'E pparole toie

Songo, ’e pparole toie, suonne ncantate

’E PPAROLE TOIE

di Claudio Pennino

Songo, ’e pparole toie, liquore doce,

barzamo ’e rose, perzeche e cannella,

e sanno ’e fiche, giesummine e noce,

nespola nzuccarata e cerasella.

Songo, ’e pparole toie, suonne ncantate:

parlano ’e draghe, Rre, Riggine e fate;

so’ sante, comm’ ’e vierze ’e na preghiera,

e addorano ’e vainiglia e de pastiera.

(da Villanelle, 2016)