Tu nun me lasse, e io nun lasso a tte.

MANO A MMANO

di Claudio Pennino

T’aggio purtata sempe mano a mmano.

Me ll’afferrave quanno criaturella,

facive ’e primme passe chianu chiano,

felice ’e ncignà ’a primma scarpetella.

Cchiù grussicella, ’a sera, dint’ ’o lietto,

pe t’addurmì cuntenta e a scialacore,

quanno sta mano mia strignive mpietto,

sentevo comme te sbatteva ’o core.

Po’, mano a mmano, â scola ogne matina:

e t’aggio vista ’e crescere int’ ’o bbanco…

e, mentre te facive signurina,

cchiù ’e nu capillo mio s’è fatto ianco.

E ancora ce tenimmo mano a mmano:

tu nun me lasse, e io nun lasso a tte.

Facimmo ’a stessa strata chianu chiano,

sulo ca mò, si ttu ca puorte a mme!

(da ’A strata d’ ’e stelle, 2001)

'E scarpe

dint’ ’a pultrona-trono ’e nu pulimmo

’E SCARPE

di Alfredo Gargiulo

Smargiassamente, sprufunnato a sgherra,

dint’ ’a pultrona-trono ’e nu pulimmo,

se sta allustranno ’e scarpe nu pezzente:

nu paro ’e scarpe triste, scurtecate

e arrepezzate pure malamente.

Stu pover’ommo, overo sfurtunato:

nu vraccio muzzo, pallido, malato,

che campa, ancora, ’e stiente e sufferenze,

matina e ssera, pe na vita sana,

ha stesa sempe ’a mana,

e ha fatto sulamente riverenze

a ttutte chille, ca p’ ’o fà campà,

le fanno nu murzillo ’e carità.

E mo ca nnanze a isso, vede a n’ommo

accartucciato, quase nginucchiato,

ca le pulezza ’e scarpe,

’o guarda cu superbia e guapparia,

comm’a n’Autorità,

e pe nu sfizio ’e cammurristaria,

’o vulesse antrasatto pruvucà:

ce se vulesse quase appiccecà!...

Mo se n’è sciso ’a copp’ ’a seggia-trono,

se fa appiccià na meza sigaretta,

e mentre s’alluntana,

se guarda ’a luce ’e chelli scarpe gialle,

tutto felice, tutto suddisfatto,

manco avesse pigliato na sisalle...

L'ammore ched'è?

L’AMMORE CHED’È?

di Eduardo De Filippo

« Scusate, sapite l’ammore ched’è? »

« L’ammor’ è na cosa

c’addora di rosa...

ca rosa nun è

nduvina ched’è? »

« È rosa?... E scusate, sapite pecché? »

« È rosa ’o culore

che serve p’ ’ammore.

L’ammore nun c’è

si rosa nun è ».

« L’addore che c’entra...si rosa nunn’è? »

« Pecché dinto maggio,

se piglia curaggio.

Sentenno l’addore

te nasce l’ammore ».

« A maggio sultanto?...E sapite pecché? »

« È maggio pe n’anno

pe chille c’ ’o ssanno.

Pe chi nun vò bene

stu mese nun vene ».

« E senza l’addore l’ammore nun c’è? »

« Nun c’è...pecché ’ammore

è forte delore,

ca pare na cosa

c’addora di rosa ».

 chiena ’e foglie d’oro, crisceva ’a pianta d’ ’a felicità

’A PIANTA ’E LL’AMMORE

 di Claudio Pennino

Me ll’arricordo, chiena ’e foglie verde:

pianta ’e ll’ammore, tutta ’razia ’e Dio.

Addó cuglieva ognuno a mane chiene,

e chella dispenzava sulo bene.

Sempe fiurita, a vierno e a primmavera,

faceva frutte n’anno sano sano;

mo ’a tengo mente e nun me pare overo:

se va sfrunnanno, che malincunia.

Arravugliata ’a n’evera malegna,

ca, dint’ ’a morza, ’a stregne e ’a leva ’a vita,

nun dà cchiù frutte, nun caccia nu sciore:

povera pianta, comme s’è arredotta.

’A terra, attuorno, asciutta e mbarbaruta,

pare na mamma ca nun sgrava figlie,

nu pietto sicco ca nun tene latte.

Nera e bruciata, ’a terra cerca aiuto.

Addó ca i’ m’ ’a ricordo sempe nfiore,

pianta ’e ll’ammore, carrecata ’e frutte,

ca prufumava e cunzulava ’o core,

e, pe ll’Umanità, era abbunnanza.

E tutto attuorno era nu ciardino,

e, ognuno, se fermava p’ ’a guardà.

E propio affianco, chiena ’e foglie d’oro,

crisceva ’a pianta d’ ’a felicità.

(da ’A pianta d’ ’a felicità 2004)

Lettera amirosa

LETTERA AMIROSA

di Salvatore Di Giacomo

Ve voglio fa’ na lettera a ll’ ingrese,

chiena ’e tèrmene scìvete e cianciuse,

e ll’ aggia cumbinà tanto azzeccosa

ca s’ ha d’azzeccà mmano pe nu mese.

Dinto ce voglio mettere tre cose,

nu suspiro, na lacrema e na rosa,

e attuorno attuorno a ll’ ammillocca nchiusa

ce voglio da’ na sissantina ’e vase.

Tanto c’ avita di’: « Che bella cosa!

Stu nnammurato mio quanto è priciso! »

Mentr’io mme firmo cu gnostia odirosa:

Il vosto schiavotiello: Andonio Riso.

'A vocca toia

pecché ce sta Caflisce mmocca a tte!

'A VOCCA TOIA

di Arturo Trusiano





Tu vuo' sapé pecché, quanno te vaso,
nun so' maie stanco e sazio 'e te vasà?
Pecché sta vocca toia - ch'è seta e raso - 
tene l'addore d' 'a carnalità.

Sti belle labbre toie - rosse e cenère - 
menano nu prufumo 'e giuventù
ca manco 'e sciure 'e ciento primmavere
fanno sturdì comme sturdisce tu.

E che ducezza è 'a vocca toia carnale!
Quanno me vase 'o core mio se 'nfiamma
pecché ce sta Caflisce mmocca a tte!

Che zuccaro! Che zuccaro speciale!
D' 'e vase tuoie ne bastarrie nu grammo
pe' 'nzuccarà sei machine 'e cafè...

Piccerella

e ’o core ’mpietto: Porta Capuana...

PICCERELLA

di Claudio Pennino

Passano ’e iuorne e cresce ’a cunvinzione

ca tu te vaie facenno piccerella.

Primma d’ ’e lampe se senteno ’e tuone?

Ire na noce e mo si na nucella.

E ’o bello è ca tu manco te n’adduone

ca ’a mana t’addeventa na manella...

E ’a chesta vocca toia, frutto ’e staggione,

mo, ammalapéna,  c’esce na resella.

E ’a toia era resata sazzia e chiatta,

e ’o core ’mpietto: Porta Capuana...

e ire grossa ’e na mesura esatta:

quanto bastava a te tené ’int’ ’a mana.

Mo, piccerella comme te si’ fatta,

te porto dint’ ’o core sana sana.

(da Vela ’e penziere, 1999)