Carnevale

Stu càmmese viecchio,

stu Pulicenella

CARNEVALE

di Giovanni Capurro

Llà, fore ’a puteca,

nu càmmese janco,

vuttato da ’o viento

s’abbocca a nu fianco;

na vesta ’e pacchiana,

nfelata a na mazza,

pur’essa ogne tanto

s’abboffa, svulazza...

E ’o viento che scioscia

l’accocchia ogne poco:

don Pietro s’ ’e guarda

scarfànnose a ’o ffuoco.

Stu càmmese viecchio,

stu Pulicenella,

che dice, ogne tanto,

vicino a’ vunnella?

Cchiù llà capuzzéa

nu dòmino rosa...

Va, nzerra ’a puteca,

don Pié, nun è cosa.

Nun siente ’e suspire

che votta Arlecchino?

che spiere? Ch’aspiette?

Ca schiara matino?

Va llà, carnevale

nun di’ ca ll’hê visto;

fa priesto, arricetta,

nun struiere cisto...

Ma ’on Pietro, addurmuto

vicino ’o vrasiere,

se sonna ’o ppassato...

Che tiempe ’e piacere!

Che carre, che feste,

che belli sserate,

che belli denare

pe’ niente lucrate!

E ’on Pietro alla fine

se sceta, sbadiglia,

se stenne... e ’int’ ’o ffuoco

nun trova muniglia.

È tarde, fa friddo,

nun trase nu cane...

S’avota, se gira,

se scioscia ’int’ ’e mmane...

Va llà, carnevale

nun di’ ca ll’hê visto,

nun strujere cisto,

vattenne a cuccà.

Arillo

               Canta e chiagne ’int’ ’a nuttata

              p’ ’o silenzio d’ ’a campagna

ARILLO

di Giovanni Capurro

Ma che vo, che vo st’arillo

ca fa un’arte e mai se stanca ?

Ma che dice ? Che lle manca ?

Canta o chiagne ? Che vo dì ?

Canta e chiagne ’int’ ’a nuttata

p’ ’o silenzio d’ ’a campagna.

Chiammarrà, forse, ’a cumpagna,

lle dà ’o segno isso addo’ sta...

Vi’ che forza e che custanza

ca zerrèa tutt’ ’a nuttata...

Sta pacienza pe’ na ’ngrata

sulo ammore nce ’a po’ dà..

Chillu core piccerillo

guarda llà, pure patisce...

Chiamma ammore, e chi ’o capisce ?

Chi a n’arillo po’ penzà ?

Io, ca sento, ’o cumpatisco,

pecché i’ pure ’a cchiù de n’anno

sto suffrenno e sto chiammanno

chi ha giurato ’e nun sentì.

Tutto è ammore! Io sulamente

nun ne trovo nu tantillo...

Sto facenno comm’ ’arillo:

canto all’aria... e ch’aggia fà?

'O iuorno 'e Pasca

Quant’abbunnanza rimasta comm’era,

llà, tale e quale, pe’ mancanza ’e solde!

’O IUORNO ’E PASCA

di Giovanni Capurro

E cu ssalute: comme ll’ite vista

st’anno ’a puzzate vedé pe’ cient’anne.

Se so’ sciugliute già tutte ’e ccampane,

’ngloria d’ ’o Cielo.

E tengo ancora nnante all’uocchie mieie

tutta ’apparata ca s’è fatta st’anno

d’ ’o magnà ’e Pasca, comme se fa sempe

fora ’e pputeche

d’ ’e casadduoglie, d’ ’e meglie chianchiere:

cantine nove, magazzine ’e pasta...

Che bella cosa, che scicchezza ’e rrobba,

quanta ricchezza!

Quant’abbunnanza rimasta comm’era,

llà, tale e quale, pe’ mancanza ’e solde!

’Izate ’a voce, meh, gente, alluccate

forte : Alleluia!

Quanno, trasenno, zi’ prevete nuosto

benedicette tutta ’a casa, allora

avimmo miso suspiranno ’o soldo

dint’ ’o catillo,

e mentre asceva nzieme c’ ’o pecuozzo

dicenno a tutte quante: — Buona Pasqua! —

ll’aggio guardato cu ’e bbraccia chïate

nzi’ ch’è scumparso,

e aggio penzato: quanta bona gente

mettono ’o soldo cu ’a speranza ’o core!

Ma è nu destino: ll’acqua santa e ’a parma

mai fanno niente.

Resta ’a speranza, ma speranno sempe,

a poco a’ vota, tutte nce ne iammo,

e tutte ’e ccose ’e chesta vita nfama

restano ’o stesso.

Qgge chi scippa, chi afferra ’a campata,

se guarda attuorno pe’ chi sa lle sfuie,

pecché chi campa nu’ sta maie sicuro,

tutto fallesce.

Munno busciardo, fauzo, traditore;

te vene meno stesso ’o sango tuio;

tutto è denaro! denare, denare,

sempe denare,

sinò si' muorto. Ma, penzammo a Pasca:

nzi’ ca c’esiste nu bicchiere ’e vino

vevimmencillo. Vuo’ penzà... che cosa?

Pienze dimane.

Ogge se campa, dimane se more;

e bona Pasca, comme dico a vuie,

dico a me pure. Bona ge’, alluccate

forte: Alleluia!

Natale

Sta zampogna comm’è doce

NATALE

di Giovanni Capurro

E che fa si a nove lire

sta signata ancora ’a nzogna,

si stu core m’è zumpato

quanno ha ntiso na zampogna?

Che mme preme ’a malatia,

ll’uvaiuolo, ’e fruttaiuole,

quanno sento mmiezo ’a via

sparà tracche e terziole?

Chi ce penza ca ’e capune

nun so’ cosa pe chist’anno,

quanno ’e lume n’ata vota

veco ’a sera, cammenanno?

Chi ce penza a ’o portafoglio?

Ma chi ’e cconta ’e ccartuscelle,

quanno vide n’ata vota

pe’ Tuleto ’e bbancarelle?

E che fa si ’o tabbaccaro,

senza sale, piglia e nzerra,

quanno saie ca finalmente

è fernuta chesta guerra?

Iesse a ’e ciele ’o fritto ’e pesce,

iesse a ’e ciele ’o capitone,

ma tu almeno nu bengala

può appiccià fora ’o balcone.

Aggio visto purtà ncapo

nu presebbio ’a nu guaglione,

nu vicchiotto che passava

cu nu gruosso buttiglione.

Na figliola cu ’e pullaste,

nu nennillo c’ ’o Bammino,

nu garzone ’e canteniere

cu na nferta e ’o quarto ’e vino...

Ah! Natale beneditto,

tu sta vota puorte ’a pace:

che putenza chella grotta,

fatta ’e sùvero e vammace!

Io pe’ te me sento ancora

n’ata vota guagliunciello!

Sta zampogna comm’è doce,

chistu suonno quant’è bello!

Tu, Natale, sempe ricco,

sempe caro me si’ stato,

tu ca tuorne e me ricuorde

tutt’ ’e ccose d’ ’o ppassato!