Mobbele antiquato

 

mo, comm’ a ccierti mobbele antiquate

MOBBELE ANTIQUATO

di Claudio Pennino
 
 
 
E finalmente, ’o vvi’, c’îmmo lassate:
’st’ammore, ca faceva mmiria ê sante,
mo, comm’ a ccierti mobbele antiquate,
nun va cchiù ’e moda, s’è ffatto ingombrante.

P’ ’o sestimà facive ’o pare e sparo,
e ogni vvota m’ ’o cagnave ’e posto:
sempe cchiù areto, sempe cchiù nascosto…
finché nun ce l’hê dato ô sapunaro.
 
 
 
© Claudio Pennino 2023