'O mierolo

Comme canta stu mierolo in amore!

’O MIEROLO

di Nello De Lutio

Comme canta stu mierolo in amore!

nun se fida ’aspettà ca schiara juorno

e già ’o siente siscà,

mmiezo a sti ffronne...

Forse, nun po’ durmì:

forse, tutta ’a nuttata,

comme a me, ll’ha passata sbarianno.

Ma na cumpagna ’o sente ’a miez ’e ffronne

e ’a luntano risponne

e vola e ’o va vicino.

’Nzieme ’e vveco vulà

pe’ stu cielo turchino...

Sul’ io, fore a sta loggia,

canto senza furtuna:

e ’o viento ’e maggio sperde sti parole,

comme sfronna sti rrose a una a una.