Dummeneca

So’ brasciole, so’ sfilatore ’annecchia.

DUMMENECA

di Rocco Galdieri

I’ mò, trasenno ’a porta, aggiu sentuto

ll’addore d’ ’o rraù.

Perciò... Stateve bona ! ... Ve saluto...

Me ne vaco, gnorsì... Ca si m’assetto

nun me ne vaco cchiù...

E succede c’ aspetto

ca ve mettite a ttavula... E ’nu sta...

Cchiù ccerto ’e che, so’ mmaccarune ’e zita.

L’aggiu ’ntiso ’e spezzà,

trasenno ’a porta. E overo? E s’è capita

tutt’ ’a cucina d’ogge: So’ brasciole,

so’ sfilatore ’annecchia.

Niente cunzerva: tutte pummarole

passate pe’ ssetaccio...

E v’è rimasta pure ’na pellecchia

’ncopp’ ’o vraccio...

Pare ’na macchia ’e sango...

                                   Permettete?

 V’ ’a levo! Comm’è fina

’sta pella vosta... e comme è avvellutata:

mme sciulia sotto ’e ddete...

E parite cchiù bella, stammatina.

’O ffuoco, comme fosse... v’ ha appezzata.

State cchiù culurita...

Cchiù ccerto ’e che, so’ mmaccarune ’e zita...

Ma i’ mme ne vaco... Addio! Ca si m’ assetto

nun me ne vaco cchiù...

E succede c’aspetto...

ca ve mettite a ttavula... p’ avé

’nu vaso c’ ’o sapore ’e ’stu rraù!

'O sapore d' 'e llacreme

ma na lacrema te dice chello ca nisciuno sente…

 ’O SAPORE D’ ’E LLACREME

di Claudio Pennino

Ogne lacrema chiagnuta

lascia mmocca nu sapore.

Comm’ ’a foglia che ngiallisce,

cade senza fà rummore.

Tutt’ ’o bbene e tutt’ ’o mmale

sanno dì dduie uocchie nfuse,

pecché stanno ’e sentimente

dint’ ’e llacreme annascuse.

Chi ’e guarda, niente vede,

pure si so’ trasparente,

ma na lacrema te dice

chello ca nisciuno sente…

So’ na smania, na buscìa…

Songo ’e palpite d’ ’o core.

So’ na freva… na passiona,

ch’ ’int’a ll’uocchie nasce e more.

’E cchiù amare ’e tuttuquante,

chelli llà d’ ’e ’nnammurate,

ca se lassano pe sempe

doppo ca se so’ vasate.

E, salate comm’ ’o mare,

songo ’e llacreme busciarde.

Chi s’ ’e cchiagne acala ll’uocchie

pe paura ca c’ ’e guarde.

Tennerelle e prufumate

songo ’e llacreme ’e criature:

sanno ’e zuccaro e cannella

e s’appicciano ’e culure.

Ma ’e llacreme cchiù ddoce,

rose e ghianche cchiù d’ ’o ggiglio,

songo ’e llacreme d’ ’a mamma,

quanno ’e cchiagne pe’ nu figlio.

(da Vela ’e penziere, 1999)

'O mierolo

Comme canta stu mierolo in amore!

’O MIEROLO

di Nello De Lutio

Comme canta stu mierolo in amore!

nun se fida ’aspettà ca schiara juorno

e già ’o siente siscà,

mmiezo a sti ffronne...

Forse, nun po’ durmì:

forse, tutta ’a nuttata,

comme a me, ll’ha passata sbarianno.

Ma na cumpagna ’o sente ’a miez ’e ffronne

e ’a luntano risponne

e vola e ’o va vicino.

’Nzieme ’e vveco vulà

pe’ stu cielo turchino...

Sul’ io, fore a sta loggia,

canto senza furtuna:

e ’o viento ’e maggio sperde sti parole,

comme sfronna sti rrose a una a una.

i’ vaco annante e chella vene arrèto

LL’OMBRA MIA

 di Claudio Pennino

                            Io non ero per gli altri quel che finora,

                                      dentro di me, m’ero figurato d’essere.

                                                                                        L. Pirandello

Cammino e guardo ll’ombra mia pe tterra.

I’ ca me sento ancora nu guaglione,

guardanno ’a “siluetta” meza â sgherra,

me pare ’e vedé ll’ombra ’e nu scignone.

