mentre, p’ ’o cielo, volano ll’aucielle…

LL’AUCIELLE

di Claudio Pennino

’E vvote tengo mente a ll’aucielle

ca volano p’ ’o cielo lentamente,

e pareno, strillanno, guagliuncielle

ca iesceno d’ ’a scola alleramente.

’E vveco ’e ricamà mille ricame,

ntrecciannose e allariannose mparanza.

’E vveco ’e zumpettià pe copp’ ’e rame,

e po’ sparì, a chiorme, nluntananza.

Me ncantano ’sti parpete liggiere

ca, libbere, pe ll’aria se ne vanno;

me metteno ’int’ ’o core nu piacere,

lloro ca ’o iuorno ’o passano cantanno.

E tanto mm’appassiono cierti vvote,

ca piglio i’ pure ’o volo appriesso a lloro;

e veco pizze ’e munno, ’e cchiù remote,

e veco cchiù splennente ’o sole d’oro.

Ma comme arapo ll’uocchie i’ cado nterra,

mentre, p’ ’o cielo, volano ll’aucielle…

e allucco pe ’sta pena ca mm’afferra:

«Pover’a me, pecché nun tengo ’e scelle? »

(da ’A pianta d’ ’a felicità, 2004)

Cuietutene

’A museca d’ ’a luce e d’ ’e culure

CUIETUTENE

di Claudio Pennino

Il silenzio è il riposo dell’anima.

                                                                                                Bacone

Cchiù passa ’o tiempo e cchiù vaco apprezzanno

na vita arrepusata e silenziosa;

luntano d’ammuina, senza affanno,

addó ogne cosa è utele e prezziosa.

Dint’a ’sta pace pure ’e ccose mute

parlano ’a voce doce d’ ’a natura;

e cchiù ’e silenzie so’ nfinite e fute,

cchiù ’e ccose hanno nu senzo e na mesura.

Mo cuntemplanno ’a rosa e mo na preta,

se spìcceca ’a matassa d’ ’e penziere;

ll’anema, suddisfatta, s’acquieta

perdennose ’int’ ’e ggioie ’e ’stu piacere.

E allora sento ’a requia d’ ’e mmuntagne,

na lacrema ’e rusata ncopp’ ’e sciure...

e, tuorno tuorno, sento p’ ’e ccampagne,

’a museca d’ ’a luce e d’ ’e culure.

Sento ’e tremmà na foglia ncopp’ ’a pianta,

e, nfaccia, sento ’o sole cchiù arzulento;

nu passaro ca mmiez’ ê ffrasche canta,

e tutta ll’armunia d’ ’o firmamento.

E mbraccio a ’sti miracule divine

cchiù assaie ll’anema mia trova arrecrio,

ca dint’a ’stu silenzio senza fine

sempe cchiù forte i’ sento ’a voce ’e Ddio.

(da Primma ca scura notte, 2009)

'E notte

Tutt’è silenzio… ncielo quanta stelle!

’E NOTTE

di Eduardo De Filippo

Tutt’è silenzio dint’a sta nuttata

nun se sente nu passo ’e cammenà.

Nu ventariello tutta na serata

pare ca me vuleva accarezzà…

E finalmente chiagno! Tu nun vide,

tu staje luntano, comme ’o puo’ vedè?

Però t’ ’o ddico pecché tu me cride

e si me cride, chiagne nzieme a me!

Scenne stu chianto lento, doce doce,

nun aizo na mano p’ ’asciuttà.

Io strillo pe’ te fa’ sentì sta voce

ma tu nun puo’ sentì… c’allucco a ffa’?

Tutt’è silenzio… ncielo quanta stelle!

Affaccete, tu pure ’e ppuo’ vedè:

songo a migliare, e saie pecché so’ belle?

Pecché stanno luntano, comm’ a tte!

nu paisiello tutto vïarelle

’E MMULLECHELLE ’E PANE

di Claudio Pennino

Vulesse fà cu ’e mmullechelle ’e pane,

nu paisiello tutto vïarelle;

na funtanella… ’a cchiesa cu ’e ccampane,

e, tuorno tuorno, case e casarelle.

