Buon Anno Nuovo

Ammore Ammore

Io te cercaie nu milo muzzecato

AMMORE AMMORE

di Luca Postiglione

Io te cercaie nu milo muzzecato,

e te dicette: - Te dongo stu core...

E te lu dongo tutto ’nnargentato...

Dinto ce truove scritto sti pparole:

“Ammore, Ammore, e quanto t’aggio amato!...

Ammore, Ammore, io, si nun t’amo, moro!...”

Che me manca

Che t’aggia dà pe m’accattà stu core?

CHE ME MANCA!

di Totò (Antonio De Curtis)

I’ tengo ’e llire, nun me manca niente,

me pozzo accattà chello ca me piace:

na statua d’oro, nu vapore ’argiento...

palazze, ville... case in quantità.

- Chi è cchiù felice ’e te?! - mme dice ’a ggente.

- Si’ ricco, si’ guaglione... che te manca? -

E chest’ è overo, nun me manca niente.

Sulo na cosa mme vurria accattà...

Nu core... tutto core ’e tennerezza

ca me vulesse na muntagna ’e bbene...

ca me sbattesse ’mmano p’ ’a priezza,

cuntento pe mme dà ’a felicità.

Dipende a me; nun voglio aspettà ancora.

Tuzzuliaje a porta ’e na figliola:

- Che t’aggia dà pe m’accattà stu core?

Qualunque prezzo, dì, che t’aggia dà? -

Me rispunnette cu bella maniera:

- 'O core nun se venne... se riala...

crediteme, ca io ve so’ sincera...

cu ’e llire ’o core nun se pò accattà!

'A strata

Portano tutte ’e strate a ’o stesso punto

’A STRATA

di Diego Petriccione

Nuie simme tuttequante cammenante:

chi corre, chi va chiano e chi se mponta,

quaccuno aiza ’a voce superchiante,

quacc’ato se ntallea, se ferma e conta...

Nce sta chi se fa largo mmiezo a tante,

n’ato che perde tiempo, e appriesso ’o sconta,

chi, stracquo, se repiglia e va cchiù nnante,

chi vo’ turnà c’ ’a strata soia nun sponta.

Ma tuttequante, nobbele e pezziente,

partenno, avimmo fatto ’o stesso cunto:

puté arrivà senza fatica e stiente!

Portano tutte ’e strate a ’o stesso punto:

scuntente nce s’arriva, o amorcunzente,

chi frutto aciervo, e chi già vino ’e spunto!

Nun ce sta legge

E nun c’è legge pe chi è nnammurato

NUN CE STA LEGGE

di Claudio Pennino

Nun ce sta legge pe chi sta mbriaco,

ca mentre è pasta ’e mèle, è malandrino;

e mmesca ’int’ ê pparole ’a ponta ’e ll’aco,

e quanno parla nun è isso: è ’o vino.

Nun ce sta legge manco pe chi è pazzo,

ca sempe sfrennesea e nun raggiona;

e mentre rire o te fa nu strapazzo,

chiagne sentenno ’e nnote ’e na canzona.

Nun ce sta legge pe chi tene famma,

ca sempe sta speruto e sfastiriuso;

e comm’ ’o piccerillo a ppiett’ â mamma,

strilla ca nun se sazzia e stà picciuso.

E nun c’è legge pe chi è nnammurato,

ca chi vo bbene è pazzo e malandrino,

e ’ammore nun ’o sazzia e stà stunato,

e pare nu mbriaco e ’un beve vino.

(Primma ca scura notte 2009)

L'albero d'oro

E voglio pastenà n’albero d’oro

L’ALBERO D’ORO

di Ferdinando Russo

E voglio pastenà n’albero d’oro

nnanze a la porta de l’Ammore mio!

Ogne frutto che nasce è nu tesoro,

ogne fronna che sponta è nu gulio!

È nu gulio de te vasà sta vocca,

vocca ca se suspira e nun se tocca;

è nu gulio de te vasà sta mana,

core d’oro mio, Stella Diana.

'A livella

Ogn’anno, il due novembre, c’è l’usanza

per i defunti andare al Cimitero

’A LIVELLA

di Totò (Antonio De Curtis)

Ogn’anno, il due novembre, c’è l’usanza
per i defunti andare al Cimitero.
Ognuno ll’adda fà chesta crianza;
ognuno adda tené chistu penziero.

