'E scarpe

dint’ ’a pultrona-trono ’e nu pulimmo

’E SCARPE

di Alfredo Gargiulo

Smargiassamente, sprufunnato a sgherra,

dint’ ’a pultrona-trono ’e nu pulimmo,

se sta allustranno ’e scarpe nu pezzente:

nu paro ’e scarpe triste, scurtecate

e arrepezzate pure malamente.

Stu pover’ommo, overo sfurtunato:

nu vraccio muzzo, pallido, malato,

che campa, ancora, ’e stiente e sufferenze,

matina e ssera, pe na vita sana,

ha stesa sempe ’a mana,

e ha fatto sulamente riverenze

a ttutte chille, ca p’ ’o fà campà,

le fanno nu murzillo ’e carità.

E mo ca nnanze a isso, vede a n’ommo

accartucciato, quase nginucchiato,

ca le pulezza ’e scarpe,

’o guarda cu superbia e guapparia,

comm’a n’Autorità,

e pe nu sfizio ’e cammurristaria,

’o vulesse antrasatto pruvucà:

ce se vulesse quase appiccecà!...

Mo se n’è sciso ’a copp’ ’a seggia-trono,

se fa appiccià na meza sigaretta,

e mentre s’alluntana,

se guarda ’a luce ’e chelli scarpe gialle,

tutto felice, tutto suddisfatto,

manco avesse pigliato na sisalle...