'O cunto 'e ll'ove

« cò-cò-cò »... sbattono ’e scelle

e lle fanno dudece ove.

’O CUNTO ’E LL’OVE

di Ettore De Mura





Tutt’ ’e pulle d’ ’o « cumpare »
songhe dudece e no chiù.
Ma Rusina ’e ttene care
e ce parla a tu pe tu.

’E ccapisce, ’e chiamma a nomme,
’e gguverna, e ogne gallina
— nun ’o ssape manco comme —
lle fa n’uovo ogne matina.

Tutte quante ’e ggallenelle,
ogne ghiuorno verso ’e nnove,
« cò-cò-cò »... sbattono ’e scelle
e lle fanno dudece ove.

Ne venne ùnnece annascuso
d’ ’o marito, e, puntualmente,
quanno è ’a sera ha miso ll’uso
d’ ’o dà n’uovo sulamente...

— Ne fanno uno !... — Isso s’ ’o ccrere,
capuzzea e, muollo muollo,
dice: — N’uovo tutt’ ’e ssere...
A sti bestie ’e ttiro ’o cuollo!

— Nonzignore ! — fa ’a mugliera
Aspettammo !... — E sta cafona
tene sempe ’a bbona cera,
e lle vene sempe bona.

Tene sott’a na riggiola
tutt’ ’e llire ch’ ’abbuscate.
Quanno ’e gguarda se cunzola:
sti galline so’ affatate !

*  *  *

Na matina ca p’ ’o ggrano
nun ce steva ’a fatica,
’o « cumpare » chianu chiano
torna ’a casa e resta llà.

— Stu pullaro costa caro... —
suspiranno ha riflettuto.
Ma guardanno ’o gallenaro
resta comma n’alleccuto...

— E che so’ sti dudece ove ?
Veco buono ?... È overo o no ?
Cheste songhe cose nove...
Comme va stu fatto, oj Ro’ ? —

E Rusina, ’ntartaglianno :
— Chelle spisso t’hanno ntiso...
Ogne pullo va scanzanno
certamente ’e muri acciso,

e accussì... se so’ sfurzate...
hanno miso ’a vuluntà,
e ’int’ a niente hanno mpastate
dudece ove... stanno ccà !—

’O cafone ch’ è suttile
e capisce comm’ è ghiuto,
piglia ’nmano nu fucile
e lle dice risoluto:

— Ah! Sicché tutto s’ottiene
cu ’e mminacce e niente cchiù ?
Siente, Ro’, io te voglio bene,
ma he’ ’a fà ll’uovo pure tu!

Ogne ghiuorno! E si na sera
quanno torno nun m’ ’o daie,
ah, mugliera mia mugliera,
t’assicuro ca so’ guaie!

*  *  *

Rosa, mo, s’ è appaurata...
tremma pure si sta sola...
n’uovo accatta ogne ghiurnata
cu ’e denare d’ ’a riggiola.

E accussì tutt’ ’e mmatine
piglia ll’ove e nun ’e mmove.
Tene dudece galline
ca lle fanno tridece ove!

Quann'io te penzo

e comm’a dduie palumme,

se portano ’a mmasciata

QUANN’ IO TE PENZO

di Claudio Pennino






Quann’ io te penzo, ’a sera,
tu pure, propio tanno,
dint’ ’o stesso mumento,
certo me staie penzanno.

E stu penziero mio, 
pe tte se parte e vola,
e ’o tuoio fa tale e quale
doppo na capriola.

Ma tutt’ ’e dduie, vulanno,
se ncontrano p’ ’a strata,
e comm’a dduie palumme,
se portano ’a mmasciata.

E mentre nuie restammo
scetate a ll’aspettà...
lloro vòlano ncielo
pazzianno a s’acchiappà.




(da ’A strata d’ ’e stelle, 2001)

Nuttata 'e luglio

na luna tonna: nu chirchio
smaltato senza na macula

NUTTATA ’E LUGLIO

di Eduardo Nicolardi

Nuttata ’e Luglio... ’Int’ a ll’albere

tra fronna e fronna, se ntrecciano

’e lluce-luce ’e ’sta luna;

na luna tonna: nu chirchio

smaltato senza na macula,

senza na ntacca. Manco una.

Ccri-ccri... Ma cantano o chiagneno

’mmiezo a ’sti pàstene ’e cànnevo,

’mmiezo a ’stu ggrano, ll’agrille ?

So’ cinco o sei ch’accummenciano

’stu zzerri-zzerre patetico

— rummore ’e comme vattesseno

nu fierro ncopp’a na cràstula —

ma pò so’ ciente... so’ mille...

So’ diecemila... E zzerréano

tutte mparanza, sbrucànnose

a cchi fa ’a voce cchiù meglia...

So’ diecemila. E ’sta musica

se spanne dint’ ’o silenzio

’e tutte ’e ccose ca dormeno

sott’a ’sta luna ca ’e vveglia.

'A sirena

cantanno comme canta na sirena

’A SIRENA

di Claudio Pennino

Vuie mo nun ce credite,

eppure i’ ll’aggio vista, mmiez’ ô mare,

sfuì pe ll’onne ardite,

cu ’e ricciulille d’oro e ll’uocchie chiare.

Ll’acqua se friccechiava,

e se faceva ’argiento pure ’a ’rena;

e, doce, me ncantava,

cantanno comme canta na sirena.

E me diceva: « Viene,

lèvate ’a copp’ ô core ’sti mmuntagne...»

ma, Ulisse, dint’ ’e ppene,

veneva trattenuto d’ ’e cumpagne.

E ’a tanno, notte e ghiuorno

i’ torno ô stesso pizzo n’ata vota:

e ’a chiammo, e ’a cerco attuorno...

ma ’o mare nun risponne e s’arrevota.

Va trova si accumpare:

spasseo pe ncopp’ ’a ’rena o sto’ ’e rimpetto,

guardo luntano ’o mare,

suspiro e stongo ancora llà c’aspetto.

(da Primma ca scura notte 2009)

A quinnice anne

E dint’ a ll’uocchie tuoie luceva ’o sole

A QUINNICE ANNE

di Raffaele Chiurazzi

Stevemo ’e casa ’a scesa d’ ’o Cavone

e io tenevo quinnice anne appena.

Facevo ogne matina na canzone

e tu m’ ’a musicave llà ppe llà.

E tutt’ ’e dduie, cu musica e pparole

passavemo ’e ghiurnate sane sane.

E dint’ a ll’uocchie tuoie luceva ’o sole

d’ ’a cuntentezza e d’ ’a sincerità !

Ma ce lassaiemo senza na ragione.

Quant’ anne songo ? chi se l’arricorda.

’A giuventù che passa... è na canzone

ca se canta una vota... e ppo’, maie cchiù !