Stroppola p' 'o Capodanno

facimmo ll’aurie pe tutto ll’anno

STROPPOLA P’ ’O CAPODANNO

di Claudio Pennino

                                             da G. Rodari

Chesta è na stoppola p’ ’o Capodanno:

facimmo ll’aurie pe tutto ll’anno:

voglio gennaio c’ ’o sole d’abbrile,

nu luglio frisco e nu marzo gentile;

voglio nu iuorno ca nun fa maie sera,

nu mare calmo comm’ a primmavera;

’o ppane cavero, frisco sfurnato,

ncopp’ ’o cepriesso na rosa schiuppata;

voglio c’ ’a iatta è cumpagna d’ ’o cane,

’o llatte ca iesce ’a dint’ ’e ffuntane;

E si voglio troppo nun me dà niente,

damme n’abbraccio e simmo cuntente.

© Claudio Pennino

Senza fà niente

M’aggi’ ’a stancà a stà cu ’e mmane mmano

SENZA FÀ NIENTE

di Claudio Pennino

Me voglio stà nu iuorno sano sano,

senza fà niente, senz’appriett’ ’e core.

M’aggi’ ’a stancà a stà cu ’e mmane mmano,

nun voglio caccià manco ’o naso ’a fore.

Senza arapì na paggena ’e ggiurnale,

senza penzà chi me vo bene o male:

p’ ’a capa, leggia comm’a nu veliero,

nun voglio avé nemmanco nu penziero.

(da Villanelle, 2016)

Ciardeniere

me so’ fatto, pe nziria, ciardeniere

CIARDENIERE

di Claudio Pennino

Pe me scurdà chesta faccella tonna,

me so’ fatto, pe nziria, ciardeniere;

’a ccà scippo nu ramo e ’a llà na fronna,

e me te sto’ levanno d’ ’e penziere.

Pe me sanà cchiù ampressa ’sti fferite,

sto’ semmenanno viole e margarite...

ma unu sciore schioppa p’ ’e ciardine:

na rosa prufumata e chiena ’e spine.

(da Villanelle, 2016)

na vela ’e penziere

’A VELA

di Claudio Pennino

’O viento giallo

d’ ’o sole che more,

smove appena

na vela ’e penziere

’ncopp’a ll’acqua d’ ’a malincunia.

(da Vela ’e Penziere, 1999)

'A chiavetella d'oro

Tengo na chiavetella tutta d’oro

’A CHIAVETELLA D’ORO

di Claudio Pennino

Tengo na chiavetella tutta d’oro,

c’arape ’o core ’e ffemmene cchiù bbelle;

quanno nce traso trovo nu tesoro,

ch’è fatto ’e sentimente e canzuncelle.

Ma quanno ’o core tuio aggio araputo,

na bbotta ’mpietto i’ pure aggio sentuto:

« Ggiesù, che sarrà maie chistu dulore? »

E tu, senza piatà, m’hê ditto: « E’ ammore! »

(da Villanelle, 2016)

’O specchietiello

Tengo nu specchietiello affatturato

’O SPECCHIETIELLO

di Claudio Pennino

Tengo nu specchietiello affatturato:

quanno nce guardo dinto tu accumpare.

Veco si staie tu sola o staie cu n’ato,

si staie ncopp’a nu monte o nfunn’ ô mare.

Tutto me dice, pure si suspire,

e legge nfunn’ ’o nniro ’e ’st’uocchie nire.

Pure ’int’ ’o scuro saccio tu che faie…

Ma, pe paura, i’ nun ce guardo maie.

(da Villanelle, 2016)

Ce sta nu posto

Ce sta nu posto ca prufuma ’e rosa

CE STA NU POSTO

di Claudio Pennino

Ce sta nu posto ca prufuma ’e rosa,

quanno ce vaco stongo mparaviso;

llà sulamente ’o core s’arreposa

e se cunzola cu nu pizzo a rriso.

Chi ’o cerca nun ’o trova ncopp’ ê ccarte,

e, dint’ ê libbre, ognuno va sbarianno;

chi ce vo ì, è inutele ca parte,

ca nun ce stanno strate ca ce vanno.

E nun ce vonno vele o bastimiente,

ca, a chistu posto, nun se va pe mmare.

Cu ttutto ca nisciuno sape niente,

se nformano pe gghì ggente a migliare.

A chistu posto ca prufuma ’e rosa,

comme s’arriva ognuno ’o vvo sapé;

llà sulamente ’o core s’arreposa,

e i’ ce vaco quanno sto cu tte.

(da Primma ca scura notte, 2009)

strignenno dint’ ’e mmane

na rosa prufumata.

’A FINE D’ ’O MUNNO

di Claudio Pennino

              Appuntamento a Capemonte

Leggo ncopp’ ’o ggiurnale,

stampato chiaro e ttunno:

« Stasera a ll’otto mpunto,

vene ’a fine d’ ’o munno! »

Me faccio ’a resatella

e penzo a ’stu mumento:

«Propio stasera a ll’otto

ca tengo ’appuntamento?!… »

Vi’ quanta fessarie

se ’mmentano ’e ggiurnale.

E ntanto songo ’e sseie,

e tu si’ puntuale.

