Te voglio bbene

 

dico: te voglio bbene.

TE VOGLIO BBENE

di Claudio Pennino


Si fosse nu francese
putesse dì: - Je t’aime...
ma so’ napulitano,
e me pare nu scemo.

E si fosse n’inglese
dicesse: - I love you;
ma tu me rispunnisse:
- Nun me vuò bene cchiù?

Si provo c’ ’o ttedesco
te dico: - Ich liebe dich...
ma rieste indifferente,
pecché nun me capisce.

Ma dimme, quanta mode
’e dicere ce stanno,
pe ffarte fà capace
ca io te sto’ ppenzanno?

Quanno ll’ammore trase,
s’ha dda parlà c’ ’o core,
senza perdere tiempo,
ca ccà se nasce e mmore.

Senza cercà ’e pparole,
senza fà ’o furastiero:
parla comme si’ ffatto,
e llevate ’o penziero.

I’ so’ nnapulitano
e pparlo comme vene;
pirciò, c’ ’o core mmano,
dico: te voglio bbene.


© Claudio Pennino

'O cunto d' 'a nonna

 

’a nonna ce assettava attuorno a essa

’O CUNTO D’ ’A NONNA

di Claudio Pennino

I’ mm’arricordo quanno piccerillo
’a nonna ce assettava attuorno a essa,
e ce cuntava ca… « nu suricillo
na vota era na bella Princepessa.

L’avvelenaie na Streca, cu nu spillo,
ma ’o Princepe, servuto sta sberressa,
’ngappava ’o suricillo ’int’ ô mastrillo
pe scioglierle ’a fattura ampressa ampressa…

’Int’ ’a città ncantata, a pprimmavera,
’o Princepe vasava, puntualmente,
’a Princepessa ciento vote a’ ssera…» 

E propio tanno e ttanno sulamente,
io mm’addurmevo e mme sunnavo ch’era
nu Princepe o nu Rre overamente.

(da Vela ’e penziere, 1999)

'A funtanella

 

Ce sta na funtanella ’int’ ’o ciardino

’A FUNTANELLA

di Claudio Pennino

Ce sta na funtanella ’int’ ’o ciardino
ca m’ha fatto nu nciarmo o na fattura.
Ll’acqua, cchiù ddoce ’e chella d’ ’o Serino,
me fa venì cchiù ssete adderittura.

Me stono manco ’st’acqua fosse vino,
ma nun me sazio, né se stuta ’arzura.
Vocca ’e cerasa lassa ca te coglio,
ca cchiù rriale vase e i’ cchiù nne voglio.

(da ’A strata d’ ’e stelle, 2001)

'A serenata

 

Stasera aggio purtato ’o cuncertino

’A SERENATA

di Claudio Pennino


Stasera aggio purtato ’o cuncertino,
ma tu ’o stesso nun te si’ affacciata;
mo c’ ’a chitarra e mo c’ ’o mandulino,
e se n’è ghiuta pure ’sta nuttata.

Già sta schiaranno iuorno ’int’ ’o ciardino
e tu nun siente, duorme a suonno chino...
me so’ fatto capace, oi bella Fata,
ca sto’ perdenno ’o suonno e ’a serenata.



(da Villanelle, 2016)

'A bbella 'e tutt' 'e bbelle

 

tu certamente si’ cchella cchiù bbella

’A BBELLA ’E TUTT’ ’E BBELLE
 

di Claudio Pennino
 
 
 
Tra tutte quante ’e bbelle ’e tutt’ ’e bbelle,
tu certamente si’ cchella cchiù bbella;
pe quanto ll’ate songo bbone e bbelle,
niente ce ponno cu ’sta faccia bbella.

Se fanno bbrutte e murmuleano ’e bbelle,
sentenno ca d’ ’e bbelle si’ ’a cchiù bbella;
ma ’o bbello è ca ’a bbellezza ’e tutt’ ’e bbelle,
nun è cchiù bbella ’e chesta faccia bbella.
 
 
(da Villanelle, 2016)

Pupo 'e guarattella

 

addó ch’avess’ ’a dì: « Pulicenella!

