Ce sta chi ricco assaie

Che sciorta nera ’o cielo m’ha mannato

CE STA CHI RICCO ASSAIE

di Claudio Pennino

Ce sta chi, ricco assaie,

d’ ’a vita soia surtanto bene ha avuto,

e nun fatica maie,

e sempe sta servuto e reveruto.

E nun le manca niente,

e, senza nu penziero malamente,

nun sape che so’ ’e stiente,

e, tutt’ ’o iuorno, campa alleramente.

Ma basta ca ’stu tale,

tene, però, nu poco ’e male ’e mole,

na cosa naturale,

iusto pe lle fa fà ddoie capriole,

ca, pronto, s’allamenta:

« Che sciorta nera ’o cielo m’ha mannato,

oi vita malamenta,

pecché so’ nato tanto sfurtunato? »

(da ’A pianta d’ ’a felicità, 2004)

'O raggio 'e sole

c’ ’a scusa ’e ta spassà c’ ’a palummella,

ne faje cadé nu raggio nfront’ a mme

’O RAGGIO ’E SOLE

di Eduardo De Filippo

È na tristezza chesta casa mia,

pe bia c’ ’o sole nun ce trase maje:

è sempe scura, che malincunia!

Na casa senza sole che nne faje?

Nun se sente n’auciello, nun se sente;

sta casa è fredda pure int’ a ll’està.

Appicio ’o ffuoco? Appiccio inutilmente:

’o sole scarfa, ’o ffuoco ll’ ’e appicià…

Ma tu ’a rimpetto te ne si’ addunata,

t’ha fatto pen’ ’a casa mia spruvvista;

si’ ’e core buono… e ’a quanno ll’ ’e guardata,

sta fenestella nun ll’ ’e perza ’e vista…

E cu nu specchio o cu na rastulella,

comm’ ’o sole sta tutt’ ’e faccia a te,

c’ ’a scusa ’e ta spassà c’ ’a palummella,

ne faje cadé nu raggio nfront’ a mme.

Nzerro ll’uocchie... Si ’o vraccio s’è stancato,

lass’ ’o specchio appujato... Zitta e muta,

vatténne. Quann’ ’o raggio s’è fermato,

segn’è ca chi ’o muveva se n’è gghiuta.

Ventariello

Chiacchiarea, quase annascosta

mmiez’ a ll’ombra, na funtana

VENTARIELLO

di Salvatore Di Giacomo

Aggarbato, frisco e ffino

d’ ’a matina ’o ventariello

fa, ogni ghiuorno, ’e stu ciardino

tutte ’e ffronne suspirà.

Chiacchiarea, quase annascosta

mmiez’ a ll’ombra, na funtana,

ca, sapenno ’a storia nosta,

’a vo’ a ll’arbere cuntà.

«Bene mio! - diceno ’e ffronne -

Nientemeno accussì è nfama?»

E cu ll’acqua, ca risponne,

fanno nzieme uno ciu ciù...

Tanto ch’io, ca guardo attuorno

e passeo mmiez’a sti ffrasche,

mme murtifico p’ ’o scuorno,

e mme mbroglio a cammenà...

Sabato santo

pe ssentere ’a voce d’ ’e vviole, io mm’affacciaie

SABATO SANTO

di Luca Postiglione

Fore a stu barcunciello a primmo piano,

mammà spennava na gallina nera.

Vulavano, scennenno chianu chiano,

’e ppenne, attuorno a ’e fierre d’ ’a ringhiera.

Era Sabato Santo. Era d’Abbrile.

Na campana sunaie. Nu vennetore

dette ’a voce d’ ’o ggrano, ’int’ ’o curtile.

Po’ n’ato: — " Bellu sciore !... Bellu sciore!... "

Sunaie n’ata campana, cchiù vicina.

E allora, n’ata, comma na risposta,

subeto, appriesso... Chella cchiù vicina

era ’a campana d’ ’a parrocchia nosta.

Pe meglio risciatà ll’aria d’abbrile,

e pe ssentere ’a voce d’ ’e vviole,

io mm’affacciaie. Guardaie. Dint’ ’o curtile

ce steva na culata spasa a ’o sole...