Me vesto lindo e pinto:

cammisa e fazzulette,

’o vestetiello ’e lino,

e ggià so’ fatte ’e ssette.

Felice mmiez’ ’a ggente

me faccio ’a cammenata,

strignenno dint’ ’e mmane

na rosa prufumata.

Priciso, a ll’otto mpunto,

me trovo ncopp’ ’o Tunno.

Tu spunte ’a ll’ata parte

e si’ ’a fine d’ ’o munno.

(’A pianta d’ ’a felicità 2004)

Ce sta n'aucelluzzo

ch’è affatturato e tene ’e ppenne d’oro

CE STA N'AUCELLUZZO

di Claudio Pennino

Ce sta n’aucelluzzo mmiez’ ê ffronne,

ch’è affatturato e tene ’e ppenne d’oro.

Quanno t’affacce, ’o mpiso, s’annasconne,

e ’a miez’ ê ffrasche canta: « I’ pe tte moro…»

Sott’ ’a fenesta toia, tutt’ ’a nuttata,

aggio cantato e nun te si’ affacciata.

E ’aucelluzzo, c’ ’o bbeccuccio ’argiento,

m’ha ditto: «’Sti suspire vanno ô viento!»

(da Villanelle, 2016)

'E pparole toie

Songo, ’e pparole toie, suonne ncantate

’E PPAROLE TOIE

di Claudio Pennino

Songo, ’e pparole toie, liquore doce,

barzamo ’e rose, perzeche e cannella,

e sanno ’e fiche, giesummine e noce,

nespola nzuccarata e cerasella.

Songo, ’e pparole toie, suonne ncantate:

parlano ’e draghe, Rre, Riggine e fate;

so’ sante, comm’ ’e vierze ’e na preghiera,

e addorano ’e vainiglia e de pastiera.

(da Villanelle, 2016)

'O tiempo

A precipizzio chistu tiempo passa

’O  TIEMPO

di Claudio Pennino

A precipizzio chistu tiempo passa,

e nun capisco pecché tene pressa.

Nu iuorno vene e n’ato già ll’appassa,

c’ ’a vita sana sfuma ampressa ampressa.

Si ’o vuò fermà, è inutile ogne sfuorzo,

e sissant’anne pareno nu muorzo.

Me so’ fatto capace, urdemamente,

ca sto’ perdenno ’o tiempo sulamente.

(da Villanelle, 2016)

'A strata mia

St’urdemo tratto ’e strata

facimmoncillo aunite

’A STRATA MIA

di Claudio Pennino

 Facimmo ’a stessa strata,

- longa, pesante, storta, -

e tutte ’nzieme iammo,

senza sapé addó porta.

E ghiammo, e via facenno

cuntente nuie ce aunimmo,

ma comme ’a strata saglie,

subbeto ce perdimmo.

Ma appriesso vene n’ato

cchiù svelto, cchiù sicuro.

St’ato che m’ ’o ricordo

quanno era nu criaturo.

Tutte p’ ’a stessa strata,

comm’a tanti fuiente,

guardanno fisso nterra,

senza sapé maie niente.

E mo vene na curva,

mo vene na sagliuta.

Chi m’è cchiù cara ô munno,

me lassa e me saluta.

Scumpare comm’a n’ombra.

Cchiù primma s’è abbiata…

Ce dammo appuntamento

ȃ fine ’e chesta strata.

’O tiempo ’e piglià sciato:

e ghiammo, alleramente.

P’ ’a via chesto ce aspetta:

’o bbuono e ’o mmalamente.

Guardammoce ’int’a ll’uocchie,

mo ’a strata se fa appesa.

Doppo stu tratto a lluongo

subbeto vene ’a scesa.

Restammo tutt’ ’e dduie

pe chesta via stramana,

cu nu criaturo mbraccio

e n’ato mana a mmana.

Tenimmoce vicine.

St’urdemo tratto ’e strata

facimmoncillo aunite,

comm’a na cammenata.

Senza fa cchiù dumanne...

senza truvà ’a risposta...

pecché sta strata mia

è addeventata ’a nosta.

(da Vela ’e penziere, 1999)

Si 'o core tuio...

Si ’o core tuio fosse nu libbro ’e scola

SI ’O CORE TUIO...

di Claudio Pennino

Si ’o core tuio fosse nu libbro ’e scola,

io me liggesse appena ddoie tre ccose;

e me mparasse sulo na parola...

ca è prufumata comm’ ’e ffronn’ ’e rose.

Na parulella corta e longa assaie,

ca è paraviso ma è zuffunno ’e guaie;

ch’è amara... ma nu barzamo è ’o sapore,

ca se scrive veleno e legge ammore!

(da Villanelle, 2016)

Valente cavaliere

Quanno vengo addù te, tu acala ’a trezza

VALENTE CAVALIERE

di Claudio Pennino

Me voglio fà valente cavaliere,

’e chille arresolute e preputente;

na spata quanto a chella ’e nu chianchiere,

e nu cemmiero d’oro e stralucente.

Quanno vengo addù te, tu acala ’a trezza,

sinò scarrupo ’a torre cu ’a furtezza;

e si me cade mbraccio appassiunata,

i’ stuto ’a luna cu na sciabbulata.

(da Villanelle, 2016)