Serenatella fatta a vvino

 

Aggio scigliuto na canzona ’e voce

SERENATELLA FATTA A VVINO

di Claudio Pennino


Aràpeme na senga ’e ’sta fenesta,
e aràpeme d’ ’o core tutt’ ’e pporte;
quanno me vide abbascio famme festa,
e ccacce ll’oro ’a dint’ ’a casciaforte.

Pe ’st’occasione ncìgnete na vesta,
e ffatte bbella ca, mannaggia ’a morte,
stasera aggio purtato ’a meglia urchesta
e t’aggi’ ’a fà sentì nu piezzo forte.

Aggio scigliuto na canzona ’e voce
pecché già saccio c’ ’o ccantà te piace.
Si nun t’affacce mo, te metto ncroce:

te scasso ’e llastre, ’o ssà? Fatte capace.
E tanno m’ammanzisco e ttorno doce,
quanno te vutte abbascio pe ffà pace.


(da Primma ca scura notte, 2009)