'O sciore puveriello

Pirciò a chi voglio bene overamente,

nun porto maie na rosa prufumata

’O SCIORE PUVERIELLO

di Claudio Pennino

Sì, sono il sognatore; sono il compagno

dei piccoli fiori d’oro sul muro diroccato.

                                                                                                              V. Hugo

M’ha sempe dato sfizzio, ’a guagliunciello,

chillu sciurillo giallo e dellecato

c’ognuno chiamma “sciore puveriello”,

pecché nasce accussì, malasciurtato.

Cresce dint’a na preta ch’è spaccata,

p’ ’e strate sfussecate d’ ’e ccampagne,

ncopp’a na casarella sgarrupata

o a llato d’ ’e vienove cchiù sulagne.

E chistu sciore, semprece e nnucente,

ca cresce nterra cu nisciuna cura,

pareva a me, scugnizzo e ndifferente,

ca me rassumigliava addirittura.

E quann’ ’o veco ncopp’a nu murillo,

pittato d’oro sott’ ’o cielo blu,

me pare sempe bello ’stu sciurillo

ca m’arricorda ’a meglia giuventù.

Pirciò a chi voglio bene overamente,

nun porto maie na rosa prufumata

o n’atu sciore guappo e risplennente

sulo pe fà na scena o na sparata.

Ma porto sempe e sulo ’stu sciurillo,

ca ’e tutt’ ’e sciure è ’o “sciore puveriello”;

e po’, siccomm’è allero e piccerillo,

pare ’e purtà ’stu core guagliunciello.

(da Primma ca scura notte, 2009)