AFFATTURATO

 
di Claudio Pennino

 

È cchiù ’e nu mese ca stongo malato,

e ’o miedeco che vene nun me sana.

Dice ca songo stato affatturato,

e ncuorpo mm’arrevota na terzana.

Nu monaco è venuto d’ ’o cunvento

e ha ditto: « Figlio, parla ca te sento.»

Ll’aggio risposto: « Patre, so’ perduto:

doce era ’o vaso e ’a vocca era ’e velluto. »

 

(da Villanelle, 2016)

 

 

 

 

 

 

te sto’ facenno ’a guerra ’e Don Chisciotto…

MULINO A VIENTO

di Claudio Pennino

Io te cumbatto senza giuvamiento:

’sta guerra ca te faccio è perza ’e mano.

’Stu core tuio è nu mulino a viento:

mmacina ’o bbene comme fosse grano!

Ma i’ nzerro ll’uocchie e torno sempe sotto;

te sto’ facenno ’a guerra ’e Don Chisciotto…

Chi sa’ qua’ vota, attuorno a ’stu mulino,

fernesco sott’ ’a rota e mme mmacino.

(da Villanelle, 2016)

Pecché si' bella

Quann’ ’int’ ’e vierze mieie parlo ’e ’sta faccia

PECCHÉ SI’ BELLA

di Claudio Pennino

Pecché si’ bella, quanno io parlo ’e te,

pure ’e pparole meie pareno belle;

’a ggente ca me sente vo sapé

addó ’e ttrovo accussì azzeccuselle.

Quann’ ’int’ ’e vierze mieie parlo ’e ’sta faccia,

pure ’sti vierze, ca so’ cosa ’e niente,

pareno chi sa che... e dice ’a gente:

« Ma chisti vierze, chisto ’a dó ’e ccaccia? »

(da Villanelle, 2016)

Cane e puorce

Una raccolta di proverbi e di modi di dire napoletani in cui i personaggi e gli interpreti principali sono gli animali. La saggezza popolare, in questo libro, si esprime per mezzo di scimmie, cavalli, muli, formiche e di molti altri animali che si prestano a rappresentare, spesso con ironia e acume, le debolezze e le abitudini degli uomini; una morale, un insegnamento o un ammonimento, relativi ai loro vizi e alle loro virtù.

Sentenze e locuzioni che, sebbene coniate alcuni secoli addietro, mantengono intatta la loro attualità e modernità rappresentando con viva fantasia e grande efficacia espressiva, i pregi e i difetti dell’uomo.

Io resto ccà

E me sanno ’e pprete addó cammino

IO RESTO CCÀ

di Claudio Pennino

No, i’ resto ccà!

’O ssaccio, tengo ’a guerra dint’ ’a casa,

ma nun ’a lasso, no, chesta città.

Ccà ce so’ nnate ’e nonne ’e patemo,

e ce so’ nnate ’e figlie mieie.

E me sanno ’e pprete addó cammino,

e i’ ce parlo

comme fosseno vive.

Ccà, a ’stu paese,

parlano ’a stessa lengua ca parl’io,

e ce capimmo

guardannoce ’int’a ll’uocchie:

e ccà voglio lassà nu munno

meglio ’e chillo ca i’ aggio truvato.

No, i’ resto ccà!

’O ssaccio, mo so’ tiempe malamente,

ma i’ nun me faccio caccià d’ ’a casa mia.

I’ nun m’arrenno, no.

Avimm’aizà ’sta capa,

e si nfino a mo âmmo cantato,

mo avimm’alluccà forte.

Mmocca tenimmo ’o ssale,

e nun è chello d’ ’o mare.

A vvuie, che v’aggi’ ’a dì,

si vulit’ì’, iate:

i’ no, io resto ccà!

© Claudio Pennino

Anema santa

io cerco nfunno a nu bicchiere ’e vino

ANEMA SANTA

di Claudio Pennino

Ê vvote, quanno triste scenne ’a sera,

io cerco nfunno a nu bicchiere ’e vino,

’e me scurdà chesta faccella ’e cera,

’e me scurdà ’stu musso curallino.

A poco â vota ’a capa se svacanta,

s’appanna ’a vista, e i’ torno anema santa...

Tutto me scordo... ma chisà pecché,

i’ mm’arricordo sulamente ’e te.