Na piazza tonna, chiena ’e ggente bella,

addó na chiorma allera ’e piccerille,

pazziasse mmiez’ ’a folla a ll’ancarella,

rignenno ll’aria ’e resatelle e strille.

Nfacci’a nu palazziello, ’a chesta mana,

po’ ce facesse quacche purtusella;

fore, ’a caiola appesa a na perziana,

e tu affacciata a chesta fenestella.

C’ ’a mana i’ te facesse nu saluto;

tu rispunnisse cu nu pizzo a rriso.

Quanno ’o paese, po’, fosse fernuto,

paresse, ’int’a nu suonno, ’o Paraviso.

Ca ’e suonne chiste so’: mulliche ’e pane;

e ognuno ’e mpasta comme cchiù lle piace.

Songo ’a speranza p’affruntà ’o dimane,

e danno ô core ’o ppucurillo ’e pace.

Mpastanno, po’, ll’urdema casarella,

penzasse: « Chi ’o pputeva ’mmagginà,

c’annascunnuta ’int’a na mullechella,

truvavo a tte, nzieme ’a felicità ».

(da ’A pianta d’ ’a felicità, 2004)

Na guardata amurosa e na resella

NA GUARDATA AMUROSA E NA RESELLA

di Claudio Pennino

 

 

 

Uno amoroso sguardo, un dolce riso

Uno amoroso sguardo, un dolce riso

mi fanno un tempo star lieto e contento;

ma, se talora disdegnosa in viso

vi veggio, resta il cor tristo e scontento.

Così or sono in vita e ora ucciso

sì come veggio in voi far mutamento;

e ’n questi duo contrarii è dubbio il core

qual maggior sia, o ’l piacere o ’l dolore.

Angelo Poliziano

Na guardata amurosa e na resella

Na guardata amurosa e na resella

me fanno sta viato e cchiù cuntento;

ma si sdignosa veco ’sta faccella,

’stu core mio se fa triste e scuntento.

E mo so’ vivo e mo m’ ’a veco ’e bella

cunfromme vuie cagnate ’o sentimento;

e dint’ê dduie cuntrarie ’un sape ’o core

si cresce cchiù ’o piacere o cchiù ’o dulore

Claudio Pennino

(da Na guardata amurosa, 2006)

'E ccarezze

’E ccarezze so’ ’e vase d’ ’e mmane

’E CCAREZZE

di Claudio Pennino

’E ccarezze so’ ’e vase d’ ’e mmane,

sentimento ca nun tene voce,

ncopp’ ’o mare, pe puorte luntane,

so’ varchette ca sciuliano doce.

So’ ’o suspiro cuieto ’e ll’ammore,

so’ lliggere ca pareno séte…

’E ccarezze nun fanno rummore

quanno sfiorano ’o core cu ’e ddete.

Comm’a scelle aggrazziate d’aucielle,

cunnuliate ogne ttanto d’ ’o viento,

sott’ ’e mmane d’ ’e cchiù vicchiarielle,

’a carezza è nu triémmolo ’argiento.

Azzeccose ca pareno ’e mèle,

so’ ’e ccarezze pe dduie ’nnammurate;

nun ce stanno, che ssa’, lamentele,

quanno stanno ’int’ ’o scuro abbracciate.

Danno pace ô marito ggeluso

quanno mpietto lle brucia na fiamma;

accuietano ’o ninno picciuso

ca, chiagnenno, ’int’ ’o suonno vo’ ’a mamma.

Tutto sànano, comm’acquasanta.

So’ ’o sullievo pe chi nn’arreposa…

songo ’e frutte zucuse d’ ’a pianta,

cchiù ggentile d’ ’e ffronne ’e na rosa.

A’ carezza lle manca ’a parola,

è senzosa comm’a na cerasa,

pallummella ca tennera vola:

’a carezza è na mano che vasa.

(da ’A strata d’ ’e stelle 2001)