Ogn’anno, puntualmente, in questo giorno,
di questa triste e mesta ricorrenza,
anch’io ci vado, e con dei fiori adorno
il loculo marmoreo ’e zi’ Vicenza.

St’anno m’è capitato n’avventura...

dopo di aver compiuto il triste omaggio

- Madonna! - si ce penzo - che paura!

ma po’ facette un’anema e curaggio.

’O fatto è chisto, statemi a sentire:

s’avvicinava ll’ora d’ ’a chiusura:

io, tomo tomo, stavo per uscire

buttando un occhio a qualche sepoltura.

« Qui dorme in pace il nobile marchese

signore di Rovigo e di Belluno

ardimentoso eroe di mille imprese

morto l’11 maggio del ’31 ».

’O stemma cu ’a curona ’ncoppa a tutto...

...sotto na croce fatta ’e lampadine;

tre mazze ’e rose cu na lista ’e lutto:

cannele, cannelotte e sei lumine.

Proprio azzeccata ’a tomba ’e ’stu signore

nce stava n’ata tomba piccerella,

abbandunata, senza manco un fiore;

pe’ segno, sulamente na crucella.

E ncoppa ’a croce appena se liggeva:

« Esposito Gennaro – netturbino »:

guardannola, che ppena me faceva

’stu muorto senza manco nu lumino!

Questa è la vita! ncapo a me penzavo...

chi ha avuto tanto e chi nun ave niente!

Stu povero maronna s’aspettava

ca pure a ll’atu munno era pezzente?

Mentre fantasticavo ’stu penziero,

s’era già fatta quase mezanotte,

e i’ rimanette nchiuso priggiuniero,

muorto ’e paura... nnanze ’e cannelotte.

Tutto a nu tratto, che veco ’a luntano?

Ddoje ombre avvicenarse ’a parte mia...

Penzaje: stu fatto a me mme pare strano...

Stongo scetato... dormo, o è fantasia?

Ate che fantasia: era ’o Marchese,

c’ ’o tubbo, ’a caramella e c’ ’o pastrano;

chill’ato appriesso a isso, un brutto arnese,

tutto fetente e cu na scopa mmano.

E chillo certamente è don Gennaro...

’o muorto puveriello...’o scupatore.

’Int’ a ’stu fatto i’ nun ce veco chiaro:

so’ muorte e se ritirano a chest’ora?

Putevano stà ’a me quase nu palmo,

quanno ’o Marchese se fermaje ’e botto,

s’avota e tomo tomo... calmo calmo,

dicette a don Gennaro: « Giovanotto!

Da Voi vorrei saper, vile carogna,

con quale ardire e come avete osato

di farvi seppellir, per mia vergogna,

accanto a me che sono blasonato!

La casta è casta e va, sì, rispettata,

ma Voi perdeste il senso e la misura;

la Vostra salma andava, sì, inumata;

ma seppellita nella spazzatura!

Ancora oltre sopportar non posso

la Vostra vicinanza puzzolente,

fa d’uopo, quindi, che cerchiate un fosso

tra i vostri pari, tra la vostra gente ».

« Signor Marchese, nun è colpa mia,

i’ nun v’avesse fatto chistu tuorto;

mia moglie è stata a ffà ’sta fesseria,

i’ che putevo fà si ero muorto?

Si fosse vivo ve farria cuntento,

pigliasse ’a casciulella cu ’e qquatt’osse

e proprio mo, ’o bbi’... ’int’ a ’stu mumento

mme ne trasesse dinto a n’ata fossa ».

« E cosa aspetti, oh turpe malcreato,

che l’ira mia raggiunga l’eccedenza?

Se io non fossi stato un titolato

avrei già dato piglio alla violenza! »

« Famme vedé... piglia ’sta violenza...

’A verità, Marché, mme so’ scucciato

’e te senti; e si perdo ’a pacienza,

mme scordo ca so’ muorto e so’ mmazzate!...

Ma chi te cride d’essere... nu ddio?

Ccà dinto, ’o vvuò capì, ca simmo eguale?...

Muorto si’ tu e muorto so’ pur’io;

ognuno comme a n’ato è tale e qquale ».

