Nu quatto 'e maggio

tutt’ ’a miseria dint’ a na mappata

NU QUATTO ’E MAGGIO

di Giovanni Attanasio




Na carretta c’ ’o ciuccio s’è fermata
nnanze a nu palazziello d’ ’a Nfrascata,
cu quatto scartapelle mise ’a coppa:
liette scassate, matarazze ’e stoppa,

nu cummò viecchio, na credenza zoppa,
nu stipone che cade si se ntoppa,
na gatta dint’ ’o sacco arravugliata,
tutt’ ’a miseria dint’ a na mappata.

E sso’ vvenute appriesso â carrettella:
’a mamma, sette figlie, ’a vicchiarella
ca se tira nu cane cu ’a curdella,

e ’o capo ’e casa, comm’ a nu lucigno!
Ha ditto ’o guardaporta ca è mmaligno:
Mo trase ’o sapunaro ’int’ ’o suppigno!

Alba e tramonto

Tu spanne attuorno n’aria ’e cuntentezza

ALBA E TRAMONTO

di Mario Sieyes

Tu... pare ll’alba ’e na jurnata ’e sole,

i’ nu tramonto che, poco ato e mmore;

tu... parle e songo ’e zucchero ’e pparole,

i’... me sto zitto e ttengo ’o ffele ’ncore.

Tu... vint’anne surtanto! I’, n’atu ppoco

e sso’ trasuto dint’ â cinquantina…

Tu... tutt’argiento vivo, tutta ffuoco...

i’ cu ’acchiara a ll’uocchie e ’a papalina.

Ma quanno vaje p’ ’a casa e traffechìe,

arricettanno o stanno ’int’ â cucina,

sempe cu ’o pizzo a rrisa e cu ppazzìe,

appena può llassà, mme staje vicina...

E trascenammo ’nzieme chesta vita!

Ma che rumanzo è cchesta vita nosta;

tu... nun vuò fà vvedè che si’ pentita...

ma sta finzione cara assaje te costa!

E rride e ccante... Povera figliola!

Tu spanne attuorno n’aria ’e cuntentezza

e invece... si’ n’auciello ’int’ â cajola...

che nu juorno ’ncappaje dint’ a na rezza!