na vela ’e penziere

’A VELA

di Claudio Pennino

’O viento giallo

d’ ’o sole che more,

smove appena

na vela ’e penziere

’ncopp’a ll’acqua d’ ’a malincunia.

(da Vela ’e Penziere, 1999)

'A chiavetella d'oro

Tengo na chiavetella tutta d’oro

’A CHIAVETELLA D’ORO

di Claudio Pennino

Tengo na chiavetella tutta d’oro,

c’arape ’o core ’e ffemmene cchiù bbelle;

quanno nce traso trovo nu tesoro,

ch’è fatto ’e sentimente e canzuncelle.

Ma quanno ’o core tuio aggio araputo,

na bbotta ’mpietto i’ pure aggio sentuto:

« Ggiesù, che sarrà maie chistu dulore? »

E tu, senza piatà, m’hê ditto: « E’ ammore! »

(da Villanelle, 2016)