Primmavera

Ogge - vintuno ’e marzo - è Primmavera

PRIMMAVERA

di Giovanni Panza

Viénece, bella mia,

pe’ sta muntagna tutta verde e nfosa...

Fore ’a malincunia!

Ogge - vintuno ’e marzo - è Primmavera.

Te voglio, comm’a pprimma, allera, allera!

Saglimmo chianu chiano.

Te farrà bene st’aria matutina.

Viénece... damme ’a mano...

’A llà guardammo, abbascio, ’o campanaro

cu ’a cchiesa janca, all’urdemo felaro.

E po’ scennimmo ancora

p’ ’o vallunciello, addó, pe’ l’ombra fresca

’a viuletta addora,

addó scénneno ’e miérole a pprimm’ora

addó cchiù doce ’ammore s’assapora...

Guarda: ogne ramo già ha cacciato ’o sciore.

Viénece, bella mia...