Lettera 'e Pasca a Maria

è nu dolce che sape ’e primmavera

LETTERA ’E PASCA A MARIA

di Ettore De Mura

Cara Maria,

                                   grazie p’ ’e vviole

e pe ll’augurie ’e Pasca c’he mannato,

viole e augurie ’e Pasca songo ’o sole

e vonno di’ ca vierno è già passato.

E nuie turnammo a ce fà ’e ccammenate

pe tutt’ ’e strade ca piaceno a tte.

Strade ’e campagne e frase appassiunate,

sa’ quanta vase doce c’aggio ’avé!

Ah, me scurdavo: grazie p’ ’a finezza

’e me mannà stu « simbolo d’ ’a pace ».

Ma a me, te cerco scusa p’ ’a franchezza,

chesta « colomba » ’e Pasca nun me piace!

Sarrà elegante chest’usanza nova,

ma chisto core mio napulitano

nun te può mmagginà chello che prova

si pure ’o dolce hadda venì ’a Milano!

Quanno spusammo nuie, fatte capace,

ca se fa Pasca comme piace a me,

e nun ce serve « ’o simbolo d’ ’a pace »,

ca i’ songo cchiù felice nzieme a tte!

T’ ’a mpare ’e fà, e voglio na pastiera

comm’ ’a faceva sempe mamma mia;

è nu dolce che sape ’e primmavera,

fatto cu na ricetta ’e poesia.

’A crema, ’o ccedro, ’o ggrano, ’a mille fiore,

nu pizzeco ’e vaniglia ch’è nu ciancio,

e ll’augurio ca eterno è chist’ ammore

ce ’o fa tutt’ ’o prufumo ’e sciure arancio...

P.S. - Pe Carmela ’a cammarera

te manno sti ddoie rose e na pastiera.