Si t'avesse ncuntrato

quann’ancora cantavano ’e ssirene

SI T’AVESSE NCUNTRATO

di Claudio Pennino

Si t’avesse ncuntrato

quann’ancora cantavano ’e ssirene,

i’ mo fosse ncantato,

e ncatenato a tte senza catene.

Nun me fosse perduto

currenno appriesso ’e vierze d’ ’e ccecale,

ma t’êss’annascunnuto

comm’ ’a furmica astipa ’a preta ’e sale.

Si t’avesse cercato

comm’ ’e Re Magge scise a ll’Urïente,

réfula d’ ’o Criato,

tu mo fusse pe mme “ rosa d’ ’e viente ”.

(da Acqua salata, 2019)