PUPO ’E GUARATTELLA

di Claudio Pennino

Comm’ a nu cacciuttiello fore â porta,
aspetto ca tu arape nu mumento;
nun dormo cchiù, nun mangio, e nun me mporta
si mammema me chiamma e nun ’a sento.

Pe te vasà ’stu musso ’e cerasiello,
so’ addeventato pupo ’e guarattella;
’a ggente passa e dice: « Puveriello... »
addó ch’avess’ ’a dì: « Pulicenella! »

(da Villanelle, 2016)

Na rosa ianca

Dint’ a ’sta mano, i’ lasso ’o core mio

 

NA ROSA IANCA

A Clarita

Tu duorme cunnuliata ’a ll’angiulille,

e, piccerella, ’sta manella aperta,

pare, dint’ a ’sta pace senza strille,

na rosa ianca ncopp’ a ’sta cuperta.

N’acquasantera addó, nzieme ê suspire,

trovano pace ’sti penziere nire.

Dint’ a ’sta mano, i’ lasso ’o core mio,

tu ca si’ ’a cosa cchiù vicina a Ddio.

(da Acqua salata, 2019)

Balcone cu 'e llenzole

 

quanno s’affaccia nenna, sponta ’o sole

BALCONE CU ’E LLENZOLE

di Claudio Pennino


Chi vo vedé â matina schiarà iuorno,
guardasse ’stu balcone cu ’e llenzole;
ce sta na rampicante tuorno tuorno,
quanno s’affaccia nenna, sponta ’o sole.

Cchiù ghianca d’ ’e llenzole tene ’a faccia,
me tene mente e pare ch’amminaccia;
’e ddoie manelle so’ palomme d’oro...
quanno nzerr’ ’o balcone io me ne moro.


da Villanelle, 2016

Preggiudizzio

 

Ma ’a streca cerca sulo a ’sta criatura

PREGGIUDIZZIO

di Claudio Pannino



Na streca ca purtava a spasso ’o figlio,
nu iuorno, ca p’ ’a via facette scuro,
cu tutto ca spenzava ogni ccunziglio,
perdette, mmiez’â folla, ’stu criaturo.

E ’a tanno, o esce ’o sole o fa ’e ttempeste,
’a streca smiccia ogne purtone nchiuso.
Appizz’ ’e rrecchie ê ssenghe d’ ’e ffeneste,
p’appurà ’o figlio suio chi s’ha annascuso.

E si sente ca chiagneno ’a luntano,
pare mpazzuta… corre, ruciulianno.
Cerca ’e capì d’ ’a voce, chianu chiano,
si è ’o piccerillo suio ca ’a sta chiammanno.

« Nzerrate ’e pporte a chiave – dice ’a ggente –
vene pe s’arrubbà nu piccerillo! »
Na mamma, arreto ê llastre, ’a tene mente,
s’astregne ’o figlio mpietto e ddà nu strillo.

Ma ’a streca cerca sulo a ’sta criatura.
E chiagne, e ffa na pena mmiez’ ’a via.
E ognuno abbarra ’e pporte p’ ’a paura,
se fa nu segno ’e croce, e accussì sia.

Se sape, ’o preggiudizzio stuta ’o core,
e ognuno vede ’a streca e resta muto.
Nisciuno, nzieme a n’anema ca more,
vede na mamma c’addimanna aiuto.


(’A pianta d’ ’a felicità 2004)

'O cappiello

 

i’ mm’addenocchio... e mme levo ’o cappiello

’O CAPPIELLO

di Claudio Pennino



I’, quanno ’e ccose nun vanno adderitto,
vulesse fà nun saccio qua’ maciello;
ma po’ me tengo, ngotto, me sto’ zzitto...
e p’appaciarme... me metto ’o cappiello.

Si ncontro ’o fesso ca vo fà ’o saputo,
’o dongo spavo e ffaccio ’o macchiaviello:
« Vabbuó, comme vuò tu, chi ha avuto ha avuto...»
’o guardo nfaccia... e mme metto ’o cappiello.

