'E rimpetto

Tu… screvive!… E tremmanno, io liggette

’E RIMPETTO

di Salvatore Di Giacomo

L’ato iuorno c’ ’o sciato facette

d’ ’a fenesta na lastra appannà;

e c’ ’a ponta d’ ’o dito screvette:

«Ah, che bene ve voglio, ’onn’ Amà!»

Doppo scritto, ’onn’ Amà, v’assicuro,

mme sentette ’int’ ’e gamme chïà,

e appuiato restaie nfaccia ’o muro,

senza manco curaggio ’e parlà…

Quanno maie mm’era tanto azzardato?

Quanno maie mm’era ardito accussì?

Si cu vuie nu scurnuso c’ è stato,

mo nce vo’, stu scurnuso songo i’.

Tutto nzieme nu zumpo facette…

Me parette, v’ ’o giuro, ’e murì!…

Tu… screvive!… E tremmanno, io liggette

ncopp’ ’a lastra: «E pur’ io, donn’ Errì!…»