 |
| Te voglio di’... puntini sospensivi |
PUNTEGGIATURA
di Claudio Pennino
Tu si’ pe mme nu punto esclamativo,
nu punto fermo dint’ â vita mia.
Eppure nfacci’ a tte, uh mammamia,
se legge ’o punto, ma è interrogativo.
Si’ ttutta “punto e vvirgula”, precisa,
e vvuò tené sempe raggione tu;
nun te spuoste ’e na virgula, Ggiesù,
facisse maie pe mme nu pizzo a rrisa.
Te voglio di’... puntini sospensivi,
meglio ca me sto’ zzitto, è meglio assaie,
sinò c’appiccecammo, e nun sia maie,
fernesce ca passammo a “ll’aggettive”.
«Pe mme si’ na parentesi...» diciste,
ma m’ ’o ddiciste cchiù ’e diece anne fa.
Mo, sulamente pe puntualizzà,
te voglio arricurdà ca rummaniste!
E stammo punto e a ccapo n’ata vota,
me vuò sottolineà ogni pparola,
comme si fosse ’o guagliunciello ’e scola,
e sento ncuorpo a mme ca s’arrevota.
E nun ’o vvuò capì, senza buscia,
ca si’ pe mme nu punto esclamativo,
che ddico? ’e cchiù: nu punto ammirativo,
nu punto fermo dint’ â vita mia.
© Claudio Pennino