« Lurido porco!... Come ti permetti

paragonarti a me ch’ebbi natali

illustri, nobilissimi e perfetti,

da fare invidia a Principi Reali? ».

« Tu qua’ Natale... Pasca e Ppifania!!!

T’ ’o vvuò mettere ncapo... ’int’ ’a cervella

che staje malato ancora ’e fantasia?...

’A morte ’o ssaje ched’ è?... è una livella.

Nu rre, nu maggistrato, nu grand’ommo,

trasenno stu canciello ha fatt’ ’o punto

c’ha perzo tutto, ’a vita e pure ’o nomme:

tu nu t’hê fatto ancora chistu cunto?

Perciò, stamme a ssentì... nun fà ’o restivo,

suppuorteme vicino, che te mporta?

’Sti ppagliacciate ’e ffanno sulo ’e vive:

nuje simmo serie... appartenimmo â morte! ».

Cu ’st’uocchie guardame amurosa e ride

TU CRIDE CA PECCHÉ ME SI’ CRUDELE

di Claudio Pennino

Non creder, donna, per essere crudele


Non creder, donna, per essere crudele

e per tenermi in pianti e in sospiri,

che io non t’ami e non ti sia fedele,

pur che ver me un tratto gli occhi giri,

gli occhi che son duo stelle alle mie vele

e fanno dolci tutti e mie’ martiri.

Volgi quegli occhi a me benigni e ridi,

e poi contento son se ben m’uccidi.

Angelo Poliziano

Tu cride ca pecché me si’ crudele

Tu cride ca pecché me si’ crudele

e p’ ’e chiante ca faccio e p’ ’e suspire

i’ nun te voglio bene e ’un so’ fedele.

Ma si me guarde appena, e ’st’uocchie gire,

’st’uocchie ca so’ ddoie stelle pe ’sti vvele,

se fanno doce tutt’ ’e guaie cchiù nire.

Cu ’st’uocchie guardame amurosa e ride,

e i’ so’ cuntento pure si mm’accide.

Claudio Pennino

(da Na Guardata amurosa, 2006)

Confetti e difetti

CONFETTI & DIFETTI

Storie e aneddoti di vita coniugale

Il Conte Léon de Tinseau, fu un prolifico scrittore francese, vissuto a cavallo tra il XIX e XX secolo. Nobile di nascita, frequentò quelli che comunemente si dicono i salotti buoni di Parigi. Nei suoi romanzi, infatti, si respira quell’aria di mondanità che solo chi l’ha vissuta direttamente può raccontarla. Egli fu, come suol dirsi, un uomo di mondo.

Ma più che per i suoi scritti, o le sue opere letterarie, il Conte Léon de Tinseau è ricordato per una spiritosa e arguta massima che gli viene attribuita sulla vita coniugale: « il matrimonio è come una fortezza assediata: quelli che ne stan fuori vorrebbero entrare e quelli che stan dentro vorrebbero uscirne ».

Alessandro Polidoro Editore

'O mbrello

Ce canuscetteme

sott’ a nu mbrello

’O MBRELLO

di Roberto Bracco 

Venette a chiovere

e na figliola

ieva nfunnennese

p’ ’a strata, sola.

- « Pe nun ve nfonnere, » -

le dicett’ io -

« nenné, vulisseve

stu mbrello mio? »

- « Sì, ma purtatele

sempe vuie ’mmano;

si no, crediteme,

nun resta sano. »

Chillu delluvio

comm’era bello!...

Ce canuscetteme

sott’ a nu mbrello.

- « Nenné, diciteme

addò abitate. »

- « Sto ffora Napule

ve spaventate? »

- « Arrepusammece

a casa mia... »

- « Gniernò, truvammece...

na tratturia. »

E cammenavemo,

strinte, a bbraccetto...

Che cosa tennera!

Che cuscinetto!...

Chillu delluvio

comm’era bello!...

Ce canuscetteme

sott’ a nu mbrello.

Mentre parlaveme

cu nu trattore,

facette ’a spruceta,

cagnaie culore.

Ma chillu scrupolo

po’ le passaie

appena ’ntavola

nce se chiammaie.

E quanno, all’urdemo,

’o sole ascette,

dicenno: grazzie!

se ne fujette.

