Teatro Cortese

ca ’o scamazzaie senz’avé pietà!

NU  SCARRAFONE

di Claudio Pennino

Nu scarrafone dint’ a nu pertuso,

se lamentava triste e scunzulato,

ca nu penziero, dint’ ’o core nchiuso,

nun ’o faceva ’a notte arrepusà.

« Pecchè – diceva – mmiezo a ttante e ttante,

so’ nnato iusto scarrafone e nniro?

Putevo avé culure cchiù sgargiante

e comme a na farfalla svulazzà?…

Ma si’ chist’ è ’o destino, benaccetto,

vo’ dì  ca i’ vaco quant’ a n’elefante.

Nisciuno nasce senza nu pruggetto,

e chi po’ dì  addó stà ’a felicità…»

Caccianno allora ’antenne, ’o scarrafone,

dicette, ascenno a ll’aria: « ’A vita è bella! »

Ma se truvaie passanno nu guaglione,

ca ’o scamazzaie senz’avé pietà!

(da Vela ’e penziere, 1999)

Tutto se cagna

 

e d’ ’e ttempeste ne fa ventarielle

TUTTO SE CAGNA

di Claudio Pennino

 

 

 

A cchistu munno tuttecose cagna:

ll’uommene, ’e bbestie, ll’arbere, ll’aucielle,

’o tiempo te sgarrupa na muntagna,

e d’ ’e ttempeste ne fa ventarielle.

Niente resta comm’ è, niente fernesce:

nu sciore secca e n’ato già ne cresce.

More nu viecchio ’int’ a nu vascio ô scuro,

e â casa appriesso nasce nu criaturo.

 

 

(da Villanelle, 2016)

 

 

Me mbroglia ’e ccarte quanno so’ apparate

DESTINO

di Claudio Pennino

 

Vurria sapé pecché chistu destino

me dà surtanto e sempe mpedimento.

Mm’attacca ’e passe pure si cammino,

e me cuntrasta quase ogne mumento.

Me mbroglia ’e ccarte quanno so’ apparate,

e ghioca mazze quanno i’ cerco spate.

E pógne comme pógneno ’e tafane,

e nun ’o pozzo avé dint’ a ’sti mmane!

(da Villanelle, 2016)

Na vesta ianca

na nuvola parive, leggia e franca

NA VESTA IANCA

di Claudio Pennino

 

 

T’hê presentata cu na vesta ianca,

e ll’uocchie nire e fute d’ ’a Mbriana;

na nuvola parive, leggia e franca,

cu ’sta faccella fina ’e purcellana.

M’hê fatto na fattura attuorno ô core,

e mo, pe te vedé, i’ conto ll’ore;

Bellambriana, tu m’hê affatturato,

e certo è stato quanno m’hê vasato.

 

(da Villanelle, 2016)

 

 

'A turturella

Fuieno ncopp’ a ll’arbere, p’ ’e ffronne…

 

 

 

 

 

’A TURTURELLA

 

di Claudio Pennino

 

 

 

Volano dduie aucielle ncopp’ ’e titte,

vanno p’ ’o cielo e fanno l’ancarella;

mo ncopp’ ’o mare e mo p’ ’e viche astritte,

so’ nu palummo cu na turturella.

 

Fuieno ncopp’ a ll’arbere, p’ ’e ffronne…

isso ’a secuta, ’a chiamma... essa risponne;

e pe tramente canta: « Ammore, ammore... »

’a coglie ’int’ a na scella ’o cacciatore.

 

 

(da Villanelle, 2016)

 

 

 



 

ll'Infinito

 

 

Quest’anno ricorre il bicentenario dalla stesura de L’Infinito di Giacomo Leopardi, il meraviglioso Idillio che, con i suoi “interminati spazi e sovrumani silenzi”, continua a emozionarci e a proporre nel nostro sentire filosofiche suggestioni.

Per rendere omaggio al sommo poeta di Recanati, ho voluto gettare anch’io lo sguardo “al di là della siepe” traducendo, in napoletano, i 15 versi in endecasillabi sciolti che ci aprono la porta verso un mondo visibile e infinito.

