'O cunto 'e ll'ove

« cò-cò-cò »... sbattono ’e scelle

e lle fanno dudece ove.

’O CUNTO ’E LL’OVE

di Ettore De Mura





Tutt’ ’e pulle d’ ’o « cumpare »
songhe dudece e no chiù.
Ma Rusina ’e ttene care
e ce parla a tu pe tu.

’E ccapisce, ’e chiamma a nomme,
’e gguverna, e ogne gallina
— nun ’o ssape manco comme —
lle fa n’uovo ogne matina.

Tutte quante ’e ggallenelle,
ogne ghiuorno verso ’e nnove,
« cò-cò-cò »... sbattono ’e scelle
e lle fanno dudece ove.

Ne venne ùnnece annascuso
d’ ’o marito, e, puntualmente,
quanno è ’a sera ha miso ll’uso
d’ ’o dà n’uovo sulamente...

— Ne fanno uno !... — Isso s’ ’o ccrere,
capuzzea e, muollo muollo,
dice: — N’uovo tutt’ ’e ssere...
A sti bestie ’e ttiro ’o cuollo!

— Nonzignore ! — fa ’a mugliera
Aspettammo !... — E sta cafona
tene sempe ’a bbona cera,
e lle vene sempe bona.

Tene sott’a na riggiola
tutt’ ’e llire ch’ ’abbuscate.
Quanno ’e gguarda se cunzola:
sti galline so’ affatate !

*  *  *

Na matina ca p’ ’o ggrano
nun ce steva ’a fatica,
’o « cumpare » chianu chiano
torna ’a casa e resta llà.

— Stu pullaro costa caro... —
suspiranno ha riflettuto.
Ma guardanno ’o gallenaro
resta comma n’alleccuto...

— E che so’ sti dudece ove ?
Veco buono ?... È overo o no ?
Cheste songhe cose nove...
Comme va stu fatto, oj Ro’ ? —

E Rusina, ’ntartaglianno :
— Chelle spisso t’hanno ntiso...
Ogne pullo va scanzanno
certamente ’e muri acciso,

e accussì... se so’ sfurzate...
hanno miso ’a vuluntà,
e ’int’ a niente hanno mpastate
dudece ove... stanno ccà !—

’O cafone ch’ è suttile
e capisce comm’ è ghiuto,
piglia ’nmano nu fucile
e lle dice risoluto:

— Ah! Sicché tutto s’ottiene
cu ’e mminacce e niente cchiù ?
Siente, Ro’, io te voglio bene,
ma he’ ’a fà ll’uovo pure tu!

Ogne ghiuorno! E si na sera
quanno torno nun m’ ’o daie,
ah, mugliera mia mugliera,
t’assicuro ca so’ guaie!

*  *  *

Rosa, mo, s’ è appaurata...
tremma pure si sta sola...
n’uovo accatta ogne ghiurnata
cu ’e denare d’ ’a riggiola.

E accussì tutt’ ’e mmatine
piglia ll’ove e nun ’e mmove.
Tene dudece galline
ca lle fanno tridece ove!