Pe stu pazzuoteco

sole schiattuso,

restaie guardanneme...

’o mbrello nfuso.

Suonno

cercanno ’a pace nfunno a stu bicchiere

SUONNO

di Nello De Lutio

Suonno ca m’ addurmive accussì doce

e nun m’ adduorme cchiù comme a na vota,

io pe’ t’ avé nu poco

e repusà pe’ n’ ora,

mo tengo sulamente

na mmedecina: ’e ggocce ’e nu veleno

ca m’ addòbbeca, è overo, e ca me stona

comme faceva sempe,

chella ca me vasava

ncopp’ a chist’uocchie nchiuse.

Oi suonno, io chianu chiano aumento ’a ddose...

Chi sa ch’ una ’e sti ssere

nun ’e cconto sti ggocce, sgarro ’a mano,
e trovo ’a pace nfunno a stu bicchiere!

Quanno 'e vvote 'o suonno trica

’E notte, quanno ’e vvote ’o suonno trica

e tuttecose attuorno se fa scuro

QUANNO ’E VVOTE ’O SUONNO TRICA

di Claudio Pennino

’E notte, quanno ’e vvote ’o suonno trica

e tuttecose attuorno se fa scuro,

nun saccio si è p’ ’a smania o p’ ’a fatica,

ma ’nnant’a ll’uocchie mme veco criaturo.

Me veco piccerillo ’e seie sette anne,

e veco ’a casa addó me so’ ccrisciuto.

Nu barcunciello sempe chino ’e panne,

ca ’o sole nun lassava nu minuto.

Doppo asciuttato maglie e cazuncielle,

sciuliava dinto, ’ncopp’a ogne riggiola,

addó ce veco ancora ’e surdatielle

’ncopp’ ’e muntagne fatte ’e libbre ’e scola.

Veco allummate ’e lluce d’ ’o lampiere

quann’è Natale e dint’ ’e mmeglie feste.

Càvere ancora, struffole e pastiere,

facevano appannà spiecchie e ffeneste.

Erano ’e tiempe ’e quanno na iurnata

vulava comm’ ’o viento, all’aria aperta.

Quanno magnave pane e cutugnata,

e te spassave arreto a na lacerta.

Penzanno a chell’età semplice e allera,

se stregne ’o core e vola ’a fantasia…

e sento ’nfaccia, scennere liggera,

na lacrema ch’è na malincunia.

E ’o suonno nn’ave pena, e vene doce.

E veco a mamma mia, giovane e bella,

ca mm’accarezza e canta sottavoce:

« ’O lupo s’ha magnato ’a pecurella…»

(da ’A strata d’ ’e stelle, 2001)

Na dummeneca passa

Chist’ arbere ’e Furia c’ ogne anno, ogne anno,

cchiù s’abboccano ’ncopp’ ’o marciappiere

NA DUMMENECA PASSA

di Rocco Galdieri

’Na dummeneca passa e ’n’ ata vene,

e tutte ’o stesso e tutte tale e quale!

’I’ quant’ accunte c’ ’o barbiere tene!

’I’ quanta folla ’int’ a dd’ ’o spezziale!

’E tramme chine... ’E ccarruzzelle chiene...

Passano ’a princepala e ’o princepale,

che vanno a’ messa e apparo apparo vanno.

Passa ’o culleggio... Duie carabiniere...

’Na serva cu’ ’na guardia duganale,

ca s’alliscia ’o mustaccio e ca passanno,

se mmira ’int’ ’a vetrina d’ ’o barbiere.

Gente che vene e va senza penziere,

sott’ all’arbere ’ncopp’ ’o marciappiere...

(E ’st’ arbere ’e Furia c’ogne anno, ogne anno,

cchiù s’ acalano ’ncopp’ ’o marciappiere,

ma cchiù verde e cchiù morbede se fanno...)

’E tramme chine... ’E ccarruzzelle chiene...

Cchiù giovene esce ’accunto d’ ’o barbiere...

Cchiù cresce ’a folla ’int’ a dd’ ’o spezziale!

E comme addora ’sta pasticciaria!

’Na dummeneca passa e ’n’ ata vene,

e tutte ’o stesso e tutte tale e quale

pe’ me... che guardo ll’arbere ’e Furia!