 

 



LL’INFINITO

                                    da G. Leopardi

 

Comme me piace chesta muntagnella,

e chesta sèpe, ca na bbona parte

’e ll’urdemo urizzonte m’annasconne.

Ma assettato e guardanno, io m’affiguro,

areto a chella, spazie senza fine,

e silenzie scanusciute, e na pace

scunfinata, addó, poco ce manca,

’stu core mio se perde. E quanno sento

’o viento murmulià p’ ’e ppiante, io chillu

silenzio scunfinato e chesta voce

vaco cunfruntanno: e me vene a mente

ll’eternità, e ’o tiempo ch’è passato,

e ’a voce d’ ’o ppresente. Accussì dint’a

’st’immenzità s’affoca ’stu penziero:

e, sprufunnà, m’è ddoce ’int’ a ’stu mare.

© Claudio Pennino 2019

M'ha fatto venì a mente

M’HA FATTO VENÌ A MENTE

di Claudio Pennino

 

 

 ’Sta rosa accussì bella e prufumata

ca m’arricorda ’a primma giuventù,

s’è quase tuttaquanta già seccata:

’sta bella rosa nun addora cchiù.

 

’Sta rosa ca se sfronna ’int’ a ’sta testa,

m’ha fatto venì a mente a na fenesta…

a ’o primm’ ammore ca nun more maie…

a na figliola ca nun s’affacciaie.

 

(da Villanelle, 2016)



 

Ce sta na stella chiara a matutino

STELLA DIANA

di Claudio Pennino

 

 

                     Così spegne costei tutte le belle,

                  come ’l lume del sol tutte le stelle.

                                                    A. Poliziano

 

 

Ce sta na stella chiara a matutino,

ca ’e tutt’ ’e stelle è chella cchiù lucente.

’E ragge so’ d’argiento e d’oro fino,

ca pareno, chell’ate, trasparente.

Tu accussì stute tuttequante ’e bbelle,

comm’ ’a luce d’ ’o sole tutt’ ’e stelle.

Ianche so’ ’e ccarne comm’ ’a purcellana,

e cchiù splennente si’ d’ ’a stella Diana.

(da ’A pianta d’ ’a felicità, 2004)

'A mariola

ve veco dint’ ’e suonne appresentà

’A MARIOLA

di Claudio Pennino

V’ îte arrubbato ’a pietto ’o core mio,

e so’ vvenuto pe mm’ ’o fà turnà.

Si nzerro ll’uocchie, quanno è ccerto Ddio,

ve veco dint’ ’e suonne appresentà.

Me metto ’a mana mpietto e nun ’o sento:

turnatammillo sulo nu mumento.

E si pe na pazzia ll’ îte annascosto,

v’ ’o ccerco pe piatà, dateme ’o vuosto.

(da Villanelle, 2016)



'O libbro d' 'e ffate



te nzerraie dint’ ’o libbro d’ ’e ffate

’O LIBBRO D’ ’E FFATE

di Claudio Pennino

                                                 Ad Arianna

Te n’asciste d’ ’o libbro d’ ’e ffate,

chella vota ca nun ’o nzerraie;

era ’o cunto d’ ’e iuorne ncantate,

ca pe te nun passavano maie.
 

Ce mettiste a ’sta paggina ’o punto,

e arapiste doie scelle d’auciello.

Accussì te n’asciste d’ ’o cunto,

e vulanno lasciaste ’o castiello.
 

Arrivata a na bella funtana,

t’accustaste c’ ’a sete era assaie;

quanno ’o musso nfunniste c’ ’a mana,

’a surgiva ’int’a niente seccaie.
 

N’uorco steva annascuso ’int’ ’e ppiante,

e pareva ’o patrone d’ ’o munno.

Po’ ncuntraste na streca cchiù nnante,

ca ’e crestiane mannava a zeffunno.
 

Che dulore a 'stu core cuntento.

Tu ca ’o munno ’o sunnave affatato

t’accurgiste, dint’a nu mumento,

ch’era favuzo e ncuorpo malato.
 

E vedenno ’sta malaparata,

disperata, ’a ’sti nfame fuiste,

e, perduta ’int’ ’o bbosco, e appaurata,

’int’a connola, nzuonno, cadiste.
 