Faccio na corza e po’ me fermo ’e bbotto:

voglio essere sicuro ca song’io.

Na macchia nera, a forma ’e panzarotto,

me corre appriesso, quant’è certo Ddio.

P’arraggia scasso ’a luce ’e nu lampione

ca me fa ll’ombra scufanata e chiatta.

Ma ô scuro è peggio: pare nu scurpione,

tanto ca s’appaura pure ’a iatta.

Comm’a dduie nnammurate dispettuse,

i’ vaco annante e chella vene arrèto.

Scanzo mparanza ’e vicule annascuse:

no pe quaccòsa, ma… stongo scuieto.

Nun ce accapezzo cchiù. So’ frasturnato.

Ll’ombra ca m’accumpagna nfaccia ô muro,

è ll’ombra mia opuro è ll’ombra ’e n’ato?

E songo viecchio, ggiovane o criaturo?

So’ sicco e luongo comm’a nu scupillo,

o chiatto e gruosso quant’a nu gigante?

Chi songo overamente: chisto o chillo?

Songo uno sulo o songo a tuttequante?

’A quanno soffro ’e chesta malatia,

me songo nzallanuto e scuntraffatto;

sarrà ca ’a verità è na buscia,

ma i’ nun ’o ssaccio cchiù comme so’ fatto.

(da ’A pianta d’ ’a felicità 2004)

La luce

La potrisse chiammà ll’uocchio de Dio

LA LUCE

di Giulio Genoino

Mo che la notte è dde quattuordece ore

Lo lietto mm’addeventà no taluorno,

Priesto arapo le pporte e guardo attuorno

E non vedo Proceta, che orrore!...

Ma zitto zì, ca sento no rommore

Comme fosse n’amico de retuorno,

È ll’Arba che se sceta nnante juorno

E mme fa mpietto allarejà lo core.

Lo Sole appriesso appedecà se vede,

E ssalutato lo barcone mio,

Mmiezo a ttutte le bïe stenne lo pede.

La luce è bella, e ssazia ogne golio,

E senza pregiudizio de la fede

La potrisse chiammà ll’uocchio de Dio.

S’i’ vaco, o resto, o comme va ca sia

sempe te penzo, aggrazïato ammore

S'I' VACO, O RESTO, O COMME VA CA SIA

di Claudio Pennino

S’i’ vo, s’i’ sto, o in qual modo mi sia

S’i’ vo, s’i’ sto, o in qual modo mi sia,

sempre mai penso a te, gentil signore,

e hotti sempre nella fantasia

che me’ non ne farebbe un dipintore,

e parmi parlar teco tuttavia

e raccontarti in parte il mio dolore,

dicendoti: « I’ sto mal, come tu vedi,

e tu non te ne curi e non me ’l credi ».

Angelo Poliziano

S’i’ vaco, o resto, o comme va ca sia

S’i’ vaco, o resto, o comme va ca sia,

sempe te penzo, aggrazïato ammore,

te veco sempe dint’ ’a fantasia

ca nun farria cchiù accuoncio nu pittore,

e cu te parlo e sfrenneséo p’ ’a via,

cuntannote nu poco ’stu dulore,

e dico: « I’ sto malato, certo ’o vvide,

e tu nun te ne cure e nun me cride ».

Claudio Pennino

(da Na guardata amurosa, 2006)

Filosofia

ca cchiù nun torna chello ch’è passato!

FILOSOFIA

di Mario Sieyès

Si ’a vita è cchesta, amice, cunvenimmene

c’ ’o tiempo passa e ognuno se fa viecchio.

Niente malincunie, ch’è bene inutile,

levammo ’a miezo ’o calannario e ’o specchio.

C’ ’o cchiù ll’avimmo fatto, nun so’ chiacchiere,

chello ca vene se po’ di’ è truvato...

Ringraziammo a Ddio, capacitammece

ca cchiù nun torna chello ch’è passato!

Cercammo scusa a chi male facettemo,

aizammo ’a mano a chi ce fece tuorto.

’A ggente, si campammo rispettannela,

pur’essa ce rispetta doppo muorto...

E si ’e peccate è overo ca se scontano,

o songo poche o songo nu zuffunno,

quann’è ’o mumento, amice, cunfessammele,

e ghiammo cchiù liggiere a ll’atu munno!