Chist’ arbere ’e Furia c’ ogne anno, ogne anno,

cchiù s’abboccano ’ncopp’ ’o marciappiere,

cchiù verde e malinconeche se fanno!

Ggelusia

e te turmiente e muore ’e ggelusia

GGELUSIA

di Vittorio Parisi

Tu ca saie buono quanno io parlo appena

e meglio ancora quanno me sto’ zitto,

tu ca t’adduone quanno stongo ’e vena

o puramente quanno stongo afflitto,

e me vuò bene e suoffre ’e chistu stato,

e te turmiente e muore ’e ggelusia,

nun ll’hê capito ca, si sto’ malato,

so’ malato ’e te sola, anema mia?

Gelosa? ’E chi? Pecché? Tu ’o ssaje, tesoro,

ca si’ tutto pe me... Qua’ gelusia?

Qua’ gelusia, si quanno me ne moro

i’ chiammo primmo a tte, po’ a mamma mia?

Matenata

Na scolla ncopp’ ’e spalle ’e seta fina

MATENATA

di Mario Sieyes

Pe me scetà matino, na matina,

cu Rosa me ncuntraie ncopp’ ’a Nfrascata:

Era ’e settembre, e ll’aria settembrina

faceva doce e fresca ’a matenata.

Na scolla ncopp’ ’e spalle ’e seta fina,

na vesta ’e percallina trafurata,

uocchie ’e velluto e vocca curallina,

bella e gentile comm’a na pupata.

« Bongiorno! » lle dicette. Rispunnette

quase acalanno ll’uocchie a stu saluto,

e rossa comm’ ’o ffuoco se facette...

Mo ca sapite ’o fatto comm’è gghiuto,

ve voglio sulo dì: benedicette

chella matina ch’ero ’e pressa asciuto!

Bongiorno, Ro'!...

dico: - Bongiorno, Ro’!...

BONGIORNO, RO’!...

di Salvatore Di Giacomo

Rosa, si chiove ancora

nun t’ammalincunì,

ca d’ ’o bontiempo ll’ora

sta prossema a venì.

Nun vide? ’E luce ’e sole

luceno ’e st’acqua ’e file;

è ’a morte d’ ’e vviole,

so’ ’e lacreme d’abbrile.

Ma mo cchiù ffresca e ffina

ll’aria se torna a fa’...

Meh!... A st’aria d’ ’a matina,

Rosa, te può affaccià.

Arape ’e llastre: arape

sta vocca piccirella

addó sulo ce cape

nu vaso o na resella,

canta: chist’ è ’o mumento;

tu cante e io, chiano chiano,

mme faccio ’a barba e sento,

cu nu rasulo mmano.

E penzo: « ’A i’ ccà; s’affaccia...

Mm’ ha visto... Mme saluta... ».

E c’ ’o sapone nfaccia

dico: - Bongiorno, Ro’!...

'A mesura d' 'e ccose

nun se po’ mmesurà ll’ammore ’e mamma

’A MESURA D’ ’E CCOSE

di Claudio Pennino

                                             Il vero amore non ha

                                         mai conosciuto misura.
                                                                   Properzio

Tutto, a ’stu munno, se po’ mmesurà:

na cosa piccerella piccerella,

ca nun ce abbasta ’a lente p’ ’a guardà,

o puro grossa assaie, quant’a na stella.

Se po’ piglià ’a mmesura a ogne cosa,

e tutt’ ’e ccose, doppo, so’ cchiù chiare.

Se ponno cuntà ’e spine a ogne rosa,

o quanta gocce d’acqua tene ’o mare.

’O pizzo ’e na muntagna o nu sprefunno,

na pena nchiusa ’int’a na lacremella.

Pe fino ’o sole, accussì largo e ttunno,

s’è fatto ammesurà c’ ’a valanzella.

E, ogne cosa, doppo mmesurata,

pare cchiù grossa si era piccerella;

e chella grossa pare cchiù aggrazziata,

cu tutto ch’era storta e bruttulella.

Na cosa sola nun tene mmesura,

e nun ce stà ’o strumento, né ’o prugramma,

ma ’e tuttequante è chella cchiù sicura:

nun se po’ mmesurà ll’ammore ’e mamma.

(da ’A pianta d’ ’a felicità 2004)