(da Villanelle, 2016)

Mpressione

Ncopp’ ’a spalla mia, vicino ô cuollo

MPRESSIONE

di Claudio Pennino

                                      da C. W. Aigner

Ncopp’ ’a spalla mia, vicino ô cuollo

’a pelle se ncava.

Si m’arricordo bbuono

tene propio ’a forma d’ ’a faccia toia.

© Claudio Pennino

Aggio truvato nterra

n’aniello cu na preta a forma ’e stella

AGGIO TRUVATO NTERRA

di Claudio Pennino

Aggio truvato nterra, mmiez’ â via,

n’aniello cu na preta a forma ’e stella;

chi ’o purtava, e nun dico buscia,

cchiù certo tene ’a mana piccerella.

Si mo nun songo troppo facciatosta,

faciteme pruvà si a vvuie ve trase...

e si chist’anelluccio è rrobba vosta,

pe ricumpenza, me ne date vase.

(da Villanelle, 2016)

Na mela rossa

tu ce daie nu muorzo

NA MELA ROSSA

di Claudio Pennino

Tengo na mela rossa,

na bella mela rossa;

tu ce daie nu muorzo

e, mmocca,

io ne sento ’o sapore.

Dint’ a ll’uocchie tuoie,

mentre guarde luntano,

io veco ’e nnuvule ’e passà.

’O cielo e ’o mare

s’arrevotano

sott’ ’e mmane toie.

Tengo na mela rossa,

na bella mela rossa;

tu ce daie nu muorzo,

e nun t’accuorge

ca chisto è ’o core mio.

© 2018 Claudio Pennino

'O campaniello affatato

Tengo nu campaniello ch’è affatato

’O CAMPANIELLO AFFATATO

di Claudio Pennino

Tengo nu campaniello ch’è affatato:

legge ’int’ ’o core â nnammurata mia.

È tutt’ ’e prete d’oro tempestato,

e sona quanno sente na buscia.

C’ ’a mana ncopp’ ô core me giuraste:

« Cu tte pe tutt’ ’a vita! » e m’abbracciaste.

E ’o campaniello, ca st’appiso fora,

son’ ’a tre ghiuorne e nun se ferma ancora.

(da Villanelle, 2016)

Uocchie ca a chistu core site care

si ve nzerrate, vuie stutate ’o sole

UOCCHIE CA A CHISTU CORE SITE CARE

di Claudio Pennino

Uocchie ca a chistu core site care,

cu ’sti guardate vuie me cunzulate;

comm’ a ddoie prete ’e dïamante rare,

dint’ a ’stu core mio state astipate.

Vuie ca parlate, e nun tenite voce,

comm’ a ddoie gocce ’e mèle site doce;

e site ’a mmiria ’e femmene e figliole,

si ve nzerrate, vuie stutate ’o sole.

(da Villanelle, 2016)

guardo sempe na stella

NA STELLA PICCERELLA

di Claudio Pennino

Speruto, tutt’ ’e ssere,

guardo sempe na stella,

ca mmiezo a ttutte ll’ate,

pare ’a cchiù piccerella.

Vene ’a tanto luntano,

e lenta s’avvicina…

me passa ’nnante e subbeto

p’ ’o cielo se ncammina.

Cu ll’anema ncantata

veco ca s’alluntana,

tanto ca me piacesse

’e ll’afferrà c’ ’a mana.

E’ ’a stessa stella ’e quanno,

ancora piccerillo,

passavo ’e nnotte sane,

’mmustanno c’ ’o detillo.

Finché na bella sera,

senza cercà ’o permesso,

penzaie: « Chi sa addó porta… »

e lle currette appriesso.

Dint’a na notte sola,

vulanno nzieme ’e viente,

vedette ’e mmeraviglie

ca stanno nzì a ll’Uriente.

Perle quanto a ccerase,

scrigne chine ’e ricchezze;

Riggine e Pprincipesse

cu ll’oro dint’ ’e ttrezze.

Dint’a na sola notte,

vulanno comm’ aucielle,

vedette ’o munno sano,

paise e paisielle.

Quanno a mustrarte ’a strata

ncielo na stella vola,

nun c’è bisogno ’e dicere

nisciun’ata parola.

. . . . . . .

Schiarava iuorno e ’o sole

ncielo luceva a ffesta…

e me truvaie addurmuto

arreto a na fenesta.

(da ’A strata d’ ’e stelle, 2001)