Sabato santo

pe ssentere ’a voce d’ ’e vviole, io mm’affacciaie

SABATO SANTO

di Luca Postiglione

Fore a stu barcunciello a primmo piano,

mammà spennava na gallina nera.

Vulavano, scennenno chianu chiano,

’e ppenne, attuorno a ’e fierre d’ ’a ringhiera.

Era Sabato Santo. Era d’Abbrile.

Na campana sunaie. Nu vennetore

dette ’a voce d’ ’o ggrano, ’int’ ’o curtile.

Po’ n’ato: — " Bellu sciore !... Bellu sciore!... "

Sunaie n’ata campana, cchiù vicina.

E allora, n’ata, comma na risposta,

subeto, appriesso... Chella cchiù vicina

era ’a campana d’ ’a parrocchia nosta.

Pe meglio risciatà ll’aria d’abbrile,

e pe ssentere ’a voce d’ ’e vviole,

io mm’affacciaie. Guardaie. Dint’ ’o curtile

ce steva na culata spasa a ’o sole...