Nu bbuono amico fa na mal’aziona?
io faccio cunto ch’è nu pazziariello
ch’ ’ha fatto na sparata o na canzona.
Lle dongo ’a mano e mme metto ’o cappiello.

Vene ’o parente e ttuzzulea a ddenare?
Nu preputente vo fà ’o capuzziello?
E si ’e mbrugliune sguigliano a mmigliare...
io pe rremmedio... me metto ’o cappiello.

Ma quanno veco a cchi se stenta ’a vita,
a cchi se magna pane e ccerasiello,
e ttene ’o core e ll’anema pulita,
i’ mm’addenocchio... e mme levo ’o cappiello.

(da Acqua salata, 2019)

Nu monaco

 

Nu monaco ce sta ncopp’a nu monte

NU MONACO

di Claudio Pennino



Nu monaco ce sta ncopp’a nu monte,
ca porta ’annummenata ch’è nu santo;
te benedice e t’accarezza ’a fronte,
sempe ca ’o tengo mente, me ce ncanto.

« Patre - aggio ditto - tengo ’a nnammurata
pe quanta vote è bella, tanto è ngrata... »
Isso ha risposto doppo nu mumento:
« Pe chella ngrata io sto’ dint’ ’o cunvento! »



(da Villanelle, 2016)

Che fosse...

 

’A rena se scurdasse che so’ ll’onne

CHE FOSSE...

di Claudio Pennino


Che fosse chesta vita senz’ ’e te,
e, senz’ ’e te, dimme, che fosse ’o sole?
Che senz’avess’ ’a notte nera e ffuta,
e ’o iuorno appriesso, che schiarasse a ffà?

Ll’aucielle, ca mo volano p’ ’o cielo,
appucundrute stesseno p’ ’e ffronne.
’E sciure nun schiuppasseno â matina,
pecché ’a matina nun ce stisse tu.

’A rena se scurdasse che so’ ll’onne,
e ’o mare se quagliasse una vutata;
’e vvarche nun ascesseno d’ ’o puorto,
ca pure ’o viento nun sciusciasse cchiù.

Tutt’ ’e ffuntane d’acqua trasparente,
’a sete nun putesseno levà;
’o munno, perzo, trattenesse ’o sciato:
’o tiempo... se fermasse a t’aspettà.



(da Acqua salata, 2019)

Nu mierulo

 

si’ dispettosa assaie, e dint’ ’a testa

NU MIERULO

di Claudio Pennino



Che bbella cosa quanno a ’sta fenesta
t’affacce allera a guvernà ll’auciello;
si’ dispettosa assaie, e dint’ ’a testa
te cresce sulamente ’o cerasiello.

Nu mierulo t’hê miso ’int’ ’a caiola,
sempe me dice: « Lassa a ’sta figliola... »
ogge m’ha ditto: « Oi nì, sciuoglie ’a matassa...
cagna fenesta, chesta te repassa! »

Isso nun resta sulo

 

Ringrazio a Dio pe ’st’angelo guardiano

ISSO NUN RESTA SULO

di Claudio Pennino

    A Caludio jr.

Àveta è ’a notte. E ’int’a ll’oscurità,
i’ veglio pecché ’o suonno trica ancora.
’O piccerillo sta durmenno già,
e pare ’e cera cu ’e bbraccelle ’a fora.

E ce facimmo cumpagnia, ô scuro,
i’ e ll’angiulillo affianco â cunnulella
ca veglia ncopp’ ’o suonno ’e ’stu criaturo:
lle veco appena ’a faccia strattulella.

Ringrazio a Dio pe ’st’angelo guardiano,
ca, si mm’addormo, isso nun resta sulo.
’O veco quann’ ê vvote stenne ’a mano
e lle cummoglia ’e spalle c’ ’o lenzulo,

o quanno s’avvicina, ’int’ ’o chiarore,
pe lle vasà ’e ddoie manelle tonne;
’o sento quanno zitto ’o chiamma: « Ammore »,
mentre lle ntreccia na curona ’e suonne.