Te purtaie dint’ ’e bbracce astrignuta,

n’ata vota ’int’ ’e cunte ncantate,

e, vedennote ancora addurmuta,

te nzerraie dint’ ’o libbro d’ ’e ffate.

 

 

(da ’A pianta d’ ’a felicità, 2004)


 

'E vase



ca saie vasà se legge mpont’ ô musso!

’E VASE

di Claudio Pennino





Tiene ’a faccella cu ddoie schiocche rosa,
e na vucchella quanta a na cerasa,
ma quanno vasa è accussì fucosa,
c’ogne vasillo abbrucia cchiù ’e na vrasa.

E teneno ’o prufumo d’ ’e vviole,
e tegneno comm’ ’o mellone russo…
Che t’aggia dì, nn’abbastano ’e pparole:
ca saie vasà se legge mpont’ ô musso!




(da Villanelle, 2016)

 

 

 

 

I’ songo comm’a nu palazzo ’e case

 

 

 

 

 

’O PALAZZO ’E CASE

 

di Claudio Pennino

 

 

I’ songo comm’a nu palazzo ’e case,

e tu si’ chella ca sta ’e casa ’a dinto.

Te sento spisso ’e vvote, quanno trase,

si vaie ô primmo piano oppure ô quinto.

 

Te sento ’e cammenà pe sott’ ’a pella,

pe dint’ ’e vvene, correre a tutt’ore.

E sulo stanca morta, e ancora bella,

viene, pe t’addurmì, dint’a ’stu core.

 

 

(da Vela ’e penziere, 1999)

 

 



Nu fazzuletto 'e seta

Aiere mmiez’ ’a strata îte perduto

nu fazzuletto ’e seta arricamato

 

 

 

 

 

NU FAZZULETTO ’E SETA

 

di Claudio Pennino

 

 

Aiere mmiez’ ’a strata îte perduto

nu fazzuletto ’e seta arricamato;

distratta, chi sa comme, v’è caduto

e, accortamente, i’ me ll’aggio arrubbato.

 

Tene ’stu fazzuletto ’e seta fina,

tutt’ ’e prufume ’e cuollo a na riggina;

cchiù ccerto ’e che, e mo nun me credite,

quanno ll’addoro vuie m’accumparite.

 

 

 

(da Villanelle, 2016)

 



 

 



'A stanza affianco

accucciuliate nterra

’A STANZA AFFIANCO

 

di Caludio Pennino

 

 

 

’E miedeche hanno ditto:

«  Nun ce stanno speranze! »

Ma chella stregne ’e diente e campa n’atu iuorno.

Tene tre piccerille,

e ’o ssape ’o Pataterno comme se fa p’ ’e ccrescere.

Ma ’e miedeche hanno ditto:

« Speranze nun ne tène! »

Intanto, ’a stanza affianco,

uno s’è avvelenato:

nun le diceva niente ’a vita ca campava.

Comm’a na scarpa vecchia,

nu mbrello cu nu buco,

na cràstula, na pezza…

piglia sta vita soia e ’a votta ’int’ ’a munnezza!

Ma, ringrazianno ’o Cielo,

l’hanno pigliato ntiempo.

E, propio stammatina,

chillo ca nun sapeva che se ne fà d’ ’a vita,

se n’è turnato a’ casa,

ma tutto dispiaciuto

pecché campava ancora!

…Propio stammatina,

ca for’ ’a stanza affianco,

accucciuliate nterra,

comme a tre cacciuttielle,

chiagneno ’e piccerille!

(da Vela ’e penziere, 1999)

 



Sfronna accussì na rosa aggrazzïata

’A BELLEZZA PASSA

di Claudio Pennino

 

Giacché a ’stu munno tuttecose passa,

pure ’a bellezza toia passa e svanisce;

e quanno hê perzo ’o capo d’ ’a matassa,

pure ’o ricordo t’ammalincunisce.

Sfronna accussì na rosa aggrazzïata,

comm’ ’a bbellezza toia ch’è arrobbacore:

ogge tutta frischezza e prufumata,

e già dimane s’appassisce e more.

 

 

(da Villanelle, 2016)