Primma matina

Sonano attuorno tutte ’e cchiesie a ccoro...

PRIMMA MATINA

di Salvatore Ragosta

E vveco lentamente sparì ’e stelle

sott’a nu manto pallido ’e viole...

’A coppa ê llogge, a cchiorme, ’e rrundinelle

aspettano, cantanno, ’o primmo sole.

Già dint’ ô vico cierti ffenestelle

se songo aperte e vveco ddoje ffigliole

che spanneno, ’e rimpetto, fresche e bbelle,

all’aria d’ ’a matina, ddoje llenzole...

’O cielo è cchiù celeste. Dduje, tre galle

fanno cuccurucu !...Passa ’o capraro

c’ ’o cane appriesso e ’a mazza ncopp’ ê spalle.

Sonano attuorno tutte ’e cchiesie a ccoro...

Cinquanta voce chiammano ’o vaccaro…

e sponta ’o sole ’int’ a na gloria d’oro...