun sap’ e nun sente.
Ma si appura c’ ’a povera gente,
s’ha mettuto nu sold’ astipato...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella nun tene giudizio;
nun ce penza c’ ’o tramm’ è scassato.
Si ’o biglietto l’avite pavato...
bene o male, v’ha fatto ’o servizio...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella ha signato, ha guardato,
dint’ ’o vico di tale... di tale...
s’hadda fa nu lavoro stradale;
s’hadda fa... ma però s’è fermato.
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella te dice: « Firmate.
Questa causa l’abbiamo vinciuta ».
Sì sicuro ca già l’hê perduta...
E cu tutto ch’ hê avut’ ’e mmazzate...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella le piàceno ’e ccarte,
spicialmente... si songo signate.
Chelli bbone s’ ’e tten’ astipate,
’e ssuggette t’ ’e mmen’ jnt’ ’e scarte...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella è spassuso... Se spassa
quanno port’ ’e ccartelle arretrate...
Sono imposte d’uscita e d’entrata,
però isso nun pava na tassa.
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella fa mille mestiere:
’o barbiere, ’o stagnaro, ’o pittore,
ll’architetto, ’o ngignere, ’o dottore.
Sap’ ’o munn’ ’e diman’ e d’ajere...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella fa pure ’o scrittore.
E s’abbacca cu cchist’ e cu cchillo...
Ten’ ’a penna, e nu core tantillo...
e se joc’ ’a parola d’onore.
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella è padrone ’e paese.
Sape vita, miracul’ e morte.
P’ ’e pprtose, p’ ’e ssenghe e p’ ’e pporte
mette recchie... e s’ ’a squaglia all’inglese.
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Pulicenella se mena d’ ’o lietto,
quanno tras’ ’o vapore int’ ’o puorto.
E nunn’ ave né colpa né tuorto,
quann’ afferr’ ’o straniero pe pietto...
Dice: « ’O cunto purtatel’ a mme ».
Pulicenella sapite chi è?
...Perepè... perepè... perepè.

Luna chiena

pittasse tonna e bella ’a luna chiena

LUNA CHIENA

di Claudio Pennino




S’io fosse nu pittore, ’o cchiù valente,
pe te pittà scigliesse unu culore:
pe chesti ccarne toie chiare e splennente,
bastasse ’o ghianco pe te dà ’o lustrore.

Primmo facesse ’a faccia ’e santarella,
po’, areto ’e spalle, una sciuliarella;
quanno arrivasse addó arrutonna appena,
pittasse tonna e bella ’a luna chiena.